ಗೋರಿಯ ಮೇಲೆ ಬರೆದಿತ್ತು
‘ನಿನ್ನೆ, ನಿನ್ನಂತೆ ನಾನು
ನಾಳೆ, ನನ್ನಂತೆ ನೀನು!’
ಹೊರತಲ್ಲ ನಾವೇನೂ
ಇಂದಲ್ಲ ನಾಳೆ
ಗೋರಿಯಲ್ಲಿ ನಾನು ನೀನು!

ಗರ್ವದಿ ಮೆರೆವೆವು ನಾವು, ಆದರೆ
ನಾವು ಮಣ್ಣಿನ ಇನ್ನೊಂದು ರೂಪ
ಮಣ್ಣಿಗೆ ಮರಳಿ ಹೋಗುವೆವು
ನಮ್ಮ ಜೀವ ಪಡೆದಿರುವ ಸಾಲ
ಆತನಿಗೆ ಮರಳಿ ನೀಡವೆವು

ಗೂಡಿನಿಂದ ಹೊರಟ ಹಕ್ಕಿಯು
ಗೂಡಿಗೆ ಮರಳುವುದು ಸಹಜ
ನೋವಿನ ಸುಳಿವಿಲ್ಲ, ನಿರ್ಭಯ
ಒಂದು ನಿರಾಳ ಭಾವ, ಉನ್ಮಾದ

ಯಜಮಾನನ ಗಿಡದ ಹೂವು
ಆತನ ಮುಡಿಯೇರುವುದು ಸಹಜ
ಅಗಲಿಕೆಯ ನೋವಿಲ್ಲ, ಸಂತೃಪ್ತಿ
ಒಂದು ಸಂತಸದ ಭಾವ, ಉನ್ಮಾದ

ಜಗವನು ಅಗಲುವುದಲ್ಲ ಸಾವು
ಪೆದ್ದರಿಚ್ಚ
ದೇವರಿಂದ ಅಗಲಿ ಹೋಗುವುದು
ನಿಜವಾದ ಸಾವು!

ವೇಗದ ಬಾಳ ರೇಸಿನಲಿ
ಮುಂದೆ ಓಡುವ ತವಕದಲಿ
ಹಿಂದೆ ತಳ್ಳುವ ರಭಸದಲಿ
ನಾನಾರೆಂಬುದನೇ ನಾ ಮರೆತೆ
ನನ್ನನೇ ನಾ ಗೆಲ್ಲಲು ಸೋತೆ
ಗೆಲುವಿನ ಸಾಲನು ದಾಟಿದೆ
ನಲಿವಿನ ಕಡಲಲಿ ತೇಲಿದೆ
ಚಪ್ಪಾಳೆಯ ಸದ್ದಲಿ ಮುಳುಗಿದೆ…
ಆಗ ಗದ್ದಲಲೊಂದು ಸಪ್ಪಳ
ಸೋಲಿನ ಅಂಚನು ತಲುಪಿದಂತೆ
ನೋವಿನ ಅಲೆಯಲಿ ಈಜುವಂತೆ
ನಾನೆ ನನಗೆ ಗೇಲಿ ಮಾಡಿದಂತೆ…
ಆಗ ನನ್ನ ಓಟದ ಅರಿವಾಯಿತು…
ಗೆಲುವಿನ ಸುಳಿವು ಸಿಕ್ಕಿತು
ಆನಂದದ ಸೆಲೆಯ ಕಂಡತಾಯಿತು…
ಶ್ರೇಷ್ಟತೆ ಎಂದರೆ….
ಇತರರಿಗಿಂತ ಉತ್ತಮನಾಗುವುದಲ್ಲ
ನನಗಿಂತ ನಾನೇ ಉತ್ತಮನಾಗುವುದು…
-ಪೆದ್ದರಿಚ್ಚ

ಪ್ರೇಮಿ ನಾನು ಕುರುಡನಾದೆ
ಕುರುಡನಾಗಿ ಆ ಕುರುಡಲಿ
ಪ್ರೇಮದ ಕರ್ತೃವನು ಕಂಡೆ
ಆತನ ಪ್ರೇಮದಲ್ಲಿ ನೋಡಿದೆ
ಪ್ರೇಮದ ಸವಿಯನು ಉಂಡೆ
ಆತನ ಪ್ರೇಮದ ಸುಧೆಯಲಿ ಮಿಂದೆ
ನಿಜ ಪ್ರೇಮದ ಅರಿವಾಯಿತು
ಕುರುಡಾದ ಕಣ್ತೆರೆಯಿತು
ಕೊಳೆತ ಹೃದಯ ಮೊಳಕೆಯೊಡೆಯಿತು
ಕುಡಿ ಚಿಗುರೊಡೆಯಿತು
ಆತನ ಪ್ರೇಮದ ಬೆಳಕಲಿ
ಸಸಿಯಾಗಿ, ಮರವಾಗಿ
ಚಿರಕಾಲ ಬಾಳುವ ಹಂಬಲ
ಹೆಮ್ಮರವಾಯಿತು
ಆತನ ಪ್ರೇಮವಿರದೆ
ಎಲ್ಲ ಪ್ರೇಮ ಕುರುಡು….
ಆತನ ಪ್ರೇಮವ
ಪರರಲಿ ಹಂಚದೆ
ಬಾಳಿಗಿಲ್ಲ ಸೊಗಡು…
-ಪೆದ್ದ ರಿಚ್ಚ

ಮರಳಿ ನೀಡುವವರ ಕರಗಳಲಿ
ಕರಚಾಚಿ ನೀಡಿದರೆ
ಅದನು ಸಾಲವೆನ್ನಲೇ, ದಾನವೆನ್ನಲೇ?
ನಗು ನಗುತಾ ನನಗೂ ಸಿಗಲಿ
ಎನುತಾ ನೀಡಿದರೆ
ಅದನು ಭಿಕ್ಷೆಯೆನಲೇ, ದಾನವೆನಲೇ?
ಪರರ ಹಿತವ ಬಯಸದೆ
ಸ್ವ-ಹಿತವ ಬಯಸಿ ನೀಡಿದರೆ
ಅದನು ಸ್ವಾರ್ಥವೆನಲೇ, ದಾನವೆನಲೇ?
ಎಸೆಯ ಬೇಕಾದುದನು ಹೆಕ್ಕಿ
ಕರವೆತ್ತಿ ನೀಡಿದರೆ
ಅದನು ಕಸವೆನಲೇ, ದಾನವೆನಲೇ?
ಕಷ್ಟದಲಿ ಬೇಕಾದಾಗ ನೀಡದೆ
ಮನಸ್ಸಾದಾಗ ನೀಡಿದರೆ
ಅದನು ಕೊಡುಗೆ ಎನಲೇ, ದಾನವೆನಲೇ?
ಅಲ್ಪರ ಹೆಸರನು ಗೀಚಿ ಹಾಕಿ
ತಮ್ಮೆಸರನು ಬರೆಯಲು ನೀಡಿದರೆ
ಅದನು ಶೋಷಣೆಯೆನಲೇ, ದಾನವೆನಲೇ?
ನಾ ಕೊಟ್ಟರೆ ನೀ ಕೊಡದನು
ಎನುತಾ ನೀಡಿದರೆ
ಅದನು ವಿನಿಮಯವೆನಲೇ, ದಾನವೆನಲೇ?
ಕೊಡುವಾಗ ಕೊಡುವ ದೇವನ ಮರೆತು
ನಾನೇ ಧನ್ಯನು ಎಂದರೆ
ಅದನು ಪ್ರದರ್ಶನವೆನಲೇ, ದಾನವೆನಲೇ?
ತಮ್ಮವರನು ಹುಡುಕಿ ತಮ್ಮವರಿಗೆ
ಕರವೆತ್ತಿ ನೀಡಿದರೆ
ಅದನು ಖರ್ಚು ಎನಲೇ, ದಾನವೆನಲೇ?
ಪೆದ್ದರಿಚ್ಚ
ಕೊಡುವುದಾದರೆ ಕೊಡು
ಅಂಥವರಿಗೆ ಕೊಡು
ಒಂದು ಕಾಸು ಮರಳಿ
ಕೊಡಲಾಗದವರಿಗೆ ಕೊಡು!
ಕೊಡುವ ದೇವನು ನಿನಗೆ
ಮರಳಿ ಕೊಡುವನು ಕೊನೆಗೆ
ಸುಖವ ಸುರಿವನು ಜೊತೆಗೆ
ಮೊಗಕೆ ನೀಡುತಾ ಹೂನಗೆ!

ನಮ್ಮೂರಲ್ಲಿ ಒಂದು ಸಂತೆ
ಎಲ್ಲಾ ಮಾರಟಕ್ಕಿದೆ
ಒಂದು ರಾಶಿಯಲ್ಲಿ
ಪ್ರೀತಿ, ಪ್ರೇಮ
ಇನ್ನೊಂದು ಕಡೆಯಲ್ಲಿ
ನ್ಯಾಯ ನೀತಿ
ವಿಧ ವಿಧವಾದುದು
ಉತ್ತಮೋತ್ತಮವಾದುದು
ಕೊಳ್ಳುವವರಿಲ್ಲ.

ಅದೋ ಅಲ್ಲಿ
ಸಾಲೇ ಸಾಲು
ನೂಕು ನುಗ್ಗಲು
ದ್ವೇಷ, ಹಗೆಯ ಗೋಣಿ
ಅನ್ಯಾಯ ಅನೀತಿಯ ರಾಶಿ
ಕ್ಷಣ ಮಾತ್ರದಲ್ಲಿ ಮಾಯ!
ವಿಷವನ್ನೇ ಜನರು
ಅಮೃತವನ್ನಾಗಿ ಸವಿಯೇ
ಒಳಿತು ವಿಷವಾಯಿತಲ್ಲಾ!
ಕೊಳೆವ ವಸ್ತುಗಳು ಮೊದಲು
ವ್ಯಾಪಾರವಾಗುವುದಲ್ಲವೇ
ಪೆದ್ದರಿಚ್ಚ!

ಹುಟ್ಟು ಸಾವಿನ ನಡುವಿನ ಜೀವನ
ಸಹಸ್ರ ಆಯ್ಕೆಗಳ ಸವಿ ಮಿಶ್ರಣ
ನೂರು ದಾರಿಗಳಿರುವ ಒಂದು ಪಯಣ
ಸರಿದಾರಿಯನಾರಿಸುವುದೊಂದು ಪಣ

ಇನಿಯನ ಹೆಜ್ಜೆಗಳು ಕಾಣುವವು ಎನ್ನ ಮನದಲಿ
ಕಣ್ತೆರೆದು ನೋಡಲು ಎದುರಿಗಿರುವ ದಾರಿಯಲಿ
ಮುಳ್ಳುಗಳ ಸಾಲದು ದೈರ್ಯ ಬೇಕಿದೆ ಎದೆಯಲಿ
ಮಂಕಾಗಿ ಕುಳಿತಿರುವೆ ಕೊನೆಯಿರದ ಹಾದಿಯಲಿ

ತ್ಯಾಗದ ಬಲವಿರಲು ಸಾಗುವೆ ನಾ ಮುಂದಕೆ
ಕಷ್ಟಗಳ ಪರಿವಿಲ್ಲದೆ ಸರಿಸಿ ಎಲ್ಲವ ಹಿಂದಕೆ
ಕರೆದಾತನು ಬಳಿಯಿರಲು ಭಯವಿಲ್ಲ ಎನ ಮನಕೆ
ಹೆದರದೆ ನಾ ಸಾಗುವೆ ಹೆಜ್ಜೆ ಹಾಕಿ ಆತನ ಹೆಜ್ಜೆಗೆ
-ಪೆದ್ದ ರಿಚ್ಚ

ಕಳೆದು ಹೋದ ಮೇಲೆ ಅದರ
ಬೆಲೆಯು ತಿಳಿವುದು
ಕಳೆದು ಕೊಂಡ ಮೇಲೆ ಮಾತ್ರ
ಬುದ್ದಿ ಬರುವುದು
ಕಳೆದು ಹೋದ ನಿನ್ನೆ ಎಂದೂ
ಮರಳಿ ಬಾರದು
ಕಳೆದು ಹೋಯಿತೆಂದು ಮರುಗೆ
ಬಾಳು ಸಾಗದು.

ಕಳೆದು ಹೋದುದೆಲ್ಲಾ ಎಮಗೆ
ಮರಳಿ ಬಾರದು
ಕಳೆದು ಹೋದುದೆಲ್ಲಾ ಎಮಗೆ
ದಾರಿ ಮುಚ್ಚದು
ಕಳೆದು ಹೋದುದೆಲ್ಲಾ ಎಂದು
ನಷ್ಟ ಆಗದು
ಹೊಸತು ನಿನ್ನ ಪಾದದೆದುರು
ನಿಂತು ಕಾಯ್ವುದು

ಕಳೆದು ಹೋದ ನಿನ್ನೆ ಮೇಲೆ
ನಾಳೆ ಕಟ್ಟುವ
ಹೊಸತ ಬಯಸಿ ಹಟಡಿ ನಾವು
ಮುಂದೆ ಸಾಗುವ
ಕೊರಗಿ ಕೊರಗಿ ಬರುವ ಹೊಸತ
ಕಳೆದು ಕೊಳ್ಳುವ
ಹುರುಪು ತೊರೆವ ಮೂರ್ಖತನವ
ಏನು ಹೇಳುವ!
– ಪೆದ್ದರಿಚ್ಚ

ನನ್ನೊಳಗೆ ನನಗರಿಯದೆ ಇಹನೊಬ್ಬ ದೇವ
ನನ್ನರಿಯುವ ನನಗಾಗುವ
ನನ್ನೊಳಗಿನ ಜೀವ
ನನ್ನರಿತವನಾ ಅರಿಯದೆ
ಮೈಗಂಟಿದೆ ತೇವ
ನನ್ನೋರಗೆಯೇ ಹುಡುಕಾಡುತ
ಕಳಕೊಂಡಿಹೆ ಭಾವ

ನನ್ನೊಳಗಿರುವ ಓ ದೇವನೆ
ನನಗಿರಲಿ ನಿನ್ ಒಲುಮೆ
ದಯಪಾಲಿಸಿ ಹರಸೆನ್ನನು
ನಿನಗಾಡಲು ಮಹಿಮೆ
ನಿನಗಾಲಯ ನಾನಾಗುವೆ
ನನಗದುವೆ ಹಿರಿಮೆ
ನಿನ್ನ ಹೊರತು ನನ್ನ ಜೀವ
ದಯೆ ಇಲ್ಲದ ಕುಲುಮೆ…
-ಪೆದ್ದರಿಚ್ಚ

ಶಾಂತಿಗಾಗಿ ಹೋರಾಡುವ
ಕ್ರಾಂತಿಕಾರುವ ನಾಯಕ
ಮನಶಾಂತಿಯನ್ನು ಕಂಡು
ಯುಗಗಳೇ ಆಗಿವೆ!
ಮನದಲ್ಲಿ ಗದ್ದಲವಿರೇ
ಹೊರ ಶಾಂತಿಯು ಗದ್ದಲವೇ
ಚಿರಶಾಂತಿಯು ಗದ್ದಲವೇ!
ಒಳಗಿನ ಗದ್ದಲದ ತಳಮಳ
ಹೊರಗಿನ ಶಾಂತಿಗೆ
ಗದ್ದಲದ ನಾಮಕರಣ
ಮಾಡದಿರಲಿ ಪೆದ್ದರಿಚ್ಚ!

ಓ ದೇವಾ,
ಬಡವನಾಗಿದ್ದೆ ನಾನು
ಇರಲಿಲ್ಲ ನನ್ನಲ್ಲಿ ಏನೂ
ಬಡವನಲ್ಲ ನಾನಿನ್ನು
ನಿನಗೇನು ಬೇಕು ಹೇಳು ನೀನು…

ಯಾವ ಸಿರಿವಂತನಿಗೂ ಕಮ್ಮಿ ಇಲ್ಲ
ಬೆಳ್ಳಿ ಬಂಗಾರಕ್ಕೇನು ಕೊರತೆ ಇಲ್ಲ
ಬೇಕಾದರೆ ಹೇಳು ಕೊಡಬಲ್ಲೆ ಇಂದು
ಮುಕುಟ ಮಾಲೆ ನಿನ್ನ ತಲೆಗೊಂದು

ಮಿತ್ರರು ಎನಗೆ ಇರುವರು
ಕೆತ್ತನೆಯ ಅವರು ಅರಿವರು
ಬೇಕಾದರೆ ಹೇಳು ನೀಡಬಲ್ಲೆ ಇಂದು
ನಿನ್ನಂತೆ ಇರುವ ನಿನ್ನ ಮೂರ್ತಿಯೊಂದು!

ಜನರ ಕಣ್ಣಲಿ ದೊಡ್ಡವನು ನಾನು
ಮುಗಿವರು ಕೈಗಳ ಕಂಡಾಗ ಅವರು
ಬೇಕಾದರೆ ಹೇಳು ಮಾಡುವೆನು ನಾನು
ಇನ್ಮುಂದೆ ಅವರಿಗೆ ರಾಜ ನೀನು!

ಬೇಡಿದೆ ನಾನಂದು ನೀಡಿದೆ ನೀನು
ಬೇಡಿಂದು ನೀನು ನೀಡುವೆ ನಾನು
ಬೇಡಿದೆಲ್ಲವನು ಅಂದು ನೀಡಲಿಲ್ಲ ನೀನು
ಬೇಡು ಎಲ್ಲವನು ಇಂದು ನೀಡುವೆನು ನಾನು!
– ಪೆದ್ದರಿಚ್ಚ