ನಮ್ಮ ಜೀವದ ಮೂಲ ತಾಯಿ
ಆಕೆಯ ಮೇಲೆ ನಮಗೆ ಪ್ರೀತಿ ಜಾಸ್ತಿ
ನದಿಯ ಮೂಲ ಅದರ ಝರಿ
ಅಲ್ಲಿ ನೀರಿಗೆ ಸಿಹಿ ಜಾಸ್ತಿ
ಹಣ್ಣಿಗೆ ಮೂಲ ಅದರ ಸಸಿ
ಅಲ್ಲೇ ಬಲಿತ ಕಾಯಿಗೆ ರುಚಿ ಜಾಸ್ತಿ
ಸಕಲಕೂ ಮೂಲ ದೇವನ ಸೃಷ್ಟಿ
ಆಗಬೇಕಾತ ನಮ್ಮ ನಿಮ್ಮೆಲ್ಲರ ಆಸ್ಥಿ
ಮೂಲವನ್ನರಸಿ
ಮೇಲೆರಲು ಬಯಸುವ ನೀನು
ಏಣಿಯಲ್ಲಿ ನೇತಾಡಬೇಡ ಪೆದ್ದರಿಚ್ಚ!

ಕಸ ಊರ ಹೊರಗೆ
ಊರು ಸುಂದರ ಒಳಗೆ
ಕಸದ ತೊಟ್ಟಿ ಮೂಲೆಗೆ
ಸೊಬಗು ಪೂರಾ ಮನೆಗೆ
ನಿನ ಬಾಳ ಕಸ
ಮೂಲೆಯಲ್ಲಿರಬೇಕೆ ಹೊರತು
ನಿನ್ನ ಹೃದಯದಲ್ಲಿಯಲ್ಲ ಪೆದ್ದರಿಚ್ಚ!

ನಾನೇನಾಗಿದ್ದೇನೆ ಎನ್ನುವುದಕ್ಕಿಂತ
ನಾನೇನಾಗಿಲ್ಲ ಎನ್ನುವ ಕೊರಗು
ನನಲ್ಲೇನಿದೆ ಎನ್ನುವುದಕ್ಕಿಂತ
ನನ್ನಲ್ಲೇನಿಲ್ಲ ಎನ್ನುವ ಗೊಣಗು
ಎಲ್ಲರೂ ಆ ಪರಮಾತ್ಮನ
ಹೂಬನದಲಿ ಅರಳುವ ಸುಂದರ ಹೂಗಳು
ನಮ್ಮ ನಮ್ಮ ಕಂಪನ್ನು ಬೀರಿ
ನಮ್ಮ ತನವನ್ನು ಸಾರುವುದರಲ್ಲಿದೆ
ನಮ್ಮ ಜೀವನದ ಸಾರ ಪೆದ್ದರಿಚ್ಚ!

ಒಳಿತು ನಮ್ಮನ್ನು
ಯಾವಾಗಲೂ ಕಾಯಿಸುತ್ತದೆ
ಸಿಗುವ ಮೊದಲು
ಅದಕ್ಕಾಗಿ ನಮ್ಮನ್ನು ಕಾಯಿಸುತ್ತದೆ
ಸಿಕ್ಕ ನಂತರ
ಅದು ನಮ್ಮನ್ನು ಕಾಯಿಸುತ್ತದೆ
ಒಮ್ಮೆ ಉನ್ಮಾದ
ಇನ್ನೊಮ್ಮೆ ಹರ್ಷೋನ್ಮಾದ
– ಪೆದ್ದ ರಿಚ್ಚ

ಬನ್ನಿ ದೇವಾಲಯವನ್ನು ಕಟ್ಟೋಣ!!!!!
ಎಲ್ಲೂ ಕಾಣದ ದೇವರು
ಕೊನೆಗೂ ಸಿಕ್ಕಿದ್ದಾರೆ ಇಂದು
ಬನ್ನಿ ದೇವಾಲಯವನ್ನು ಕಟ್ಟೋಣ!!!
ತರಬೇಡಿ ಮಣ್ಣು, ಇಟ್ಟಿಗೆ
ಉಪಕಾರಕ್ಕೆ ಬಾರದು ನಮಗೆ
ಬೇಡ ಕಬ್ಬಿಣ, ಮರಳು, ಜಲ್ಲಿ, ಕಲ್ಲು ನಿಮ್ಮೊಟ್ಟಿಗೆ
ಅದರಿಂದಾಗದು ಸುಂದರ ಆಲಯ ನಮ್ಮ ದೇವನಿಗೆ
ಆದರೆ ಬನ್ನಿ ದೇವಾಲಯವನ್ನು ಕಟ್ಟೋಣ!!!

ಸುಖ, ಸಂಪತ್ತಿನ ಹೊಳೆಯಲ್ಲಿ
ಮೈಮರೆತಿರುವ ನನ್ನ ಮಿತ್ರರೇ,
ಬಡತನದಲ್ಲಿ ನರಳಿ ನಜ್ಜಾಗಿರುವ
ಆ ದೇವನನ್ನು ಕಾಣೋಣ
ಆ ದೇವನಿಗೊಂದು ಹೌದು…
ಬನ್ನಿ ದೇವಾಲಯವನ್ನು ಕಟ್ಟೋಣ!!!

ತಂಪಾದ ಹವಾ ನಿಯಂತ್ರಿತ ಕಟ್ಟಡಗಳಲ್ಲಿ
ಶ್ರಮಿಸುವ ನನ್ನ ಸೋದರರೇ
ಸುಡುವ ಬಿಸಿಲಲಿ ಬೆವರ ಸುರಿಸುವ
ಆ ದೇವನನು ನೋಡೋಣ
ಆ ದೇವನಿಗೊಂದು ಹೌದು…
ಬನ್ನಿ ದೇವಾಲಯವನ್ನು ಕಟ್ಟೋಣ!!!

ಗಗನ ಚುಂಬಿಸುವ ಆಸ್ಪತ್ರೆಗಳ ಕಟ್ಟಿ
ನಿಶ್ಚಿಂತೆಯಿಂದಿರುವ ಬಂಧುಗಳೇ
ಹಾಸಿಗೆಯನ್ನೇ ಮನೆಮಾಡಿಕೊಂಡಿರುವ
ಆ ದೇವನನು ಸಂಧಿಸೋಣ
ಆ ದೇವನಿಗೊಂದು ಹೌದು…
ಬನ್ನಿ ದೇವಾಲಯವನ್ನು ಕಟ್ಟೋಣ!!!

ರಂಗು ರಂಗಿನ ಮೋಜಿನ ಮತ್ತಿನಲ್ಲಿ
ಮೆರೆಯುತ್ತಿರುವ ನನ್ನ ಗೆಳೆಯರೇ
ಬಾಳ ಬೇಗೆಯಲಿ ಸೋತು ನಿರಾಶನಾಗಿರುವ
ಆ ದೇವನನು ಬೇಟಿ ಮಾಡೋಣ
ಆ ದೇವನಿಗೆ ಹೌದು…
ಬನ್ನಿ ದೇವಾಲಯವನ್ನು ಕಟ್ಟೋಣ!!!

ವಿಧ ವಿಧದ ಡಿಗ್ರಿಗಳನ್ನೊತ್ತ
ನನ್ನ ಬುದ್ದಿವಂತ ಸ್ನೇಹಿತರೇ,
ಮನಸಿದ್ದರೂ ಕಲಿಯಲಾಗದ
ಆ ದೇವನನು ನೋಡೋಣ
ಆ ದೇವನಿಗೊಂದು ಹೌದು…
ಬನ್ನಿ ದೇವಾಲಯವನ್ನು ಕಟ್ಟೋಣ!!!

ಬರ್ಗರ್ ಪೀಜ಼ಾಗಳನ್ನು
ಚಪ್ಪರಿಸುತ್ತಿರುವ ನನ್ನ ಸಹಪಾಠಿಗಳೇ
ಒಂದೊತ್ತಿನ ರೊಟ್ಟಿಗಾಗಿ ಹಸಿದಿರುವ
ಆ ದೇವನತ್ತಾ ಧಾವಿಸೋಣ
ಆ ದೇವನಿಗೊಂದು ಹೌದು…
ಬನ್ನಿ ದೇವಾಲಯವನ್ನು ಕಟ್ಟೋಣ!!!

ಸಹಸ್ರ ಆಪ್‌ಗಳ ಒಡನಾಟದಲ್ಲಿ
ಮೊಬೈಲ್‌ನಲ್ಲಿ ಸೆರೆಯಾಗಿರುವವರೇ
ಪ್ರೀತಿಯ ಒಂದು ಮಾತಿಗಾಗಿ ಹಂಬಲಿಸುತ್ತಿರುವ
ಆ ದೇವನಲಿ ಮಾತನಾಡೋಣ
ಆ ದೇವನಿಗೊಂದು ಹೌದು…
ಬನ್ನಿ ದೇವಾಲಯವನ್ನು ಕಟ್ಟೋಣ!!!

ಮುದ ನೀಡುವ ಮಾತುಗಳನ್ನು
ಬೋಧಿಸುವ ಮಹಾ ಬೋಧಕರೇ
ಮಮತೆ ಪ್ರೀತಿಯ ನೆರವಿಗೆ ಕಾದಿರುವ
ಆ ದೇವನನು ಮುಟ್ಟೋಣ
ಆ ದೇವನಿಗೊಂದು ಹೌದು…
ಬನ್ನಿ ದೇವಾಲಯವನ್ನು ಕಟ್ಟೋಣ!!!

ಮನ ಮನಗಳಲ್ಲಿ ಅಡಗಿರುವ ದೇವನಿಗೆ
ಆಲಯವೊಂದನ್ನು ಕಟ್ಟೋಣ
ಈ ದೇವಾಲಯಗಳಲ್ಲಿ
ನಸುನಗುವ ದೇವರೇ
ಇಟ್ಟಿಗೆ ಕಲ್ಲು, ಮಣ್ಣನು
ಕಟ್ಟಲು ತರುವರು
ನಾವು ಬಯಸುವ ದೇವಾಲಯಕೆ!
ಈ ದೇವರು ಇವೆಲ್ಲವನ್ನು ತರದೆ
ನೀನು ನಾನು ಕಟ್ಟುವ
ಕಲ್ಲು ಮಣ್ಣಿನ ಆಲಯ
ಎಷ್ಟು ದಿನ ನಿಲ್ಲುವುದು
ಪೆದ್ದರಿಚ್ಚ?

ಸುಳ್ಳಿನ ಆರ್ಭಟದಲಿ
ಸತ್ಯದ ಪಾಠ ಕೇಳಿಸದು
ಸುಳ್ಳಿನ ರಾಶಿಯಲಿ
ಸತ್ಯದ ಕಣವು ಕಾಣದು
ಸುಳ್ಳಿನ ಕೀರಿನೆದುರು
ಸತ್ಯದ ಜೇನು ಹಿಡಿಸದು
ಸುಳ್ಳಿನ ಸುಗಂಧದ ನಡುವೆ
ಸತ್ಯದ ಪರಿಮಳ ಸೂಸದು
ಸುಳ್ಳಿನ ಬಿರುಗಾಳಿಯಲಿ
ಸತ್ಯದ ತಂಗಾಳಿ ಸ್ಪರ್ಶಿಸದು
ಹಾಲಿಗಿಂತ ಆಲ್ಕೋಹಾಲಿಗೆ
ಬೆಲೆ ಜಾಸ್ತಿ ಪೆದ್ದರಿಚ್ಚ!

ಊಸರವಳ್ಳಿಯ ಬಣ್ಣವ ಬಲ್ಲವರಾರು
ಹರಿವ ನೀರನು ಮತ್ತೇ ಸಂಧಿಸುವವರಾರು
ಕತ್ತಲೆಯನ್ನು ಬೆಳಕನ್ನು ಜೊತೆಗೆ
ಹಿಡಿದಿಡುವರಾರು
ಬದಲಾಗುವ ನೀನು
ಬದಲಾಗುವ ವಸ್ತುಗಳನ್ನರಸಿ
ಮುಗ್ಗರಿಸುವ ಬದಲು
ಬದಲಾಗದ
ಸ್ಥಿರ ಅಮರ ವಿಷಯಗಳಲ್ಲಿ
ಸ್ಥಿರವಾಗಲಾರೆಯೇಕೆ ಪೆದ್ದರಿಚ್ಚ!

ಭಿಕ್ಷುಕರು ನಾವೆಲ್ಲಾ
ಇದಕ್ಕಾರೂ ಹೊರತಲ್ಲ!

ಭಿಕ್ಷಾಟಣೆ ಆರಂಭ ದೇವನಲಿ
ದಿನದ ಬಿಕ್ಷೆ ಪಡೆದಾಕ್ಷಣ ಮುಂಜಾನೆಯಲಿ
ಒಳ್ಳೆಯ ದಿನಕ್ಕಾಗಿ
ಧನ ಬಲಕ್ಕಾಗಿ
ವರ ಪ್ರಾಣಕ್ಕಾಗಿ
ತನು ತ್ರಾಣಕ್ಕಾಗಿ
ಒಂದಿಷ್ಟು ಸ್ವಾರ್ಥಕ್ಕಾಗಿ
ಸ್ವಲ್ಪ ಸ್ಥಾನಮಾನಕ್ಕಾಗಿ

ಮಂಚ ತೊರೆದಾಕ್ಷಣ
ಲೋಟ ಕಾಫಿಗಾಗಿ
ತುತ್ತು ತಿಂಡಿಗಾಗಿ
ಸಿಹಿ ನಗುವಿಗಾಗಿ
ಹೊರಡುವ ಮುನ್ನ
ಒಂದು ಸವಿ ನುಡಿಗಾಗಿ

ಟ್ಯಾಕ್ಸಿಯಲ್ಲೋ ರಿಕ್ಷಾದಲ್ಲೋ
ಒಂದು ರುಪಾಯಿ ರಿಯಾಯಿತಿಗಾಗಿ
ಕಂಪೆನಿಯಲ್ಲಿ ಶಾಂತಿಗಾಗಿ
ಪರಿಶುದ್ದ ಸ್ನೇಹಕ್ಕಾಗಿ
ಸಲಹೆ ನೆರವಿಗಾಗಿ
ಕ್ಯಾಂಟಿನ್‌ನಲ್ಲಿ ರುಚಿ ಊಟಕ್ಕಾಗಿ
ಮಾರ್ಕೆಟ್‌ನಲ್ಲಿ ಶುಚಿ ಬೆಳೆಗಾಗಿ
ಸಂಜೆ ಸ್ವಲ್ಪ ರಜೆಗಾಗಿ
ಸ್ನೇಹಿತರಲ್ಲಿ ಮಜೆಗಾಗಿ

ಮರಳಿ ಮನೆಗೆ
ಸವಿ ಕ್ಷಣಕ್ಕಾಗಿ
ಬಾಳ ಸಿಹಿಗಾಗಿ
ಸ್ವಲ್ಪ ಪ್ರೀತಿಗಾಗಿ
ಒಂದು ಮುತ್ತಿಗಾಗಿ
ಮತ್ತೇ ದೇವನಲಿ
ಸರ್ವ ರಕ್ಷೆಗಾಗಿ
ಸಿಹಿ ನಿದ್ದೆಗಾಗಿ

ಹೋಗಾಚೆ ಭಿಕಾರಿ
ಎನ್ನುವ ಮೊದಲು
ಅರಿ ನಿನ್ನ ಜೀವನದ ಪರಿ
ಭಿಕ್ಷುಕರು ನಾವೆಲ್ಲಾ
ಇದಕ್ಕಾರೂ ಹೊರತಲ್ಲ!
-ಪೆದ್ದ ರಿಚ್ಚ

ಅಮ್ಮಾ ಭಿಕ್ಷೆ ನೀಡಿ
ಹಸಿದಿರುವೆನು ನಾನು!
ತುತ್ತು ಪ್ರೀತಿಗಾಗಿ
ಒಂದಿಷ್ಟು ಮಮತೆಗಾಗಿ
ಕಾದಿರುವೆನು ನಾನು
ಅಮ್ಮಾ ಭಿಕ್ಷೆ ನೀಡಿ
ಹಸಿದಿರುವೆನು ನಾನು!

-ಪೆದ್ದರಿಚ್ಚ

ಮೀಸಲಾತಿಗಾಗಿ ಸತ್ಯಾಗ್ರಹ ಮಾಡುತ್ತಿರುವುದನ್ನು ಓದಿ
ಬಸ್ಸಿನಲ್ಲಿ
ಮೀಸಲಾತಿ
ಸ್ತ್ರೀಯರಿಗೆ
ಮಕ್ಕಳಿಗೆ
ಹಿರಿಯರಿಗೆ
ಕಿರಿಯರಿಗೆ
ಅಂಗವಿಕಲರಿಗೆ
ಸ್ವಾತಂತ್ರ್ಯ ಹೋರಾಟಗಾರರಿಗೆ
ಕನ್ನಡರಿಗೆ
ತಮಿಳಿಗರಿಗೆ
ಮಲಯಾಳಿಗಳಿಗೆ
ಉತ್ತರದವರಿಗೆ
ದಕ್ಷಿಣದವರಿಗೆ
ಬಿಳಿಯರಿಗೆ
ಕರಿಯರಿಗೆ
ಹೀಗೆ ಒಂದು ದಿನ
ಡ್ರೈವರ್
ತನಗೆ ಸೀಟು ಸಿಗದೆ ಮನೆಗೆ ಹೋದ!!!