ಜಗದ ದೊಡ್ಡ ಪಾತ್ರೆಯಲಿ
ಭರಿಸಿಹನು ಬಾಳ ಪಾನ
ಸಿಹಿಯಾಗಲಿ ಕಹಿಯಾಗಲಿ
ಕುಡಿಯಬೇಕು ಅನುದಿನ

ನಿನ್ನ ಪಾತ್ರೆಯಲಿರುವ ಪಾನ
ನೋಡಬೇಕು ಪ್ರತಿ ದಿನ
ಕುಡಿಯಬೇಕು ಉಗಿಯಲಾರೆ
ಮುಗಿಸಬೇಕು ಒಂದಿನ.

ಹೆದರಬೇಡ ಇಣುಕಿ ನೋಡು
ಪಾನವಿರುವ ಬಟ್ಟಲು
ನಡುಗಬೇಡ ಮನಸ್ಸು ಮಾಡು
ಎತ್ತಿ ಹಿಡಿದು ಕುಡಿಯಲು

ನೆರವು ಸಿಗದು ಹೊರಗಿನಿಂದ
ಅರಿಯೋ ಬೇಗ ಮಾನವ
ನಿನ್ನ ಹೊರತು ಕುಡಿಯರಾರು
ತುಂಬಿರುವ ಪಾನವ

ಒಂದೇ ಒಂದು ಗುಟುಕಿನಲಿ
ಮುಗಿಸಲಾರೆ ಪಾನವ
ಸ್ವಲ್ಪ ಸ್ವಲ್ಪ ಹೀರಬೇಕು
ಸವಿಯಬಲ್ಲೆ ಸಾರವ
– ಪೆದ್ದರಿಚ್ಚ

ಬೆತ್ತಲಾಗಿ ಬಂದ ನೀನು
ಬೆತ್ತಲಾಗಿ ಹೋಗುವೆ
ಎಷ್ಟು ಇದ್ದರೇನು ಬಂತು
ಎಲ್ಲಾ ಬಿಟ್ಟು ಸಾಗುವೆ!

ಕೂಡಿ ಇಟ್ಟ ಯಾವುದು
ನಿನ್ನ ಜೊತೆಗೆ ಬಾರದು
ನಿನ್ನ ಘಳಿಗೆ ಯಾವುದು
ಮೊದಲೇ ನಿನಗೆ ತಿಳಿಯದು!

ಇಹುದು ಅಲ್ಲಿ ನಿನ್ನ ಮನೆ
ಹೋಗಬೇಕು ಮೆಲ್ಲನೆ
ಇರುವೆ ಇಲ್ಲಿ ಸುಮ್ಮನೆ
ತಿಳಿಯಬೇಕು ಬೇಗನೆ!

ಇಂಗು ತಿಂದ ಮಂಗನಂತೆ
ಹೋಗಬೇಡ ಸುಮ್ಮನೆ
ನಿನ್ನ ಬಾಳ ಪಯಣದಲ್ಲಿ
ಕಟ್ಟು ಪ್ರೀತಿ ಅರಮನೆ!

-ಪೆದ್ದರಿಚ್ಚ

ಬೇಕೇ ಬೆಳಕು ಮನೆಯಲಿ
ದೀಪ ಬೆಳಗುತಿರಲಿ
ಬೇಕೇ ಶಾಂತಿ ಮನದಲಿ
ಪ್ರೀತಿ ಹರಿಯುತಿರಲಿ!

ಮನದಿ ಭಯವು ಏಕೆ ನಿನಗೆ
ದೇವನೆದುರು ನಿಲ್ಲಲು
ಆತನುಸಿರೆ ಇಹುದು ನಿನಲಿ
ಗರೆಯಾಗೆದರಿ ಗೆಲ್ಲಲು!

ಮರೆಯಬೇಡ ಮನದಿ ಇಡಲು
ನಂಬಿಕೆಯ ದೀವಿಗೆ
ತೊರೆಯಬೇಡ ಪ್ರೀತಿ ಕಡಲು
ನಿತ್ಯಜೀವ ಬಾಳಿಗೆ!
-ಪೆದ್ದರಿಚ್ಚ

ಜಗಕ್ಕೆಲ್ಲಾ ಒಡೆಯನವನು
ನಾನು ನೀವೂ ಸೇವಕರು
ಸೃಷ್ಟಿಯೆಲ್ಲಾ ಅವನದೇ
ನಾವು ಅವನ ದಾಸರು

ಏನು ಇಲ್ಲಾ ನಮ್ಮದಿಲ್ಲಿ
ಮೂರು ದಿನದ ಬಾಳಲಿ
ಆತನೊಲವ ಅರಿವುದೇ
ಗುರಿಯೂ ಈ ಜಗದಲಿ

ಧನಿಯ ಭವ್ಯ ಹೃದಯದಿ
ಕಟ್ಟು ನಿನ್ನ ಅರಮನೆ
ಅರಿತು ಅವನ ಯೋಚನೆ
ಮಾಡು ದಿವ್ಯ ಯೋಜನೆ

ಜಗದ ಅರಸ ದೇವನ
ಸೇವೆ ಮಾಡು ಅನುದಿನ
ಸವಿದು ದಿವ್ಯ ತೇಜನ
ಪಡೆವೆ ಬಾಳ ಸಾಂತ್ವನ
-ಪೆದ್ದರಿಚ್ಚ

ಹೊಗೆಯು ಮೇಲೆ ಹಾರುತಿದೆ
ಎಲ್ಲೋ ಬೆಂಕಿ ಬಿದ್ದಿದೆ
ಉರಿವ ಚಿತೆಯು ಏರುತಿದೆ
ಸುಡುತಾ ಏನೂ ಬಿಡದೆ

ಹೊಗೆಯ ಅರಸಿ ಸಾಗಿದೆ
ಚಿತೆಯ ಛಾಯೆ ಕಾಣದು
ಬೆಂಕಿ ಕಿಡಿಯ ಹುಡುಕಿದೆ
ಅದರ ಉರಿತ ತಾಳದೆ

ಬೆಂಕಿ ಹಚ್ಚಿ ನಗುವರು
ನಾಶ ನೋಡಿ ನಲಿವರು
ಉರಿವ ಚಿತೆಯು ಅವರನ್ನೊಮ್ಮೆ
ಸುಡುವುದೆಂದು ಮರೆವರು

ನಾಶ ಮಾಡ್ವ ಕಿಡಿಯನು
ಹಚ್ಚಿ ಏಕೆ ಮೆರೆಯುವೆ
ಪ್ರೀತಿ ಕಿಡಿಯ ಹೊತ್ತಿಸಿ
ಬಾಳು ನಿರುತ ಬೆಚ್ಚನೆ
-ಪೆದ್ದರಿಚ್ಚ

ಆಗಸದೆತ್ತರಕೆ ಹಾರುವನು
ಸಾಗರದಾಳಕೆ ಇಳಿಯುವನು
ಚಂದ್ರನ ನೆಲದಿ ಇರಿಸಿಯು ಕಾಲನು
ಹೃದಯವ ಅರಿಯಲು ಸೋತಿಹನು

ಹೂವಿನ ನಗುವನು ಸವಿಯುತಲಿ
ರಚಿಸಿದ ದೇವನ ಅನುಭವಿಸು
ಜೀವದ ಉಸಿರನು ಪಡೆಯುತಲಿ
ಸೃಜಿಸುವ ದೇವಗೆ ಹಂಬಲಿಸು.

ದೇವನ ಅರಿಯದ ಸಾತ್ವಿಕ ಬಾಳು
ರುಚಿಯೇ ಇಲ್ಲದ ಪಾನಕವು
ಪ್ರೀತಿಯ ನೀಡದ ಭಕ್ತನ ಬಾಳು
ಫಲವನು ತಿಳಿಯದ ಕಾಯಕವು…
-ಪೆದ್ದರಿಚ್ಚ

ಒಬ್ಬರು ಮತ್ತೊಬ್ಬರಿಗಿಂತ ಉತ್ತಮರಲ್ಲ
ದೇವರ ಮಕ್ಕಳು ನಾವು
ಸೋದರ ಸೋದರಿಯರು.
ಒಬ್ಬರು ಮತ್ತೊಬ್ಬರಿಗಿಂತ ಅಲ್ಪರಲ್ಲ
ದೇವರ ರೂಪ ನಾವು
ಆತನ ಭವ್ಯ ಸೃಷ್ಟಿಗಳು.

ಒಬ್ಬರು ಮತ್ತೊಬ್ಬರಿಗೆ ವೈರಿಗಳಲ್ಲ
ಬುದ್ದಿವಂತ ಮೂಡರು ನಾವು
ಕಲಿಯಲಾಗದ ಹಠಮಾರಿಗಳು.
ಒಬ್ಬರು ಮತ್ತೊಬ್ಬರಿಗೆ
ಅಧೀನರಲ್ಲ
ಒಂದೇ ಅರಸನ ಮಕ್ಕಳು ನಾವು
ಅದೃಷ್ಟವಂತ ರಾಜಕುವರರು.

ಒಬ್ಬರು ಮತ್ತೊಬ್ಬರಿಗೆ ಮೇಲಲ್ಲ
ಕೆಂಪು ರಕ್ತದ ಜೀವಿಗಳು ನಾವು
ಉಸಿರಾಡುವ ಹುಲು ಮಾನವರು.
ಒಬ್ಬರು ಮತ್ತೊಬ್ಬರಿಗೆ ಕೀಳಲ್ಲ
ದೇಹ ಆತ್ಮದ ಸಂಘ ನಾವು
ಆ ದೇವನ ಸರಿಸಮ ಪ್ರತಿಗಳು.

ಈ ಅರಸನ ಅರಮನೆಯಲಿ
ರಾಜಕುವರನಾಗಿ ಬಾಳುವ ಬದಲು
ದಾಸನ ಮಗನಂತೆ ಏಕೆ ಬಾಳುವೆ ಪೆದ್ದರಿಚ್ಚ?

ಬಡವನ ಮನೆಗೆ ಬೆಂಕಿ ಬಿತ್ತು
ಬೆಂಕಿಯ ಹೊಗೆಗೂ ಬಡತನ…
ಹಾರಲಿಲ್ಲ ಜಾಸ್ತಿ ಮೇಲೆ.
ಬೆಂಕಿಯ ಕಾವಿಗೆ ಕುರುಡರಾದರು
ಅಲ್ಲಿ ನೆರೆದವರೆಲ್ಲರೂ…
ಕಣ್ಣಿಂದ ಕಾಣಲಾಗದೆ
ಛಾಯಾಗ್ರಾಹಕ ಕ್ಯಾಮೆರದಲಿ ಚಿತ್ರ ಹಿಡಿದ
ಕವಿ ತನ್ನ ಮನೆಯೊಳಗೆ ಕುಳಿತು ಕವಿತೆ ಬರೆದ.
ಸಂಗೀತಗಾರನೊಬ್ಬ ಪದಗಳಿಗೆ ರಾಗ ತುಂಬಿದ.
ಗಾಯಕನೊಬ್ಬ ಮನ ಕಲಕುವಂತೆ ಹಾಡಲು ಕಲಿತ.
ಕಲೆಗಾರನೊಬ್ಬ ಬೆಂಕಿಯ ಅಂದದ ಚಿತ್ರ ಬರೆದ.
ಪತ್ರಕರ್ತ ಸತ್ಯತೆಯ ವರದಿಯನ್ನೊಂದ ಬರೆದ.
ಓಟಗಾರ ಮ್ಯಾರಥಾನ್ ಓಡಲು ಯೋಚಿಸಿದ.
ಸೋಡಾ ಬುಟ್ಟಿ ಅಜ್ಜಿ ಅಯ್ಯೋ ಅಂದಳು
ಕುರುಡು ಜನರ ತಾತ್ಸಾರದ ಬೆಂಕಿಯಲಿ
ಕುರುಡು ಬೆಂಕಿ ಬಡವನ ಸುಟ್ಟಿತು!
-ಪೆದ್ದರಿಚ್ಚ

ಕತ್ತೆಯ ರೀತಿ ದುಡಿಯಬೇಡ
ಎನ್ನುವ ಮಾನವ
ಕತ್ತೆಗಿಂತ ಜಾಸ್ತಿ ದುಡಿಯುತ್ತಿದ್ದಾನೆ…
ಮಾನವನಂತೆ ದುಡಿಯಬೇಡ
ಎನ್ನುತ್ತಿವೆ ಇಂದು
ಚುಚುತ್ತಾ ಕತ್ತೆಗಳು…
ರಜಾ ಮಾಡದೇ
ಕೆಲಸ ಮಾಡುವುದೇಕೆ?
ಅನುಭವಿಸದೇ
ಬೆವರ ಸುರಿಸುವುದೇಕೆ?
ನಿನ್ನ ಕೆಲಸದಿಂದ
ನಿನಗೆ ಹಣ ಮಾತ್ರ ದೊರಕಿದರೆ
ನಿನ್ನ ಬಾಳು ವ್ಯರ್ಥ ಪೆದ್ದರಿಚ್ಚ!

ಕೋಗಿಲೆ ಒಮ್ಮೆ ಕೂಗಿತು
ಅದು ಸಂಗೀತವಾಯಿತು
ನವಿಲು ಒಮ್ಮೆ ಗರಿ ಕೆದರಿತು
ಅದು ನಾಟ್ಯವಾಯಿತು
ಮೋಡದಿಂದ ಹನಿ ಸುರಿಯಿತು
ಅದು ಸಾಗರವಾಯಿತು
ಸಸಿಯಲಿ ತೆನೆ ಬೆಳೆಯಿತು
ಅದು ಹಸಿವ ನೀಗಿತು
ಬೀಜವೊಂದು ಮೊಳೆಯಿತು
ಅದು ಹೆಮ್ಮರವಾಗಿ ಬೆಳೆಯಿತು
ಕಲ್ಲೊಂದು ಮೂಲೆ ಸೇರಿತು
ಅದು ಗುಡಿಯಾಯಿತು
ತೊದಲು ನುಡಿ ಹೊರಹೊಮ್ಮಿತು
ಅದು ಕಾದಂಬರಿಯಾಯಿತು
ಯೋಚನೆಯ ಜನನವಾಯಿತು
ಅದು ಯೋಜನೆಯಾಯಿತು

ಕಿರಿದಾಗಿದ್ದು ಹಿರಿದಾಯಿತು
ಆ ದೇವನ ಮಹಿಮೆ ಹಾಡಿತು!
ದೇವನೊಲುಮೆಯೊಂದಿದ್ದರೆ
ನಿನ್ನ ಅಲ್ಪವೂ ಸ್ವಲ್ಪದರಲ್ಲೇ
ಆತನ ಸಂಕಲ್ಪದಲಿ
ವಿಲೀನವಾಗುವುದು
ಅದು ಅಳೆಯಲಾಗದಷ್ಟು
ಘನವಾಗುವುದು ಪೆದ್ದರಿಚ್ಚ!