ಮಾಡುವ ಕೆಲಸದಲ್ಲಿ ಪ್ರೀತಿಯಿದ್ದರೆ
ಸೋಲೂ ಗೆಲುವಾಗುತ್ತದೆ
ನಷ್ಟವೂ ಇಷ್ಟವಾಗುತ್ತದೆ.

ಮಗುವಿನಂತ ಮನಸ್ಸು ನಮ್ಮಲ್ಲಿದ್ದರೆ
ವಿಕಾರವು ಆಕಾರವಾಗುತ್ತದೆ
ಕುರೂಪವೂ ಸೌಂದರ್ಯವಾಗುತ್ತದೆ.

ಮಗುವಿನಂತಹ ಮನಸ್ಸಿರಲಿ
ಆ ಮನಸ್ಸಿನಲ್ಲಿ ಪ್ರೀತಿಯಿರಲಿ
ಆ ಪ್ರೀತಿಯಲಿ ತ್ಯಾಗವಿರಲಿ
ನೀನೂ ಮಗುವಿನಂತೆ ಸದಾ
ನಗುನಗುತಾ ಇರುವೆ ಪೆದ್ದರಿಚ್ಚ!

ಮನದಾಳದ ಅಂಗಳದಲಿ
ಬೆಳಗುವ ಕುಡಿ ದೀಪ
ಕತ್ತಲೆಯ ಬಡಿದೋಡಿಸುವ
ಉರಿಯಲಂಜದ ದೀಪ
ನನ ನೆರಳಂತೆ ನನ್ನೊಡನೆ
ನನ್ನಲ್ಲಿ ಮನೆಮಾಡಿ
ನನಗಾಗಿ ಎದುರಾಗುವ
ನನ ಇನ್ನೊಂದು ರೂಪ
ಸ್ನೇಹದ ಪ್ರೀತಿಯಲಿ
ಪ್ರೀತಿಯ ಸ್ನೇಹದಲಿ
ಒಂದಾಗಿ ಬೆಸೆದಿರುವ
ಮುದ ನೀಡುವ ತಾಪ

ಪ್ರತಿ ಉಸಿರಲ್ಲಿ ಉಸಿರಾಗಿ
ಬಾಳ ಬರಡಲ್ಲಿ ಹಸಿರಾಗಿ
ಭಯ ಬೀಳದೆ ಕರ ನೀಡೋ
ಕೊನೆಯರಿಯದ ಸೆಲೆಯು
ಕಣ್ಣ ನೀರ ಹನಿಗಳನು
ತನ್ನ ಕರದಲಿ ಸೆರೆಯಿಡಿದು
ಭಾರ ಹೊತ್ತ ಹೃದಯದಲಿ
ಬಲ ತುಂಬುವ ನೆಲೆಯು
ನಾ ಮರೆತರೂ ನನ್ನ ಮರೆಯದೆ
ನಾ ತೊರೆದರೂ ನನ್ನ ತೊರೆಯದೇ
ನಾ ಕಾಣಲು ಸೋತರೂ
ನನ ಕಂಡು ಕಾಯುವ
ನನ ರಕ್ಷಕ ದೂತನು!
ಹೆದರಲಾರೆ ಆತನ ಸ್ನೇಹವಿರಲು
ಅಂಜಲಾರೆ ಆತನು ಕಾಯುತಿರಲು!
-ಪೆದ್ದರಿಚ್ಚ

ಯಶಸ್ಸಿನ ಪಯಣದ ಆರಂಭ
ಇಡುವ ಮೊದಲ ಹೆಜ್ಜೆಯಲಿ
ಪಯಣದಲಿ ಕಾಣುವ ಉತ್ಸಾಹ
ಗುರಿಯ ಗೆಜ್ಜೆಯ ನಾದದಲಿ

ಅಭಿಮುಖನಾಗಿ ಗುರಿಯೆಡೆಗೆ
ಸೇರಿಸುತ ಹೆಜ್ಜೆಗಿನ್ನೊಂದು ಹೆಜ್ಜೆ
ಸಾಗು ನೀ ಮುಂದೆ ಮುಂದೆ
ಅಂಜದೆ ಅಳುಕದೆ ತೊರೆದು ಲಜ್ಜೆ

ಹೊಗಳು ಭಟ್ಟರ ಕೇಳಿ ಹಿಗ್ಗಬೇಡ
ಟೀಕೆ ಸುರಿಮಳೆಯಲಿ ಕುಗ್ಗಬೇಡ
ಕಾಲದಾರಿಯಲಿ ಮುಳ್ಳಿಗಂಜದೆ
ಬಿದ್ದರೂ ಎದ್ದು ಸಾಗು ಬಿಡಬೇಡ
– ಪೆದ್ದರಿಚ್ಚ

ಬೆಳೆ ಎಲ್ಲೆಡೆ ಹೇರಳ
ಕೊಯ್ಯುವವರು ವಿರಳ
ಕಳೆಯ ಸುಗ್ಗಿಯಲಿ
ಬೆಳೆಯ ತೂರುವ
ಜನ ಜಂಗುಳಿ ಬಹಳ

ಅರಳುವ ಸುಂದರ ಹೂವಿದೆ
ಸವಿಯುವ ಕಣ್ಣಿಲ್ಲ
ಬಲಿಯುವ ಸವಿಯ ಫಲವಿದೆ
ತಿನುವ ಹಸಿವಿಲ್ಲ
ಕೇಡಿನ ಕತ್ತಲಲಿ ಒಳಿತಿನ ಕಿರಣವ
ಕಾಣುವ ಮನವಿಲ್ಲ,
ಅರಿಯುವ ಛಲವಿಲ್ಲ!

ಪೆದ್ದರಿಚ್ಚಾ,
ಕಿರಣವೊಂದು ಸಾಕು
ಕತ್ತಲನ್ನು ಸರಿಸಲು
ನುಡಿಯೊಂದು ಸಾಕು
ಪ್ರೀತಿ ಮಳೆಯ ಹರಿಸಲು!
ಮೊದಲ ಹೆಜ್ಜೆಯ ಆರಂಭಕೆ
ಕಾದಿರುವುದು ಪ್ರತಿ ಕಾಲು
ಮೊದಲ ಹೆಜ್ಜೆ ನೀನಾಗುತಲೇ
ನಿನ್ನಿಂದೆ ಲಕ್ಷ ಹೆಜ್ಜೆಯ ಸಾಲು!

ತಪ್ಪು ಕೊನೆಯಲ್ಲ
ಅದು ಗೆಲುವಿಗೊಂದು ಹಾದಿ
ತಪ್ಪು ತಪ್ಪಲ್ಲ
ಸರಿ ದಿಕ್ಕಿಗೊಂದು ನಾಂದಿ

ತಪ್ಪಲ್ಲ ತಂಗುದಾಣ
ತಪ್ಪಲ್ಲ ಶುದ್ಧ ತಾಣ
ಕಲಿಯುತಿರೂ ಪ್ರತೀ ಕ್ಷಣ
ಬಿಡುವವರೆಗೂ ನಿನ್ನ ಪ್ರಾಣ

ತಪ್ಪಾಗಿದ್ದರೆ ಅಂಬೆಗಾಲು
ನಡೆವರೆಷ್ಟು ಜನ ಹೇಳು!
ತಪ್ಪಾಗಿದ್ದರೆ ಗೀಚಿದ ಸಾಲು
ಬರೆವರೆಷ್ಟು ಮಂದಿ ಕೇಳು!

ತಪ್ಪಾದರೂ ಸೋಲಬೇಡ
ಬಿದ್ದರೂ ಸೋಲೊಪ್ಪಬೇಡ!
ಬಿದ್ದವನು ಸೋತವನಲ್ಲ
ಎದ್ದೇಳದವನು ಸೋತವನು!
ತಪ್ಪಲ್ಲಿ ಬಿದ್ದರೂ
ಕ್ಷಮೆಯಲ್ಲಿ ಎದ್ದೇಳು ಪೆದ್ದರಿಚ್ಚ!

ಹರುಷಕ್ಕೆ ನೂರು ದಾರಿ
ಅದರಲ್ಲಿ ಎಷ್ಟು ಸರಿ?
ಸಾಧನೆಯ ಹರುಷ
ವಿದ್ಯಾರ್ಜನೆಯ ಹರುಷ
ಮನೆತನದ ಹರುಷ
ಸಿರಿತನದ ಹರುಷ
ಹಬ್ಬ ಆಚರಣೆಯ ಹರುಷ
ಗೆದ್ದ ಸಂಭ್ರಮದ ಹರುಷ

ಆಯಸ್ಸಿಲ್ಲ ಹೆಚ್ಚು ನಿನ್ನ ಹರುಷಕೆ
ಏರುವುದು ಬಲು ಬೇಗ ಅದು ಚಟ್ಟಕೆ
ವರುಷಗಳು ಬೇಕಾದರೆ ನಿನ್ನ ಹರುಷಕೆ
ಬಿಡಬೇಕು ತಳ್ಳುವುದನು ಇತರರ ಹಿಂದಕೆ

ಮುಂದೆ ಸಾಗುವುದಲ್ಲ ಹರುಷ
ಕೆಳಗೆ ತಳ್ಳುವುದಲ್ಲ ಹರುಷ
ಪರಮಾತ್ಮನ ಪ್ರೀತಿಯನ್ನು ಪ್ರತಿ ನಿಮಿಷ
ಅರಿತು ಬಾಳುವುದೇ ನಿಜ ಹರುಷ!
– ಪೆದ್ದರಿಚ್ಚ

ಮದುವೆ ಅಲ್ಲ ಕೇವಲ ಪದ
ಅದು ಬೆರೆತು ಬಾಳುವ ಸಂಬಂಧ
ಅಲ್ಲ ಯೌವನದ ಸ್ನೇಹಬಂಧ
ಅದು ಜೀವನದ ದೀರ್ಘ ಅನುಬಂಧ

ಗಂಡು ಹೆಣ್ಣಿನ ರಸಿಕತೆಯಲ್ಲ
ಅದು ದಿವ್ಯ ಪ್ರೇಮ ಪಯಣ
ಭಾವ ಮಿಶ್ರಿತ ಸೆಳೆತವಲ್ಲ
ಅದು ದಿಟ್ಟ ಹೃದಯಗಳ ಪಣ

ಬಂಧನ ಶಾಶ್ವತವಾದುದು
ಬಳಸಿ ಎಸೆವ ಬೂಟಲ್ಲ
ಕಥನ ಮುಗಿಸಲಾಗದ್ದು
ಸವಿದು ತೊರೆವ ಕಸವಲ್ಲ

ಮದುವೆ ಭವ್ಯವಾದುದು
ಬೆಳೆಯುತಿರಲಿ ಪ್ರೀತಿಯ ತೆನೆ
ಮದುವೆ ದಿವ್ಯವಾದುದು
ಅಲ್ಲ ಬೇಸರ ಭೂತದ ಮನೆ

-ಪೆದ್ದರಿಚ್ಚ

ಗೋಡೆಗಳು ನೂರು ಕಾಣುತ್ತಿಲ್ಲ ಯಾರು
ನೆರೆಯವನು ಇಲ್ಲವೋ ಏನೋ
ಹೇಳುವವರು ಯಾರು!

ನನ್ನ ಮನೆಯಲ್ಲಿಯೇ ನಾನು
ಜೀವಮಾನಕೆ ಸೆರೆಯಾಳು
ಅದಕೆ ನನ್ನ ನೆರೆಯವನು
ಕಾರಣ ಹೇಗೆ ಹೇಳು?

ಮನದ ಕತ್ತಲಲಿ ತೊಳಲಾಡುತಿಹೆ
ಪ್ರೇಮ ಬತ್ತಿಯ ಒಳಗೆ ಬೆಳಗದೆ
ಹೊರಬರಲಾಗದೆ ನರಲಾಡುತಿಹೆ
ನೆರವನು ಗೋಡೆಯಾಚೆಗೆ ಕಾಣದೆ!

ಗೋಡೆಗಳ ಕುಟ್ಟಿ ಕೆಡಹುವೆನು
ಕಾಣಲಾಚೆಗೆ ಜನರನು
ಎನ್ನ ಸೆರೆಯ ಕದವ ತೆರೆಯುವೆನು
ಚಾಚಿ ಕರದ ನೆರವನು!

ಎನ್ನ ಮನೆಯ ಬೆಳಕು ಪರನ
ಇರುಳ ತೆಗೆಯಬಲ್ಲದು
ಪರನ ಮೊಗದ ನಗುವು ಎನ್ನ
ಮನದ ನೋವ ಕಳೆವುದು!
-ಪೆದ್ದರಿಚ್ಚ

ಇರುವರು ಸೋದರಿಯರಿಬ್ಬರು
ಪ್ರೀತಿ ಸೇವೆ ಎಂಬುದವರ ಹೆಸರು
ಸೋದರಿಯರಾದರೂ ಅವರು
ಆಗಾಗವರಲಿ ಸಣ್ಣಪುಟ್ಟ ತಕರಾರು
ಒಬ್ಬಾಕೆ ಧ್ಯಾನದಲಿ ಮಗ್ನ
ಇನ್ನೊಬ್ಬಾಕೆ ಪೂಜೆಯಲಿ ತಲ್ಲೀನ
ಪ್ರೀತಿಗೆ ಸೇವೆ ಅಚ್ಚು ಮೆಚ್ಚು
ಸೇವೆಗಾದರೋ ಇನ್ನೊಬ್ಬಳಲಿ ಅಸೂಯೆಯ ಕಿಚ್ಚು!
ಇಬ್ಬರ ಒಲವು ಒಬ್ಬಾತನಿಗೆ
ಒಂದಾಗಲೂ ಆತನಲಿ ಕೊನೆಗೆ!
ಪ್ರೀತಿಗೆ ತನ್ನಿನಿಯ ಜೊತೆಗಿದ್ದರೆ ಸಾಕು
ಸೇವೆಗೆ ಪೂಜೆ ಪುರಸ್ಕಾರ ಬೇಕೆ ಬೇಕು!
ಪ್ರೀತಿ ಇನಿಯನ ಧ್ಯಾನದಲಿ ಸೇವೆ ಮಾಡುವಳು
ಸೇವೆ ಪೂಜೆಯ ಗುಂಗಿನಲಿ ಪ್ರೀತಿಸಲು ಸೋಲುವಳು!
ಇನಿಯನಾದರೋ ಸೇವೆಯ ಪೂಜೆಯಲಿ ತೃಪ್ತನು
ಆದರೆ ಪ್ರೀತಿಯ ಒಡನಾಟದಲಿ ನಲಿವನು!
ಪೆದ್ದರಿಚ್ಚ ಆ ಇನಿಯನನು ಕೇಳಲು
‘ನಿನಗೆ ಹೆಚ್ಚು ಇಷ್ಟ ಯಾರು?’
ಅದಕ್ಕಾತನ ಉತ್ತರ
‘ಪ್ರೀತಿ ಯಾರಲ್ಲಿ ಹೆಚ್ಚಿದೆ ಅವರು!’

ಕೋಗಿಲೆಯಂತೆ ಹಾಡಲು ಹರಸು
ಎಂದು ಮರದಲ್ಲಿ ಕುಳಿತು ಕಾಗೆಯು
ಮೀನಿನಂತೆ ಈಜಲು ಆಶೀರ್ವದಿಸು
ಎಂದು ಆಗಸದಲ್ಲಿ ಹಾರುತ್ತ ಹದ್ದು
ಹಕ್ಕಿಗಳಂತೆ ಹಾರುವಂತೆ ಮಾಡು
ಎಂದು ಸಾಗರದಲ್ಲಿ ಈಜುತ್ತಾ ಮೀನು
ಚಿರತೆಯಂತೆ ಓಡಲು ಶಕ್ತಿ ನೀಡು
ಎಂದು ಗೂಡಿನಲ್ಲಿ ಕುಳಿತ ಹುಂಜ
ಪ್ರಾರ್ಥನೆ ಮಾಡುತಿರಲು
ಅವುಗಳನು ಕಂಡ ಮಾನವ ನಕ್ಕ!
ಅದಕ್ಕವುಗಳು ‘ನಗುತಿರುವೆ ಏಕೆ?’ ಎನಲು
‘ನಿಮ್ಮ ಪ್ರಾರ್ಥನೆಗಳು ವಿಚಿತ್ರವಾಗಿವೆ
ಕರುಣಿಸುವ ದೇವರಿಗೂ
ಅವು ಅಸಾಧ್ಯವಾಗಿವೆ’
ಎಂದ ನಗು ತಾಳದ ಮಾನವ.
ಅದಕ್ಕವುಗಳು ಮತ್ತೊಮ್ಮೆ
‘ನಿನ್ನನ್ನು ನೋಡಿಯೇ ಕಲಿತಿದ್ದು
ಪ್ರಾರ್ಥಿಸಲು ನಾವು’