ಮಾಡುವುದೂ ಇಲ್ಲ
ಮಾಡ ಬಿಡುವುದೂ ಇಲ್ಲ
ಮಾಡುವರ ಕಾಲೆಳೆಯಲು
ಮರೆಯುವುದೂ ಇಲ್ಲ

ಒಳಿತಿಗೆ ಸಾಥ್ ಇಲ್ಲ
ಕೆಡುಕಿಗೆ ಬ್ರೇಕ್ ಇಲ್ಲ
ಕಾಲ್ಕೊಟ್ಟು ಬೀಳಿಸುವ
ಜನಕ್ಕೇನು ಬರವಿಲ್ಲ

ಒಳಿತಿಂದು ಇಷ್ಟವಿಲ್ಲ
ಕೆಡುಕೇನು ಕಷ್ಟವಲ್ಲ
ಕೆಡುಕೇ ಇಷ್ಟವಾಗಲು
ಒಳಿತಿಗಿಲ್ಲಿ ಸ್ಥಳವಿಲ್ಲ

ಬೆಳೆಗಿಲ್ಲಿ ಬೆಲೆಯಿಲ್ಲ
ಕಳೆಗಿಲ್ಲಿ ಸಾಲೆಲ್ಲ
ಕಳೆಯನ್ನೆ ಬೆಳೆಯೆನಲು
ಬೆಳೆಗಿಲ್ಲಿ ಬದುಕಿಲ್ಲ

ಒಳಿತಲ್ಲಿ ಕೆಡುಕಿಲ್ಲ
ಕೆಡುಕಲ್ಲಿ ಒಳಿತಿಲ್ಲ
ಕೆಡುಕನ್ನೇ ಬೆನ್ನಿಡಿವ
ಮನದಲ್ಲಿ ಗೆಲುವಿಲ್ಲ

ಕೆಡುಕಿನ ಆ ಕತ್ತಲಲಿ
ನೆಮ್ಮದಿಯ ಬಾಳಿಲ್ಲ
ಒಳಿತಿನ ಆ ಕಿಡಿಯಿರದೆ
ನಿನ ದಾರಿಗೆ ಈಡಿಲ್ಲ
-ಪೆದ್ದರಿಚ್ಚ

ಕಾಣದ ದೇವನ
ಹುಡುಕಿ ನಾ ಸಾಗಿದೆ
ಅರಿಯದೆ ಆತನ ಮಹಿಮೆಯನು
ತೆರೆದು ನಾ ಕಂಗಳ
ಹುಡುಕಲು ಆತನ
ಎಲ್ಲವೂ ಆತನ
ಚಿತ್ರಣವು!

ಹಕ್ಕಿಗೆ ಹಾರಲು
ಮೀನಿಗೆ ಈಜಲು
ಹಾವಿಗೆ ತೆವಳಲು
ಪ್ರಾಣಿಗೆ ಓಡಲು
ಕಲಿಸಿದನು

ಕೂಗಿಲೆಗೆ ಹಾಡ
ನವಿಲಿಗೆ ನಾಟ್ಯವ
ಚಿರತೆಗೆ ಓಟವ
ಜಿಂಕೆಗೆ ಜಿಗಿತವ
ಅರುಹಿಯನು

ತಾಯಿಯ ಸ್ಪರ್ಶವ ಮಗುವಿಗೆ
ಮಗುವಿನ ಅಳಲನು ತಾಯಿಗೆ
ಪ್ರೀತಿಯ ಬಡಿತವ ಪ್ರೇಮಿಗೆ
ಹೃದಯದ ನೋವನು ಮನುಜಗೆ
ತಿಳಿಸಿದನು

ಗಾಳಿಗೆ ದಿಕ್ಕನ್ನು
ನೀರಿಗೆ ಹರಿವನು
ರವಿಗೆ ಬೆಳಕನು
ಗಗನಕೆ ಸೊಭಗನು
ಭೂಮಿಗೆ ಸಿರಿಯನು ನೀಡಿಹನು

ಕಲ್ಲಲಿ ಶಿಲೆಯನು
ಮರದಲಿ ಕಲೆಯನು
ಇಳೆಯಲಿ ನಿಧಿಯನು
ಮನದಲಿ ಮುಧವನು ಇಟ್ಟಿಹನು

ಆನೆಗೆ ಶಕ್ತಿಯ
ಸರ್ಪಕೆ ಯುಕ್ತಿಯ
ಹೃದಯದಿ ಭಕ್ತಿಯ
ಹೂವಿಗೆ ಅಂದವ
ಸುರಿದಿಹನು

ನಿನ್ನಯ ಬಾಳ ಹಾದಿಯಲಿ
ಕಲ್ಲು ಮುಳ್ಳಿನ ದಾರಿಯಲಿ
ಕಾಣದ ದೇವನ
ಅರಿಯುತ ಸವಿಯುತ
ಬಾಳು ನೀ ನಿರುತವು
ಹರುಷದಲಿ

– ಪೆದ್ದ ರಿಚ್ಚ

ದೇವರಿಗೆ ಬೇಕು ದಯೆ
ನಿನ್ನ ಯಜ್ಞದ ಬಲಿಯಲ್ಲ
ದೇವರಿಗೆ ಬೇಕು ಪ್ರೀತಿ
ಬಲ್ಲ ತಜ್ಞನ ಅರಿವಲ್ಲ

ದಯೆ ಇಲ್ಲದ ಎಮ್ಮಯ ಕಂಗಳು
ದೃಷ್ಟಿ ಇದ್ದರೂ ಕುರುಡಂತೆ
ಪ್ರೀತಿ ಇಲ್ಲದ ಎಮ್ಮಯ ಹೃದಯವು
ಜೀವ ಇದ್ದರೂ ಬರಡಂತೆ

ಗೆಲುವಲಿ ತಟ್ಟುವ ಕೈಗಳಿಗಿಂತ
ಬಿದ್ದಾಗ ಎತ್ತುವ ಕರಗಳು ಲೇಸು
ಮುಚ್ಚಿದ ಮುಗಿಯುವ ಕರಗಳಿಗಿಂತ
ತೆರೆದ ಸೇವೆಯ ಕೈಗಳು ಲೇಸು

ದಯೆಯು ಸ್ವರ್ಗದ ಬಾಗಿಲನು
ತಟ್ಟಿ ತೆರೆವುದು ಖಚಿತ
ನಿನ್ನಯ ಹೃದಯದ ಬಾಗಿಲನು
ತೆರೆವುದು ನೀಡಲು ಉಚಿತ

ದಯೆಯು ನಿನ್ನಲಿ ಮರಳಿ ಬರುವುದು
ಕಾಣದ ಕೈಗಳ ನೆರವಿನಲಿ
ನಿನ್ನಯ ಮನದಲಿ ಅನುದಿನ ಬೆಳೆವುದು
ಶಾಂತಿ ಪ್ರೀತಿಯ ಚಿಗುರಿನಲಿ
– ಪೆದ್ದರಿಚ್ಚ

ಒಂದು ಸಾರಿಗೊಂದು ದಿನ
ಎನುವ ಬಾಳು ಪಾವನ
ಸಿಗದು ಮತ್ತೊಂದು ದಿನ
ಮೂರೇ ದಿನದ ಜೀವನ

ಕಲಿತರಷ್ಟೇ ಸಾಲದು
ಕಲಿಯಬೇಕು ಮರೆಯಲು
ಕಲಿತರೆಷ್ಟು ಸಾಲದು
ನಾಳೆಯನ್ನು ಅರಿಯಲು

ನಿನ್ನೆ ಇಲ್ಲ ಕರದಲಿ
ನಾಳೆ ಬರದು ಅರಿವಲಿ
ಇರುವ ಇಂದ ಮರೆತು ನೀನು
ಬಾಳ್ವೆ ಏಕೆ ಇಹದಲಿ

ಸುಡದೆ ನಿನ್ನ ನಿನ್ನೆಯ
ಬಾಳಲಾರೆ ನಾಳೆಯ
ನಿನ್ನೆ ನಾಳೆ ಮರೆತು ಬೇಗ
ಇಂದು ನೀನು ಬಾಳೆಯ

ನಿನ್ನೆಗಾಗಿ ಕೊರಗಿ ಕುಳಿತು
ನಾಳೆಯೆಂಬ ಭಯದಿ ಅವಿತು
ಬಾಳ ನಿನ್ನ ಗೆಲ್ಲಲಾರೆ
ಅರಿಯೋ ಪೆದ್ದ ಮಾನವ
– ಪೆದ್ದರಿಚ್ಚ!

ಕೈಯಲ್ಲಾಗಾದವ ಬಾಯಲ್ಲಾಡುವನು
ಸಹಿಸಲಾಗದವ ಟೀಕೆ ಮಾಡುವನು
ಮೂರ್ಖ ಮಾನವನು ಕಾಲನೆಳೆವನು
ತನ್ನ ಮಾತುಗಳ ಪೋಲು ಗೈವನು

ಮಾಡು ಟೀಕೆಯ ಕಲೆಯ ಬೆಳೆಸಲು
ದಾರಿ ತೋರಲು ಮೇಲೆ ಎತ್ತಲು
ಆಗ ಅರಿಯುವೆ ನಿನ್ನ ನುಡಿಗಳು
ಭವ್ಯ ಗುಡಿಗಳ ಕಟ್ಟಬಲ್ಲವು
-ಪೆದ್ದ ರಿಚ್ಚ

ಬಂದಾಗ ಧರೆಗೆ ಹೊತ್ತರು ನಿನ್ನ
ಬಿಡುವಾಗ ಧರೆಯ ಹೊರುವರು ನಿನ್ನ
ಹೊತ್ತವರು ಹೊರುವವರು
ನಿನ್ನ ಜೊತೆಯಲಿ ಇರುವಾಗ
ಹೊರೆ ನಿನ್ನ ಹೊರಲಾಗದೆ
ಹೊರೆಯಾಗುವೆ ಏಕೆ?

ಹೊರೆ ಭಾರವಲ್ಲ ನಂಬಿರುವ ಮನಕೆ
ಹೊರೆ ಹಗುರ ಇರಲಾತ ಎಂದೆದೂ ಜೊತೆಗೆ!
– ಪೆದ್ದ ರಿಚ್ಚ

ರೋಗಗಳು ಇವೆ ನೂರು
ನನ್ನಲಿ ಅವುಗಳ ಊರು

ಗುಣವಾಗುವ ರೋಗ,
ಗುಣವಾಗದ ರೋಗ
ಮದ್ದಿರುವ ರೋಗ,
ಮದ್ದಿರದ ರೋಗ
ತಾತ್ಕಾಲಿಕ ರೋಗ,
ತಕ್ಷಣದ ರೋಗ
ಸಾಂಕ್ರಮಿಕ ರೋಗ,
ಮಾರಕ ರೋಗ
ಎಲ್ಲಕ್ಕಿಂತ ಮಿಗಿಲಾದ ರೋಗ
ಅತೀ ಘೋರ ರೋಗ
ನಾ ರೋಗಿ ಎಂದು ಒಪ್ಪದ
ಮದ್ದಿಲ್ಲದ ರೋಗ

ತಿನ್ನೋ ಅನ್ನದಿ ಕಲ್ಲು ಹುಡುಕುವ
ಮಾಡೋ ಪ್ರೀತಿಲಿ ಸ್ವಾರ್ಥ ಅರಸುವ
ನೀಡೋ ಸೇವೆಲಿ ಅಪರ್ಥ ಕಾಣುವ
ಶುದ್ದ ಮನಸಲಿ ಕೊಳೆಯ ಕೆದಕುವ
ಇರುವ ಬೆಳಕಲಿ ಮೋಡ ಹುಡುಕುವ
ಬಾಳೋ ಸತ್ಯದಿ ಮೋಸ ಬಯಸುವ
ಉರಿವ ಜ್ವಾಲೆಗೆ ತುಪ್ಪ ಸುರಿಯುವ
ಚಿಗುರೋ ಹುರುಪಿಗೆ ನೀರ ಚೆಲ್ಲುವ
ಒಳಿತ ಅರಿಯದೆ ಟೀಕೆ ಮಾಡುವ
ಬೆನ್ನು ತಿವಿಯಲು ಹಲ್ಲು ಕಡಿಯುವ
ನೆರವ ನೀಡದೆ ಹಿಂದೆ ಸರಿಯುವ
ಸಾಧು ಸಂತರ ಕಾಲ ಎಳೆಯುವ
ಈ ರೋಗ ಕಾಣದು ಮೊಂಡು ಮನಸಿಗೆ
ಮುಕ್ತಿ ದೊರೆಯದು ಮನಸು ಮಾಡದೆ

ಈ ರೋಗಕೆ ವೈದ್ಯನೊಬ್ಬನೆ
ಇರುವನಾತ ಅಡಗಿ ನಿನ್ನಲೆ
ಸ್ಪರ್ಶ ಬಯಸಿ ಹೋದೆಯಾದರೆ
ರೋಗಮುಕ್ತ ನೀನು ಒಮ್ಮೆಲೆ
– ಪೆದ್ದ ರಿಚ್ಚ

ದೇವನಾರು ನಿನಗೆ
ಎಂದಾಗ ನನಗೆ
ಧಿಗ್ಭ್ರಾಂತನಾದೆ
ಉತ್ತರ ಕಾಣದೆ ಒಳಗೆ!

ದೇವರಾರು ನನಗೆ?

ನಾ ಬೆಳಗುವ ದೀಪಗಳ ಬೆಳಕಿನಲಿ ನಲಿಯುವ ಯುವಕ?
ನಾ ಅರ್ಪಿಸುವ ಹೂಗಳ ಸೌಂದರ್ಯವನ್ನು ಸವಿಯುವ ರಸಿಕ?
ನಾ ನೀಡುವ ಬಲಿ ಅರ್ಪಣೆಯನು ಸವಿದು ಚಪ್ಪರಿಸುವ ಹೊಟ್ಟೆಬಾಕ?
ನಾ ಹೇಳುವ ಪ್ರಾರ್ಥನೆಗಳ ಲೆಕ್ಕ ಇಡುವ ಲೆಕ್ಕಿಗ?

ದಿವ್ಯ ದೇಗುಲದ ಭವ್ಯ ಕಟ್ಟಡದಲಿ ಸೆರೆಯಾಳಗಿರುವಾತ?
ಗರ್ಭಗುಡಿಯ ಸುಪ್ಪತ್ತಿಗೆಯಲಿ ಹಾಯಾಗಿ ಮಲಗಿರುವಾತ?
ನಮ್ಮ ಸ್ತುತಿಗೀತೆಗಳ ರಸಮಂಜರಿಯನು ಆಲಿಸಿ ಮೈಮರೆತಾತ?
ಗೋಪುರದ ತುದಿಯಿಂದ ಹದ್ದಿನ ಕಣ್ಣಿನಲಿ ನಮ್ಮ ನೋಡುವಾತ?
ನೀಳ ಕೊರಳಲಿ ಹುಬ್ಬಿದ ತೋಳಲಿ ಚಿತ್ರಪಟಗಳಲಿ ಸದಾ ನೇತಾಡುವಾತ?

ಸಾಧ್ಯವೇ ಇಲ್ಲ!!!!

ನನ್ನೊಳಗಿರುವ ನನ್ನುಸಿರು ಆತ
ನಾ ನೋಡುವ ನೋಟ ಆತ
ನಾ ಕೇಳುವ ದನಿಯಾತ
ನನ್ನುಭವದ ಸ್ಪರ್ಶ ಆತ
ನನ್ನ ಸವಿಯುವ ಸವಿರುಚಿ ಆತ

ನನ್ನ ಮುಂದಿದ್ದು ದಾರಿ ತೋರಿ
ನನ್ನ ಹಿಂದಿದ್ದು ನನ್ನನ್ನು ಕಾದು
ನನ್ನ ಬಳಿಯಿದ್ದು ಕೈಹಿಡಿದು ನಡೆಸುವ
ನನ್ನ ಮೇಲಿದ್ದು ಹರಸುವ
ದಿವ್ಯ ಸಂಗಾತಿ
ನಾನವನ ಮರೆತರು
ನನ್ನನ್ನು ಮರೆಯದ
ದಿವ್ಯ ಸಂಗಾತಿ.

ಪೆದ್ದರಿಚ್ಚಾ,
ಹುಡುಕಲೇಗೆ ಹೊರಗೆ
ಮರೆತು ಹುಡುಕಲು ಒಳಗೆ
ಸಿಗನಾತ ಎನ್ನ ಹೊರಗೆ
ಇರುವಾಗ ನನ್ನ ಒಳಗೆ
ಸಾಗಿ ಆತನ ಬಳಿಗೆ
ಅರಿತು ಮೆಲ್ಲ ಮೆಲ್ಲಗೆ
ಬಾಳುವೆ ಆತನ ಜೊತೆಗೆ!

ಭರವಸೆ ಹೊತ್ತು ಭುವಿಯನು ಉಳಲು
ಪಡೆವನು ರೈತನು ನೂರ್ಮಡಿ ಫಸಲು
ಬೆವರನು ಸುರಿಸುತಾ ಧರೆಯಲಿ ದುಡಿಯಲು
ಸಿಗುವುದು ಖಚಿತ ಲಾಭದ ಅಸಲು

ಪ್ರೀತಿಯ ಬಿತ್ತಲು ಪ್ರೇಮದ ಫಸಲು
ಹಗೆಯನು ಬಿತ್ತಲು ದ್ವೇಷವೇ ಮೀಸಲು
ಪ್ರೀತಿಯ ಪಡೆಯಲು ಪ್ರೀತಿಯ ಬಿತ್ತು
ದ್ವೇಷದ ಕಳೆಯನು ಚಿತೆಯಲಿ ಸುಟ್ಟು

ಕನಸಿನ ಫಸಲನು ಧರೆಯಲಿ ಪಡೆಯಲು
ಕೆಡುಕಿನ ಕಳೆಯನು ತೆಗಿಬೇಕು
ರಕುತದ ಹನಿಗಳ ಹರಿಸುತಾ ಧರೆಯೊಳು
ಒಳಿತಿನ ಬೀಜವ ಸುರಿಬೇಕು

ಬೆಳೆಯನು ಬೆಳೆವುದು ಸುಲಭದ ಮಾತು
ಅರಿಯದ ತಲೆಯು ಗೊಣಗುವುದು
ಹೆಗಲಲಿ ನೇಗಿಲ ನೊಗವನು ಹಿಡಿದರೆ
ಅರಿಯದ ಸತ್ಯವು ತಿಳಿಯುವುದು

ದೇವರ ಹೊಲದಲಿ ಬೆಳೆಯುವ ಸಸಿಯು
ಒಳಿತಿನ ಬೆಳೆಯನೇ ನೀಡುವುದು
ಯಾವ ಹೊಲದಲಿ ಬಿದ್ದಿಹೆ ನಾನು
ಕೆಡುಕಿನ ಫಸಲೇ ತೋರುವುದು

ಹೃದಯದ ಹೊಲದಲಿ ಪ್ರೀತಿಯ ಬಿತ್ತುವೆ
ಒಳಿತಿನ ಫಸಲನು ನಾ ಪಡೆವೆ
ಅವುಗಳ ಅರ್ಪಿಸಿ ಎನ್ನಯ ದೇವಗೆ
ಆತನ ಹೊಲದಲಿ ನಾ ಬೆಳೆವೆ
-ಪೆದ್ದ ರಿಚ್ಚ

ಎಮ್ಮಯ ಜೀವನ ಬಿರುಸಿನ ಓಟ
ಸೋಲು ಗೆಲುವಿನ ಸುಂದರ ಆಟ
ಗೆಲುವಿನ ಹಾದಿಲಿ ಸೋಲಿನ ನೋಟ
ಸೋಲ ಕೊನೆಯಲ್ಲಿ ವಿಜಯದ ಗೂಟ

ಸೋತರೂ ಅಂಜದೆ ಸಾಗುವುದು
ಗೆಲುವಿಗೆ ನಾಂದಿಯ ಹಾಡುವುದು
ಗೆಲುವಲಿ ದರ್ಪದಿ ಮನೆಮಾಡುವುದು
ಸೋಲನು ಬಳಿಗೆ ಸೆಳೆಯುವುದು

ಶಾಶ್ವತ ಯಾವುದೂ ಇಲ್ಲ ಇಲ್ಲಿ
ಸೋಲು ಗೆಲುವಿನ ರೇಸಿನಲಿ
ಕಣ್ಮರೆ ಅವುಗಳು ಕೆಲವೇ ಕ್ಷಣದಲಿ
ಬಾಳ ಪುಟ್ಟ ಪಯಣದಲಿ

ಸಾಗು ನೀ ಸಾಗು ನೀ ಹೆದರದೆ ಸಾಗು ನೀ
ಬಾಳಿನ ಮುಗಿಯದ ಪಂದ್ಯದಲಿ
ಮೈ ಮರೆಯದೆ ಗೆಲುವಲಿ ಹೆದರದೆ ಸೋಲಲಿ
ಸಾಗು ನೀ ನಗುವೇ ಬಾಳಿನಲಿ

-ಪೆದ್ದ ರಿಚ್ಚ