ಸತ್ಯಕ್ಕಾಗಿ ಹೋರಾಡುವೆ
ಸತ್ಯ ಮಾತನಾಡೆನು
ಶಾಂತಿಗಾಗಿ ಜಗಳಮಾಡುವೆ
ಶಾಂತವಾಗಿರಲಾರೆನು
ಬಡವರಿಗಾಗಿ ಮಾತನಾಡುವೆ
ದಾನ ಮಾಡೆನು
ನ್ಯಾಯಕ್ಕಾಗಿ ಕ್ರಾಂತಿ ಮಾಡುವೆ
ಅನ್ಯಾಯವ ಬಿಡೆನು
ಅಜ್ಞಾನವನ್ನು ಟೀಕಿಸುವೆ
ಅಕ್ಷರವನು ಕಲಿಸೆನು
ಲಂಚವನು ಖಂಡಿಸುವೆ
ಹಣದಾಸೆ ಮರೆಯೆನು
ಒಳಿತಿಗಾಗಿ ಹೋರಾಟ ಮಾಡುವೆ
ಕೆಡುಕನು ಬಿಡೆನು
ದೇವನ ವರಕ್ಕಾಗಿ ಆಶಿಸುವೆ
ಪಾಪ ಬಿಡೆನು
-ಪೆದ್ದರಿಚ್ಚ

ಹಾಕರು ಯಾರೂ
ಹೊಸ ಬಟ್ಟೆಗೆ ತೇಪೆ
ಬಳಸುತಾ ಹಳೆಯ ಬಟ್ಟೆಯನು
ಹಳೆ ಬಟ್ಟೆಗೂ ಹಿಡಿಸದೂ
ಹೊಸ ಬಟ್ಟೆಯ ತೇಪೆ
ತೊಡಲಾಗದೆ ಎಸೆವರು ಬಟ್ಟೆಯನು

ಯಾಕೋ ಮನಸ್ಸಿಗೆ
ಹಾಕುವೆ ತೇಪೆ
ಸುಂದರ ನಿನ್ನ ಬಾಳಿನಲಿ
ಬದಲಿಸು ಬೇಗನೆ
ಯೋಚನೆ ಯೋಜನೆ
ಸ್ವರ್ಗವ ಕಾಣುವೆ ಮನಸ್ಸಿನಲಿ
-ಪೆದ್ದರಿಚ್ಚ

ಕತ್ತಲ ಬೆಳಕಿನ ಕೊರತೆಯ ನೀಗುವನು
ಉದಯಿಸುವ ನವ ಸೂರ್ಯ
ಭುವಿಯ ತಂಪಿನ ಕೊರತೆಯ ನೀಗುವನು
ಹನಿಗರೆವ ಸವಿ ಮಳೆರಾಯ

ಕೊಳಚೆಯ ಸುವಾಸನೆ ಕೊರತೆಯ ನೀಗುವುದು
ದಿನವೂ ಅರಳುವ ಸುರ ಪುಷ್ಪ
ಜೀವಿಯ ಉಸಿರಾಟ ಕೊರತೆಯ ನೀಗುವುದು
ಗಾಳಿಯ ಬೀಸುವ ಹಸಿರ ವನ

ಹೃದಯದ ಪ್ರೀತಿಯ ಕೊರತೆಯ ನೀಗುವುದು
ಸ್ವಾರ್ಥ ಕಾಣದ ಪರ ಸ್ಪರ್ಶ
ಗೊಂದಲದ ಪರಿಹಾರದ ಕೊರತೆಯ ನೀಗುವುದು
ನಗುವನು ಚೆಲ್ಲುವ ಮಗು ಹರ್ಷ

ನಾಸ್ತಿಕನ ವಿಶ್ವಾಸದ ಕೊರತೆಯ ನೀಗುವನು
ನಿರುತವು ನಂಬುವ ಭಕ್ತನು
ಅರಿತ ಅರಿಯದ ಕೊರತೆಯ ನೀಗುವನು
ಎಮ್ಮನು ಕಾಯುವ ದೇವನು
-ಪೆದ್ದರಿಚ್ಚ

ತನ್ನೊಡೆಯನ ಅರಿತ ಸೃಷ್ಟಿಗೆ
ರಂಗೇರುವ ಸೊಬಗು
ತನ್ನ ಇನಿಯನ ಅರಿತ ನವಿಲಿಗೆ
ನಾಟ್ಯದ ಸೊಗಡು
ತನ್ನೊಲವನು ಅರಸಿ ಧಾವಿಸುವ ನೀರಿಗೆ
ತಡೆಯಿಲ್ಲದ ಹರಿವು
ನಲ್ಲನ ನೆನೆದು ಹಾಡುವ ಕೋಗಿಲೆಗೆ
ಸವಿ ರಾಗದ ಛಾಪು
ಸೃಷ್ಟಿಕರ್ತನ ಮರ್ಮವರಿತ ಸಕಲ ಸೃಷ್ಟಿಗೆ
ಸ್ವ ಅರ್ಪಣೆಯ ಒಲವು
ದೇವನರಿಯಲು ಸೋತಿಹ ನೀನು ಮಾತ್ರ
ಸಪ್ಪೆ ಹಣ್ಣಿನಂತಿರುವೆ ಪೆದ್ದರಿಚ್ಚ!

ಕೈಗಳುದ್ದ ಇರುವುದೇ ಚಾಚಲೆಂದು
ಚಾಚಿ ನೆರವ ನೀಡಲೆಂದು
ಸೇವೆ ಮಾಡಲೆಂದು

ಕೈಗಳುದ್ದ ಇರುವುದೇ ಚಾಚಲೆಂದು
ಚಾಚಿ ಹಸಿದವರಿಗೆ ಅನ್ನ ನೀಡಲೆಂದು
ಬಿದ್ದವರಎತ್ತಲೆಂದು

ಕೈಗಳುದ್ದ ಇರುವುದೇ ಚಾಚಲೆಂದು
ಚಾಚಿ ಎರಡಕ್ಷರ ಕಲಿಸಲೆಂದು
ಸರಿ ದಾರಿ ತೋರಲೆಂದು

ಕೈಗಳುದ್ದ ಇರುವುದೇ ಚಾಚಲೆಂದು
ಚಾಚಿ ಬೆನ್ನ ತಟ್ಟಲೆಂದು
ಸಾಂತ್ವನ ನೀಡಲೆಂದು

ಕೈಗಳುದ್ದ ಇರುವುದೇ ಚಾಚಲೆಂದು
ಚಾಚಿ ಕೈ ಕುಲುಕಲೆಂದು
ಸ್ನೇಹ ಬೆಳೆಸಲೆಂದು

ಕೈಗಳುದ್ದ ಇರುವುದೇ ಚಾಚಲೆಂದು
ಚಾಚಿ ಕೆಲಸ ಮಾಡಲೆಂದು
ಸುಖದಿ ಬಾಳಲೆಂದು

-ಪೆದ್ದರಿಚ್ಚ

ಕಾಲು ಜಾರುವುದು ಸಹಜ
ಆದರೆ ಮೇಲೇಳುವವನು ಮನುಜ
ಕೇಡು ಎಮ್ಮನು ಸೆಳೆಯುವುದು ನಿಜ
ಒಳಿತನು ಬಯಸುವವನು ದೇವ ತನುಜ
ಕೆರೆಯಲ್ಲಿರುವುದೆಲ್ಲಾ ಕಮಲವಾಗದು
ತಿಪ್ಪೆಯಲ್ಲಿ ಬಿದ್ದರೆ ಗೊಬ್ಬರದ ಬೆಲೆಯೂ ಸಿಗದು

ಬೀಳುವುದು ಮಾನವ ಗುಣ
ಏಳುವುದು ದೈವೀ ಗುಣ
ಏಳುವ ಮನಸ್ಸು ಮಾಡು ಸಾಕು
ಮೇಲೆತ್ತುವನು ದೇವನು
ಮನದಿ ಒಳಿತನು ಬಯಸು ಸಾಕು
ಕರವೆತ್ತಿ ಹರಸುವನು ನಿನನು!
-ಪೆದ್ದರಿಚ್ಚ

ಸುಡುವ ಹಗಲಿಗೂ
ತಣ್ಣನೆಯ ಇರುಳ ವಿರಾಮ
ಹರಿಯುವ ನೀರಿಗೂ
ನಿಂತ ನದಿಗಳಲಿ ವಿರಾಮ
ಆವಿ ಹನಿಗಳಿಗೂ
ಮುಗಿಲ ಅಪ್ಪುಗೆಯಲಿ ವಿರಾಮ
ಮಳೆಗರೆವ ಮುಗಿಲಿಗೂ
ಬಿಸಿ ಬೇಸಿಗೆಯ ವಿರಾಮ
ಹಸಿರ ಹೊರುವ ಭೂಮಿಗೂ
ಹಸಿರಿರದ ಒಂದು ಕಾಲದ ವಿರಾಮ
ಬೆಳೆವ ಗಿಡಮರಗಳಿಗೂ
ಚಳಿಗಾಲದ ಹಾಸಿಗೆಯಲಿ ವಿರಾಮ
ಬಳಲುವ ಅಬಲ ದೇಹಕೂ
ಸಿಹಿ ನಿದ್ದೆಯ ವಿರಾಮ
ಸಕಲ ಸೃಷ್ಟಿಯೇ ವಿರಾಮದ ಸವಿ ಮತ್ತಿನಲ್ಲಿರಲು
ನಿನ್ನಾತ್ಮವನೇಕೆ ಬಳಲಿಸುವೆ ಪೆದ್ದರಿಚ್ಚ!
ನಿನ್ನ ರಚಿಸಿದ ದೇವನೊಡನೆ
ಧ್ಯಾನದ ವಿರಾಮದಲಿ
ಮೈಮರೆತು ಆಗಬಾರದೇ ಸ್ವಚ್ಛ!

ಗಿಡದಲಿ ಸುಂದರ ಹೂವು ಅರಳಿರೆ
ಮುಳ್ಳನು ಯಾರು ಬಯಸುವರೇ?
ಕೊಳದಲಿ ನೈದಿಲೆ ಕಿಲಕಿಲ ನಗುತಿರೆ
ಕೊಚ್ಛೆಯ ಯಾರು ನೋಡುವರೇ?
ಸಿಹಿ ಸಿಹಿ ಭೋಜನ ಕಣ್ಣಿನ ಮುಂದಿರೆ
ಕಹಿ ಕಹಿ ಹಣ್ಣನು ತಿನ್ನುವರೆ?
ದೇವನೆ ಜಗವನು ಆಳುತಲಿರಲು
ಕೇಡಿಗನಾರು ನಂಬುವರೇ?

ಒಳಿತನು ಆರಿಸೋ ಬಲವನು ಪಡೆದಿಹ
ಪೆದ್ದನೆ ಆರಿಸೋ ದೇವನನು!
– ಪೆದ್ದರಿಚ್ಚ

ನಿನ್ನೆ ದೊರೆಯದು
ನಾಳೆ ತಲುಪದು
ನಿನ್ನ ಜೊತೆಯಲಿ
ಇಂದು ಇರುವುದು

ನಿನ್ನೆಗೆ ಕೊರಗದೆ
ನಾಳೆಯ ನಂಬದೆ
ಹೊರಡು ಈ ಕ್ಷಣ
ತಡವ ಮಾಡದೆ

ಬೂದಿ ನಿನ್ನೆಯೂ
ಗುಳ್ಳೆ ನಾಳೆಯು
ಇಂದು ಶಕ್ತಿಯು
ಬಳಸು ಎಂದಿಗೂ

ಮರೆತು ನಿನ್ನೆಯ
ತೊರೆದು ನಾಳೆಯ
ಅರಿತು ದೇವನ
ಬಾಳು ಪ್ರತಿಕ್ಷಣ
– ಪೆದ್ದರಿಚ್ಚ

ಹೊಸತನಕೆ ಮನ ಹಂಬಲಿಸುತ್ತಿದೆ
ಹಳೆತನವ ತೊರೆಯಲು ಅಳುತ್ತಿದೆ
ಎರಡರ ನಡುವಿನ ಜಂಜಾಟಡಿ
ಬಾಳು ಸೊರಗುತ್ತಿದೆ

ಹೊಸತನದ ಆಸೆ ಚಿಗುರಿದೆ
ಹಳೆತನದ ಬೇರು ಆಳವಾಗಿದೆ
ಆಯ್ಕೆಯ ಮಧುರ ಸಂಕಟದಲಿ
ಬಾಳು ಮರುಗುತ್ತಿದೆ

ಹೊಸತನಕೆ ಮಣೆ ಹಾಕುವೆ
ಹಳೆತನಕೆ ಬೆನ್ನು ಮಾಡುವೆ
ಹೊಸದಿನದ ಹೊಸಬೆಳಕಿನಲಿ
ಹೊಸತನವ ಬಾಳುವೆ
– ಪೆದ್ದರಿಚ್ಚ