ಜೀವನ ಒಂದು ಬೇಸಾಯ
ರೈತನೇ ಪಾಠ ಹೇಳುವ ಗುರುವರ್ಯ

ಬೆಳೆಗಳನು ಬೆಳೆಯುವುದೇ ಆತನ ಗುರಿ
ಆತ ಕಳೆಗಳಿಗೆ ಅಂಜದೆ ಕಿತ್ತೊಗೆಯುವ ಉದಾರಿ…
ಬೆಳೆಗಳನು ಕಣಜದಲಿ ತುಂಬುವನು
ಕಳೆಗಳನು ಬೆಂಕಿಯಲಿ ಸುಡುವನು
ಮಳೆಯಿರಲಿ ಚಳಿಯಿರಲಿ
ಗುರಿ ಮರೆಯದೆ ದುಡಿವನು…

ಬೆಳೆಯೆಂಬ ಒಳಿತನು ಬೆಳೆಯೋಣ
ಕಳೆಯೆಂಬ ಕೆಡುಕನು ಕೀಳೋಣ
ಮಳೆಯಿರಲಿ ಚಳಿಯಿರಲಿ
ಪ್ರೀತಿಯ ಬೆಳೆಯನೇ ಬೆಳೆಯೋಣ
ಬೆಳೆಯ ಸುಗ್ಗಿಯಲಿ
ನಲಿದು ಹಿಗ್ಗೋಣ
ಇಳೆಯ ಒಡೆಯನ
ನಮಿಸಿ ಹಾಡೋಣ
-ಪೆದ್ದರಿಚ್ಚ

ದೀಪವನು
ತೊಟ್ಟಿಯಲ್ಲೋ ಬುಟ್ಟಿಯಲ್ಲೋ ಇಡರು
ಅದು ಪುಟ್ಟದಾದರೂ ಅದು ಬೆಳಗುವಾಗ
ಅದು ಸಿಂಹಾಸನದಲಿ ಆಸೀನ…

ಅದಕೆ ಕತ್ತಲನು
ಸಂಪೂರ್ಣವಾಗಿ
ಭೇದಿಸಲಾಗದು
ಪುಟ್ಟ ದೀಪವಲ್ಲವೇ…
ಮಹಾ ಇರುಳನು
ಚಿಕ್ಕ ದೀಪ ನೀಗುವುದು ಅಸಹಜ…
ಆದರೆ, ಒಂದು ನಿಮಿಷ….
ಅಷ್ಟು ದೊಡ್ಡ ಕತ್ತಲು
ಪುಟ್ಟ ದೀಪವನು!!!
ಏನು ಮಾಡಲಾಗದು…
ದೀಪದ ಸಾಮ್ರಾಜ್ಯದಲಿ
ದೀಪವೇ ಮಹಾರಾಜ
ಕತ್ತಲೆಯ ಕೀಟಲೆಗೆ ಇಲ್ಲಿ ರಜಾ!
ಬಲಶಾಲಿ ಶತ್ರುವನು ಸೋಲಿಸಲಾಗದು
ಸರಿ…ಒಪ್ಪುವಂತಹ ಮಾತು
ಆದರೆ ಆ ಶತ್ರು
ನಮ್ಮನ್ನು ಸೋಲಿಸದಂತೆ
ನೋಡಿಕೊಳ್ಳಬಹುದು!
ಅದೇ ಜೀವನ!!!

ಆ ಪರಮಾತ್ಮನು
ಶಕ್ತಿಯನು ನೀಡಿಹನು
ಸೋಲಿಸಲಲ್ಲ ಇತರರನು
ಬಳಸದನು ಸೋಲಿಸದಿರಲು
ಇತರರು ನಿನ್ನನು!!!
-ಪೆದ್ದರಿಚ್ಚ

ಯೋಚನೆಯ ಕಾಳೊಂದು ಬಿತ್ತನೆಗೆ ಅನುವಾಗಿ
ಅರಸಿ ಹೊರ ಸಾಗಿದೆ ಹಸಿ ಭೂಮಿಗೆ
ಹಂಬಲದ ಹೊರೆಹೊತ್ತು ಸಂತಸದ ಯೋಜನೆಯಲಿ
ಗದ್ದಲದ ಗದ್ದೆಯಲಿ ಎಡವಿ ಬಿದ್ದಿದೆ
ಜಂಗುಳಿಯ ಜಂಜಾಟಡಿ ಸಂಕಟದಿ ನಲುಗಾಡಿ
ಅರಸಿ ಹೊರ ಸಾಗಿದೆ ಹಸಿ ಭೂಮಿಗೆ

ದುಷ್ಟರ ಹಾವಳಿ ಎದುರಾಗಿ ದಾರಿಯಲಿ
ಬದುಕುವ ಆಸೆಯೇ ಮರೆಯಾಗಿದೆ
ಮಲಿನತೆಯ ಬಿರುಗಾಳಿಯಲಿ
ಅಳುಕಿಲ್ಲದೆ ಜೀವಿಸಲು
ಅರಸಿ ಹೊರ ಸಾಗಿದೆ ಹಸಿ ಭೂಮಿಗೆ

ಮೌನದ ಗುಡಿಸಲಲಿ ಶಾಂತಿಯ ಹೊಸ್ತಿಲಲಿ
ಪ್ರೀತಿಯ ಗುಂಡಿಗೆಗೆ ಶರಣಾಗಿದೆ
ಪ್ರೀತಿಯ ಭೂಮಿಯಲಿ ಯೋಚನೆಯ ಕಾಳಿಗೆ
ಹೊಸ ಬಾಳಿನ ಯೌವನ ಶುರುವಾಗಿದೆ
-ಪೆದ್ದರಿಚ್ಚ

ರಕುತ ಹರಿದರೆ ಸಾಲದು
ಜೀವ ಚಕ್ರವು ಸಾಗಲು
ಪ್ರೀತಿ ಬೆರೆತರೆ ನೆತ್ತರಲಿ
ಸಾರವಿದೆ ಬಾಳಲು.

ಸ್ನೇಹವಿದ್ದರೆ ಸಾಲದು
ಬಾಳ ರಥವು ಓಡಲು
ತ್ಯಾಗ ಕಂಡರೆ ಕಣ್ಣಲಿ
ಸ್ವರ್ಗ ಸಿಗುವುದು ನೋಡಲು.

ರೆಂಬೆಯಿದ್ದರೆ ಸಾಲದು
ಮರವು ಬೆಳೆದು ನಿಲ್ಲಲು
ಬೇರು ಬೆರೆತರೆ ಬುಡದಲಿ
ಫಲವ ಕಾಣುವೆ ಕೊಯ್ಯಲು.

ಸಂಬಂಧವಿದ್ದರೆ ಸಾಲದು
ಬಾಳು ಬಿಚ್ಚಿ ಅರಳಲು
ದೇವನೊಲವಿದ್ದರೆ ಮನಸಲಿ
ಪ್ರೀತಿ ಪಡೆಯುವೆ ಸವಿಯಲು.
-ಪೆದ್ದರಿಚ್ಚ

ದುಡಿಯದೆ ಗಳಿಸಿದ ಸಿರಿತನ ಸಲ್ಲದು
ಉಳಿಯದು ಶಾಶ್ವತ ತಿಳಿದಿರಲಿ
ಆತ್ಮ ಸಾಕ್ಷಿ ಇಲ್ಲದ ತೃಪ್ತಿಯು
ಸುಡುವುದು ನಿನ್ನನು ಅಳಿವಿನಲಿ

ಮೌಲ್ಯಗಳಿರದ ಅರಿವು ಏತಕೆ
ಮೌಢ್ಯನೆ ಲೇಸು ಜಗದೊಳಗೆ
ನ್ಯಾಯವೇ ಇಲ್ಲದ ಕಸುಬು ಬೇಕೇ
ಸಂತಸವಿರದು ಮನದೊಳಗೆ.

ಮಾನವ ಧರ್ಮ ಇಲ್ಲದ ಜ್ಞಾನವು
ಬೆಳಕೆ ಕಾಣದ ಕತ್ತಲೆಯು
ತ್ಯಾಗದ ಲೇಪನ ಕಾಣದ ಪ್ರಾರ್ಥನೆ
ಕಲ್ಲಿಗೆ ನೀಡುವ ಚುಂಬನವು.

ಶಿಸ್ತೇ ಇರದ ರಾಜ ನೀತಿಯು
ಮೃಗಗಳು ಬಾಳುವ ಪಂಜರವು
ದೇವನ ಅರಿಯದ ಪ್ರೀತಿಯ ನುಡಿಗಳು
ದಾಹವ ನೀಗದ ಸಾಗರವು.
-ಪೆದ್ದರಿಚ್ಚ

ಪ್ರೇರಣೆ
Fredrick Lewis Donaldson

ದೇಹವು ಒಂದೇ ಅಂಗಗಳಲವು
ಒಂದೇ ಧ್ಯೇಯದಿ ದುಡಿಯುವುವು
ವಿವಿಧತೆ ಇದ್ದರೂ ಸಾವಿರ ತಮ್ಮಲಿ
ದೇಹದ ಏಕತೆ ಬೆಳೆಸುವುವು

ಎಮ್ಮಲಿ ಯಾರು ಶ್ರೇಷ್ಠರು ಎಂಬುದ
ಕೇಳರು ಯಾರು ತಮ್ಮೊಳಗೆ
ತಮ್ಮಯ ಕಾರ್ಯವ ಮಾಡುತ ಅನುದಿನ
ಪಡೆವರು ತೃಪ್ತಿಯ ಒಳಗೊಳಗೆ

ಹೆಚ್ಚಿನ ಕೆಲಸದ ಬಾರವು ಎನಗಿದೆ
ಎನ್ನದು ಒಳಗಿನ ಕಿರು ಹೃದಯ
ರಕುತವ ನೀಡುತ ಪ್ರತಿ ದಿನ ಪ್ರತಿ ಕ್ಷಣ
ದೇಹಕೆ ನೀಡಿದೆ ನವ ಉದಯ

ಕಣ್ಣುಗಳೆರಡು ನೋಡಲು ಜಗವನು
ಬಲ್ಲಿರಾ ಅವುಗಳ ಸ್ನೇಹವನು
ಅಳುವಲೂ ನಗುವಲೂ ಜೊತೆ ಜೊತೆ ಸಾಗುತ
ದೇಹಕೆ ನೀಡಿವೆ ಪ್ರೀತಿಯನು

ಬಣ್ಣಿಸಲೆನ್ನಲಿ ಪದಗಳ ಕೊರತೆಯು
ದೇಹದ ಅಂಗಗಳೇಕತೆಯ
ದೇವನ ಸ್ತುತಿಸುವೆ ಮನದಲಿ ನೆನೆದು
ಆತನ ಮಹಿಮೆಯ ಈ ಕಥೆಯ.

ಎಮ್ಮಯ ಜಗದಲಿ ಏಕತೆ ಮೆರೆಯಲಿ
ಶಾಂತಿಯ ಪರಿಮಳ ಪಸರಿಸಲಿ
ಭೇದ ಭಾವದ ಮೋಡವು ಸರಿಯಲಿ
ಜಗವನು ಪ್ರೀತಿಯು ತೋಯಿಸಲಿ
-ಪೆದ್ದರಿಚ್ಚ

ಆಗೊಮ್ಮೆ ಈಗೊಮ್ಮೆ
ಅಗೋ ಆ ಗುಡ್ಡದ ತುದಿಯಿಂದ
ಏಕತೆಯ ಕಹಳೆಯ ನಿನಾದ
ಅದನಾಲಿಸುವುದೇ
ಬಾಲ್ಯದ ಎನ್ನ ಉನ್ಮಾದ!
ಕಾಯುತಿರುವೆನಿಂದು
ಆಲಿಸಲು ಅದನು
ಹೊಸ್ತಿಲು ತುಳಿದಿರಲು
ಕೇಳುವ ಶುಭದಿನವು!
ಕೇಳುತ್ತಿಲ್ಲ ಯಾಕೋ
ಎನ್ನ ಹೃದಯ ಹಂಬಲಿಸುತಿರುವ
ಏಕತೆಯ ಕಹಳೆಯ ಆ ದನಿ
ದಪ್ಪ ಗೋಡೆಗಳ
ಸೆರೆಮನೆಯಲಿರಲು ನಾನು
ಕೇಳುವುದಾದರೂ ಹೇಗೆ?
ಎನ್ನೋಳಗೆ ಮುಗಿಲೆತ್ತರದ
ಆಸೆಯನು ಹೊತ್ತು
ಬೆಟ್ಟದ ತುದಿಯಲಿ ನೆಲೆನಿಂತ
ಕಹಳೆಯನು ನೋಡುವ
ಆತುರದಿ ಹೊರಬಂದೆ
ಅಲ್ಲಿಗೆ ಹಾರಿ ಹೋಗುವ ಆಸೆ
ಕಬ್ಬಿಣದ ಪಂಜರದ ಗೋಡೆ
ತಡೆಯಾಯಿತು ನನಗೆ.
ಕಹಳೆಯ ದನಿ ಕೇಳಿದಾಗಲೆಲ್ಲಾ
ಕಹಳೆಯನು ಕಂಡಾಗಲೆಲ್ಲಾ
ಮನದಲೂ ಮುಗಿಲಲ್ಲೂ
ಕಾಮನಬಿಲ್ಲನು ಕಂಡ ನೆನಪು!
ಏಳು ಬಣ್ಣಗಳೂ
ಏಕತೆಯನು ಸಾರಿದಂತಿತ್ತು.
ಮುಗಿಲತ್ತಾ ನೋಡಲು
ಕಣ್ಣಿಗೆ ಬಳಿದಿದ್ದ
ಕಾಡಿಗೆಯೇ ಗೋಡೆಯಾಯಿತು
ಕಾಮನಬಿಲ್ಲೂ
ಕಪ್ಪಾಗಿ ಕಂಡಿತು…
-ಪೆದ್ದರಿಚ್ಚ

ಬೀಜ ಮೊಳಕೆಯಾಯಿತು
ಮೊಳಕೆ ಚಿಗುರೊಡೆಯಿತು
ಚಿಗುರು ಸಸಿಯಾಯಿತು
ಸಸಿ ಮರವಾಯಿತು
ಮರ ಫಲ ನೀಡಿತು
ಸಾಧನೆಯ ಮೊದಲು
ಬದಲಾವಣೆ ಬೇಕು ಪೆದ್ದರಿಚ್ಚ!

ಕಣ್ಣಿಗೆ ಕಾಣುವ ಕಣ್ಣುಗಳಿವೆ ಹೊರಗೆ
ಕಾಣದ ಕಣ್ಣುಗಳು ಒಳಗೆ
ಕಾಣುವ ಕಣ್ಣುಗಳು ಕಾಣಲಾರವು
ಕಾಣದ ಕಣ್ಣುಗಳು ನೋಡಲಾರವು
ಕಾಣುವ ಕಾಣದ ಕಣ್ಣುಗಳು
ನೋಡಲಾಗದೆ ಕುರುಡನಾಗಿಹೆ ನಾನು…

ಕಾಣುವ ಕಣ್ಣಿಗಿದೆ ಕನ್ನಡಕ
ಆದರೆ ತೀಕ್ಷ್ಣತೆಯ ಕೊರತೆ
ನೋಡುತಿಹೆನು ಅನುದಿನ
ಕಾಣಲಾಗುತ್ತಿಲ್ಲ ಒರತೆ
ಕಾಣದ ಕಣ್ಣಿಗಿಲ್ಲ ಕುರುಡು
ಆದರೆ ಹಂಬಲದ ಬರಡು
ಕಣ್ಣು ಕಂಡಿದ್ದರೆ ಮಿಟುಕು
ಹಸನಾಗುತ್ತಿತ್ತು ಬದುಕು

ಕಣ್ಣ ನೀಡಿದ ದೇವಾ
ತೆರೆದು ನೋಡಲು ಕಲಿಸು
ಕುರುಡನಾಗಿಹೆ ನಾನು
ಹರಸಿ ಎನ್ನನು ಕ್ಷಮಿಸು
ನಿನ್ನ ನೋಡಲು ನನ್ನ
ಕಣ್ಣು ಒಳಗಿನ ತೆರೆಸು!
– ಪೆದ್ದರಿಚ್ಚ

ಸಾಯಬೇಕು ನಾನು ನೀನು
ಜನರು ನಮ್ಮನು ಹೊಗಳಲು
ಉಸಿರಿರುವವರೆಗೆ ಕಟ್ಟಿಟ್ಟ ಬುತ್ತಿ
ಅಸೂಯೆ ದ್ವೇಷದ ಅಮಲು

ಸಾಯಬೇಕು ನಾನು ನೀನು
ಜನರು ಕಣ್ತೆರೆದು ನೋಡಲು
ಸುರಿಸಲಾರರು ಒಂದನಿ ಕಣ್ಣೀರು
ದುಃಖದ ದಾಹ ನೀಗಲು

ಸಾಯಬೇಕು ನಾನು ನೀನು
ಹೂವಿನ ಪರಿಮಳ ಪಡೆಯಲು
ನೀಡಲಾರರು ಒಂದು ಬಿಡಿಕಾಸು
ಕಡು ಬಡತನವ ನೀಗಲು

ಸಾಯಬೇಕು ನಾನು ನೀನು
ಪ್ರೀತಿಯ ಸವಿಯನು ಕಾಣಲು
ಸಾಯುವುದನೆ ಕಾಯುತಿರುವರು
ನಮ್ಮ ಒಳಿತನು ಕಾಣಲು.

ಸಾಯಬೇಕು ನಾನು ನೀನು
ಸ್ವಚ್ಛಂದವಾಗಿ ಬಾಳಲು
ಕಾಲು ಜಾರುವುದನೆ ಹಂಬಲಿಸುತಿಹರು
ಗೇಲಿ ಮಾಡಿ ನಗಲು
-ಪೆದ್ದರಿಚ್ಚ