ಬರಬೇಡ ದೇವಾ
ಬಿಝಿಯಾಗಿಹೆ ನಾನು
ದೀಪವ ಹಚ್ಚುವೆನು ನಿನಗೆ
ಆ ಬೆಳಕ ನೋಡುತಾ
ಅಲ್ಲೇ ಇರು ನೀನು…

ಬರಬೇಡ ದೇವಾ
ಹಾಯಾಗಿರುವೆನು ನಾನು
ಧೂಪ ಹಚ್ಚುವೆನು ನಿನಗೆ
ಪರಿಮಳ ಸವಿದು
ಅಲ್ಲೇ ಇರು ನೀನು…

ಬರಬೇಡ ದೇವಾ
ಸುಖವಾಗಿರುವೆ ನಾನು
ಗುಡಿಯ ಕಟ್ಟುವೆ ನಿನಗೆ
ಸುಪ್ಪತ್ತಿಗೆಯಲಿ ಮಲಗಿ
ಅಲ್ಲೇ ಇರು ನೀನು…

ಬರಬೇಡ ದೇವಾ
ಎಲ್ಲಾ ತಿಳಿದಿಹೆನು ನಾನು
ಗೀತೆ ಹಾಡುವೆ ನಿನಗೆ
ಮಧುರ ಗಾಯನ ಕೇಳಿ
ಅಲ್ಲೇ ಮಲಗು ನೀನು…
-ಪೆದ್ದರಿಚ್ಚ

ಬಾಳ ಸಾಗರದಲಿ ಈಜುವ
ಪುಟ್ಟ ಮೀನು ನಾನು
ಸಾಗರದ ಆಳವ ಅರಿತ
ಸರ್ವವ್ಯಾಪಿ ದೇವನು
ಪುಟ್ಟ ಮೀನಾದರೂ ಎನ್ನನು
ಹೆಸರಿಡಿದು ಕರೆವನು…

ಸರ್ವಶಕ್ತನು ಅವನು
ಪುಡಿ ಮೀನು ನಾನು
ಆತನ ಕರದ ಬಲೆಯಲಿ
ಹಿಡಿಯುವನು ಎನ್ನನು
ಉಸಿರ ತೆಗೆಯಲಲ್ಲ
ಜೀವ ತುಂಬಲು…

ನೀರಿಲ್ಲದೆ ಬದುಕಲಾರೆ
ಎನ್ನುವ ನನಗೆ
ಆ ಕರದ ಬಲೆಯಲಿ ಆಸರೆ
ಹೋಗಿ ಉಸಿರಾಡಲಾರೆ
ನೀರ ಹೊರಗೆ
ಅಗೋ! ಆತನ ಪ್ರೀತಿಯ ಪೊರೆ
ನೀರನ್ನೇಕೆ ಜೀವವನೇ ಬಿಡುವೆ
ಪಡೆಯಲು ಆತನ ಅಕ್ಕರೆ…

ನಾ ಈಜುವ ಸಾಗರವ
ಸೃಷ್ಟಿಸಿದ ದೇವನೆ
ನಿನ್ನ ಬಲೆಯಲೆನ್ನ ಸಿಕ್ಕಿಸು
ನಿನ್ನ ಕರದಲೆನ್ನ ಒಮ್ಮೆ ಸ್ಪರ್ಶಿಸು
ನಿನ್ನ ಪ್ರೀತಿಯ ಸಾಗರದಲಿ
ತೇಲುವ ಭಾಗ್ಯವನು
ಕರಣಿಸು ನೀ ಬೇಡುವೆನು
ಇಂದೂ ಎಂದೆಂದೂ…
-ಪೆದ್ದರಿಚ್ಚ

ನಿದ್ದೆಯೊಂದಿಲ್ಲದಿದ್ದರೆ…!!!
ಯೋಚಿಸಿದರೆ ನನ್ನ ನಿದ್ದೆ ಹಾಳಾಗುತ್ತದೆ
ಮಾನವನಲ್ಲಿ ನವ ಎನ್ನಲು
ಏನು ಇರುತ್ತಿರಲಿಲ್ಲ…
ಉಸಿರಾಡುವ ಹೆಣವಾಗುತ್ತಿತ್ತು ದೇಹ
ಹುಚ್ಚು ಕುದುರೆಯಾಗುತ್ತಿತ್ತು ಮನಸ್ಸು
ನಿಸ್ತೇಜವಾಗುತ್ತಿತ್ತು ಆತ್ಮ…

ಆಯಸ್ಸು ಚಿಟ್ಟೆಯದ್ದಾಗುತ್ತಿತ್ತು
ನಲಿವು ಹೂವಿನದಾಗುತ್ತಿತ್ತು
ಸಮಯ ಬೇಡವಾಗುತ್ತಿತ್ತು
ಕುಡಿಯದೇ ಅಮಲೇರುತಿತ್ತು

ನಿದ್ರೆ ಕೊಟ್ಟ ದೇವನೆ ವಂದನೆ
ನಿದ್ರಿಸಲು ಕಲಿಸಿದ ನಿನಗೆ ಆರಾಧನೆ

ನಿದ್ರೆ ಏನೋ ನೀಡಿರುವೆ ದೇಹಕೆ
ಧ್ಯಾನಿಸಿ ವಿರಮಿಸಲು ಕಲಿಸು ಆತ್ಮಕೆ
ವಿಶ್ರಾಂತಿ ನೀಡಲು ತಿಳಿಸು ಮನಸ್ಸಿಗೆ
ಹೊಸ ಹಮಸ್ಸಿನ ಜೀವನ ಕರುಣಿಸು ಪೆದ್ದರಿಚ್ಚನಿಗೆ…!

https://peddariccha.home.blog

ಸೂರ್ಯನ ಮುಖಮಾಡಿದ ಮನೆ
ಕಣ್ತೆರೆದಂತೆ ತೆರೆದ ಬಾಗಿಲು
ಮನೆಯೊಳಗೆ ಬಂಗಾರದ ಕಿರಣಗಳಿಗೆ ಕರೆಯೋಲೆಯನು ನೀಡುತ್ತಿತ್ತು
ಚಿನ್ನದ ಕಿರಣಗಳಿಂದ ಮಿಂದ ಮನೆಯೊಳಗೆ
ಬಂದವರೆಲ್ಲರೂ ಅತಿಥಿಗಳೇ…
ಸ್ವಾಗತ ಕೋರುವ ದಾಳಿಂಬೆ ಹಣ್ಣಿನಂತಹ ನಗು ಬೀರುವ ಹಲ್ಲುಗಳು
ಪ್ರೀತಿಯ ಕಂಪ ಸೂಸುವ ಹಗುರ ಹೃದಯಗಳು
ಕ್ಷೇಮವನು ವಿಚಾರಿಸುವ ಜೇನ ನುಡಿಗಳು
ಅತಿಥಿಗಳಿಗೆ ದೇವಾಲಯವನ್ನು ಹೊಕ್ಕ ಅನುಭವ
ಪ್ರಸಾದ ಪಡೆದಂತೆ
ಇದ್ದುದ್ದನ್ನು ಹಂಚಿಕೊಳ್ಳುವ ಅವಕಾಶ
ಆದರೆ…
ಈಗ ಬಾಗಿಲು ಮುಚ್ಚಿದೆ
ಸೂರ್ಯನಿಗೂ ಬೆನ್ನು ಮಾಡಿವೆ
ಬಂಗಾರದ ಕಿರಣಗಳ ಬಣ್ಣ ಬದಲಾಗಿದೆ
ಮನೆಯೊಳಗೆ ಗಾಳಿಯೂ ಬರದಾಗಿದೆ
ನಗು ದುಬಾರಿಯಾಗಿದೆ
ಹೃದಯ ಭಾರವಾಗಿದೆ
ನುಡಿಗಳು ಮೌನ ತಾಳಿವೆ
ದೇವಾಲಯ ಎಲ್ಲಿದೆ ಅನಿಸುತ್ತಿದೆ
ಪ್ರಸಾದ ದೂರದ ಮಾತಾಗಿದೆ
ಏಕೆನೆ…
ಈಗ ಬಾಗಿಲು ಮುಚ್ಚಿದೆ
-ಪೆದ್ದರಿಚ್ಚ

ಬೀಳುವುದು ಸೋಲಲ್ಲ
ಎಲ್ಲರೂ ಬೀಳುವರು
ಬಿದ್ದು ಏಳದಿರುವುದು…
ಅವರಿಗೆ ಗೆಲುವಿಲ್ಲ.

ಕಾಲು ಜಾರುವುದು ತಪ್ಪಲ್ಲ
ಎಲ್ಲರೂ ಜಾರುವರು
ಜಾರಿ ಅರಿಯದವರು…
ಅವರಿಗೆ ಬದುಕಿಲ್ಲ.

ಕಣ್ಣು ಮುಚ್ಚುವುದು ತಪ್ಪಲ್ಲ
ಎಲ್ಲರೂ ಮುಚ್ಚುವರು
ಮುಚ್ಚಿ ತೆರೆಯದವರು…
ಅವರಿಗೆ ಬಾಳಿಲ್ಲ.

ದುಡುಕಿ ನುಡಿಯುವುದು ತಪ್ಪಲ್ಲ
ಎಲ್ಲರೂ ನುಡಿವರು.
ನುಡಿದು ಒಪ್ಪದವರು…
ಅವರಿಗೆ ಒಲವಿಲ್ಲ.
– ಪೆದ್ದರಿಚ್ಚ

ಹಿತ್ತಲ ಗಿಡ ಮದ್ದಾಗದು
ತಾತ್ಸಾರದ ರೋಗ ಇರುವ ತನಕ
ಬತ್ತಲ ನೀರು ತೊಳೆಯದು
ಅಸೂಯೆಯ ಜಿಡ್ಡು
ಹರಿವ ತನಕ

ಹಸಿದ ಹೊಟ್ಟೆಗೆ ತೃಪ್ತಿ ಸಿಗದು
ಆಸೆಯ ಕಣ್ಣು ತಂಪಾಗುವ ತನಕ
ಕುಸಿದ ಭಾವಕೆ ಜೀವ ಬರದು
ಮಸೆವ ಗಿಣ್ಣು ದೂರಾಗುವ ತನಕ
-ಪೆದ್ದರಿಚ್ಚ

ಊಹೆಗೆ ನಿಲುಕದ ಲೋಕದಿ ಇರುವನು
ಎಮ್ಮನು ಕಾಯುವ ನಮ್ಮಯ ದೇವನು
ಮಾನವ ತರ್ಕಕೆ ಸಿಗದ ಒಡೆಯನು
ನಂಬಲು ಎಮ್ಮಲಿ ಮನೆ ಮಾಡುವನು

ಸೆಳೆವನು ಎಮ್ಮನು ಆತನ ಬಳಿಗೆ
ಪ್ರೀತಿಯ ನಗುವನು ಚೆಲ್ಲುತ ಎಮಗೆ
ಓಡುವ ಪಡೆಯಲು ಆತನ ಅಪ್ಪುಗೆ
ಕಳಚುತ ನಮ್ಮಯ ಆಸೆಯ ಪೆಟ್ಟಿಗೆ

ನಂಬಿಕೆ ಅರಳಲಿ ಮನದ ಗುಡಿಯಲಿ
ಪ್ರೀತಿಯು ಹರಿಯಲಿ ಹೃದಯದ ಕುಡಿಯಲಿ
ಸಿಗುವುದು ಗೆಲುವು ಬಾಳಿನ ಕೊನೆಯಲಿ
ನಿಲ್ಲಲು ನಾವು ದೇವನ ಎದುರಲಿ
– ಪೆದ್ದರಿಚ್ಚ

ದೇವನಿಹನು ಅಲ್ಲಿ
ಇರುವೆ ನಾನು ಇಲ್ಲಿ
ಹತ್ತಿ ಇಳಿಯಲು ನಮ್ಮೀರ್ವರ
ನಡುವೆ ಇರುವುದೊಂದು ಏಣಿ
ಆತನಲ್ಲಿಗೆ ಹೋಗಲು
ಸೆಳೆತ ಮನದಾಳದಲ್ಲಿ
ಹತ್ತಬೇಕು ದಿನೇ ದಿನೇ
ಒಂದೊಂದೇ ಮೆಟ್ಟಿಲಿನಲಿ
ಆತನೇನೋ ಕರೆವನು
ಪ್ರೀತಿಯ ನುಡಿಗಳಲಿ
ಮಧ್ಯೆ ಇರುವರು ವೈರಿಗಳು
ಏರುವ ಆ ಹಾದಿಯಲಿ
ದೇಹ, ಜಗ, ಕೇಡಿಗ
ಈ ಮೂರು ವೈರಿಗಳ ಸೆಳೆತದಲಿ
ಮೇಲೇರುವ ಬಯಕೆ
ಮಣ್ಣಾಗುವುದು ಮನಸಿನಲಿ
ಜಯಿಸದೆ ಅವುಗಳ
ಮೇಲೆರಲಾಗದು ಏಣಿಯಲಿ
ಅವರ ಒಡನಾಟದಿ ಬೆರೆತರೆ
ನರಳಾಡುವೆ ಬಿದ್ದು ನರಕದಲಿ
ಏಣಿ ಇದೆ ನೋಡು ನಿನ್ನೆದುರಲಿ
ಮೇಲೇರು ದೇವನ ಅನುಗ್ರಹದಲಿ
ಆತ ಜತೆಗಿರಲು ತಿಳಿದಿರಲಿ
ವೈರಿಗಳ ಆಟ ನಡೆಯದು ನಿನ್ನಲಿ
ಏರಬೇಕು ನಾನು ನೀನು ಈ ಏಣಿಯಲಿ
ಒಂದಾಗ ಬೇಕಾದರೆ ಆ ನಮ್ಮ ದೇವನಲಿ…
-ಪೆದ್ದರಿಚ್ಚ

ವಾಟ್ಸಾಪ್ನ ಆಪಿನಲಿ
ಪ್ರೀತಿಯ ಸ್ಮೈಲಿಯ ಹಾವಳಿ
ಫೇಸ್ಬುಕ್ನ ಗೋಡೆಯಲಿ
ಕೆಂಪು ಹೃದಯದ ಬಳುವಳಿ

ರಕುತದ ಬಂಧನ ಮರೆಸಿವೆ
ಮೊಬೈಲ್ ಜಗದಲಿ ಮೆರೆಸಿವೆ
ಕಾಣದ ಪ್ರೀತಿಯ ಆಸೆಯ ತೋರಿಸಿ
ಕಾಣುವ ಪ್ರೀತಿಯ ಅಳಿಸಿವೆ.

ಯಾರು ಯಾರನು ಬಳಸುವರೋ
ಎಂಬುದೇ ಅರಿವಿಗೆ ಬಾರದು
ಯಾರು ಯಾರನು ಕೊಂಡರೋ
ಮನಸಿನ ಆಳದಿ ತಿಳಿಯದು
ಅವುಗಳ ದಾಸನು ಆಗದೆ ಬಾಳಲು
ದೇವನೆ ವರವನು ಕರುಣಿಸೋ!
-ಪೆದ್ದರಿಚ್ಚ

ಸುಂದರ ಸೃಷ್ಟಿಯ ಎನ್ನಯ ಅರಸನೆ
ಬಯಸಿದೆ ಮನವು ನೀಡಲು ನಿನಗೆ
ಭೂಮಿಯೂ ನಿನದೆ ಗಗನವೂ ನಿನದೆ
ನೀಡಲಿ ಏನನು ತಿಳಿಯದು ನನಗೆ.

ಮರಗಳು ನಿನವೇ ಸಸಿಗಳು ನಿನವೇ
ಫಲಗಳ ಹೇಗೆ ಕೊಡುವುದು ನಿನಗೆ?
ಕುಸುಮವು ನಿನದೆ ಸುಗಂಧವು ನಿನದೆ
ಧೂಪವ ಹೇಗೆ ನೀಡಲಿ ನಿನಗೆ?

ಅನ್ನವೂ ನಿನದೆ ಚಿನ್ನವೂ ನಿನದೆ
ಸಿರಿತನ ಹೇಗೆ ನೀಡಲಿ ನಿನಗೆ?
ಪ್ರೇರಣೆ ನಿನದೆ ಪೋಷಣೆ ನಿನದೆ
ಸಾಧನೆ ಹೇಗೆ ನೀಡಲಿ ನಿನಗೆ?

ದೇಹವು ನಿನದೆ ಆತ್ಮವೂ ನಿನದೆ
ಎನ್ನನೇ ಹೇಗೆ ನೀಡಲಿ ನಿನಗೆ?
ಭಕ್ತಿಯು ನಿನದೆ ಶಕ್ತಿಯು ನಿನದೆ
ನೀಡಲು ಏನಿದೆ ಎನ್ನಲಿ ನಿನಗೆ?

ನಿನ್ನಯ ಕರೆಗೆ ಕಿವಿಯನು ಕೊಡುವೆ
ಏನನು ನೀಡದೆ ಜೊತೆಗೆ ನಾ ಬರುವೆ
ನಿನ್ನಯ ಪ್ರೀತಿಗೆ ಎನ್ನಯ ಪ್ರೀತಿಯ
ಸೇರಿಸಿ ನಿನ್ನೊಡ ಹೆಜ್ಜೆಯನಿಡುವೆ.
-ಪೆದ್ದರಿಚ್ಚ