ಬಾಳು ಹೂವ ಹಾಸಿಗೆಯಲ್ಲ
ಚೂಪು ಮುಳ್ಳುಗಳ ಸರಮಾಲೆ
ಚುಚ್ಚಿದರೂ ನೋವಾಗುವುದಿಲ್ಲ
ನಂಬಿಕೆಯಿದ್ದರೆ ನಿನಗದು ಹೂಮಾಲೆ.

ಬಾಳು ನೇರ ರಸ್ತೆಯಲ್ಲ
ತಿರುವು ಮುರುವುಗಳ ಜೋಕಾಲಿ
ಎಡವಿದರೂ ಕೊನೆಯಾಗುವುದಿಲ್ಲ
ಮನಸ್ಸಿದ್ದರೆ ನೀನು ಜಯಶಾಲಿ.

ಬಾಳು ಸಮತಟ್ಟಾದ ಭೂಮಿಯಲ್ಲ
ದಟ್ಟ ಬೆಟ್ಟಗುಡ್ಡಗಳ ಸಾಲು
ಫಲ ಪುಷ್ಪಕ್ಕೇನು ಬರವಿಲ್ಲ
ನೀರೊಳಗಿದ್ದರೆ ಅದರ ಕಾಲು
-ಪೆದ್ದರಿಚ್ಚ

ಬಿದ್ದು ಬಿದ್ದು
ಎದ್ದು ನಡೆಯಲು ಕಲಿತವನು ಅಂದು
ಆದರೆ…
ಬಿದ್ದ ಎಲೆಯಂತೆ ಕೊಳೆಯುತಿಹೆನು ಇಂದು.

ಮತ್ತೆ ಮತ್ತೆ
ಕೇಳಿ ಕಲಿತವನು ಅಂದು
ಆದರೆ…
ಕಲಿತು ರಾಶಿ ಬಿದ್ದಿರುವ ಗೊಬ್ಬರ ಇಂದು.

ನೋಡಿ ನೋಡಿ
ಮುಂದೆ ನಡೆದವನು ಅಂದು
ಆದರೆ…
ಉಸಿರೇ ಇಲ್ಲದ ಒಣ ಮರ ಇಂದು.

ಬೇಡಿ ಬೇಡಿ
ಎಲ್ಲವ ಪಡೆದವನು ಅಂದು
ಆದರೆ…
ಒರತೆ ಕಾಣದ ಮರಭೂಮಿ ಇಂದು.

ಉಜ್ಜಿ ಉಜ್ಜಿ
ಎಲ್ಲ ಅಳಿಸಿದವನು ಅಂದು
ಆದರೆ…
ಬಿಳಿ ಗೋಡೆಯ ಕಪ್ಪು ಚುಕ್ಕೆ ಇಂದು.

ದೇವ ದೇವ
ಎಂದು ಬೊಗಸೆಯಲಿ ಹಿಡಿದವನು ಅಂದು
ಆದರೆ…
ಅಕ್ಷರ ಕಾಣದ ಖಾಲಿ ಹಾಳೆ ಇಂದು.
-ಪೆದ್ದರಿಚ್ಚ

ದೇವರು ನೀಡಿದ ನಿನ್ನೀ ಬಾಳು
ಲೆಕ್ಕವಿಲ್ಲದ ಅದ್ಭುತಗಳ ಸಾಲು
ಮನವ ಬಿಚ್ಚಿ ದೇವರಲಿ ಕೇಳು
ಉಕ್ಕಿ ಹರಿಸುಹನು ಜೇನ ಹಾಲು

ಯೋಗ್ಯರು ಯಾರು ಆತನ ವರಗಳಿಗೆ
ಸುರಿಸುವನು ಪ್ರೀತಿಯ ಪ್ರತಿ ಘಳಿಗೆ
ಅಂಜುವೆ ಏಕೆ ಎದುರಾಗುವ ಕೇಡಿಗೆ
ಪೊರೆಯುವನಾತ ನಿನ್ನ ಹಿಡಿದು ದೀವಿಗೆ

ಹತ್ತಿದ ಮೇಲೆ ಏಣಿಯ ತಳ್ಳದಿರು
ಒಳಿತ ಮಾಡಿದ ಜನರ ಜರಿಯದಿರು
ಉಸಿರು ನೀಡಿದ ಹಸಿರ ಕೊಲ್ಲದಿರು
ಪಡೆದ ಮೇಲೆ ವರವ
ಮರೆಯದಿರು
-ಪೆದ್ದರಿಚ್ಚ

ಭಾರದ ದೇಹಗೊಳಗೊಂದು
ಭಾರವಿಲ್ಲದ ಆತ್ಮ
ದೇಹದ ಚಲನೆಗೆ ರಕ್ತ ಇಂಧನ
ಆತ್ಮಕಾದರೋ ಮೌನ
ರಕ್ತ ಹರಿದರೆ ಬಾಳು ದೇಹಕೆ
ಪ್ರೀತಿ ಚಿಮ್ಮಲು ಬೆಳಕು ಆತ್ಮಕೆ
ರಕ್ತ ಹರಿಸುವ ನಿನ್ನ ಹೃದಯ
ಅದರಲಿ ಪ್ರೀತಿಯನು ಬೆರೆಸಿದರೆ
ನಿನ್ನ ಬಾಳು ಧನ್ಯ ಪೆದ್ದರಿಚ್ಚ!

ಬೀಳುವುದು ಸಹಜ
ಏಳುವ ಶಕ್ತಿ ಇದೆ ನಿನ್ನಲಿ
ರೋಗ ಬರುವುದು ಸಹಜ
ಗುಣ ಹೊಂದುವ ಬಲವಿದೆ ನಿನ್ನಲಿ
ಸೋಲುವುದು ಸಹಜ
ಗೆಲ್ಲುವ ಛಲವಿದೆ ನಿನ್ನಲಿ
ಬೆಳಗುವ ಸೂರ್ಯನಿರುವ ತನಕ
ರಾತ್ರಿಯ ಕತ್ತಲಿಗೆ ಹೆದರಬೇಡ ಪೆದ್ದರಿಚ್ಚ!

ಕಾಣಲಾಗದು ಸ್ವರ್ಗವನು
ತೊರೆದಾಕ್ಷಣ ಕೇಡನು
ಸ್ವರ್ಗದ ಬಾಗಿಲನು ತೆರೆಯಲು
ಮಾಡಬೇಕು ಒಳಿತನು
ಮುಳ್ಳುಗಳ ಕಿತ್ತು
ಹೂಗಳ ಬೆಳೆಯದೆ ಹೋದರೆ
ಹೂದೋಟ ಹೇಗಾದಿತು ಪೆದ್ದರಿಚ್ಚ!

ಪ್ರೀತಿಗೆ ಪ್ರೀತಿಯ ಸುರಿದಾಗಲೇ
ಮಾನವನಾಗುವೆ
ಪ್ರೀತಿಗೆ ದ್ವೇಷವನು ಬಳಿದಾಗಲೇ
ದಾನವನಾಗುವೆ.

ಕ್ಷಮೆಯ ಸುವಾಸನೆ ಹರಿಸಿದಾಗಲೇ
ದೈವ ವಾಣಿಯಾಗುವೆ
ದ್ವೇಷದ ವಾಸನೆ ನಾರಿದಾಗಲೇ
ಮೂಖ ಪ್ರಾಣಿಯಾಗುವೆ.

ಪಡೆದ ಕ್ಷಮೆಯ ಆವಿಯು ಮೋಡಗಟ್ಟಿದೆ
ಕತ್ತಲಲಿ ಏಕಿರುವೆ
ಮೋಡ ಕರಗಿಸಿ ಮಳೆಯ ಸುರಿದರೆ
ಬೆಳಕ ಕಾಣುವೆ.
-ಪೆದ್ದರಿಚ್ಚ

ಅಂದದ ಹೂವು ಹಾರಲಾರದು
ಆದರೆ ಮೇಲೆ ಹಾರುವ ಚಿಟ್ಟೆಯನ್ನೂ ತನ್ನತ್ತ ಸೆಳೆಯಬಲ್ಲದು
ಅಂದದ ಹೂವು ನಡೆಯಲಾರದು
ಆದರೆ ಚಂಚಲ ಮನಸ್ಸನ್ನೂ ತನ್ನೊಳಗೆ ಹಿಡಯಬಲ್ಲದು
ನಿನ್ನ ಮನದ ಹೂವಲಿ ಅಂದ ತುಂಬಿರಲು
ಮೇಲಿರುವ ದೇವನೂ ನಿನಗಾಗಿ
ಇಳಿದು ಬರುವನು ಪೆದ್ದರಿಚ್ಚ!

ಮಂಕು ಕವಿದಿದೆ ಬುದ್ದಿಗೆ
ವಸಂತಕಾಲದಲೂ ಚಳಿಗಾಲ
ಚಿಗುರೊಡೆದರೂ ಸುತ್ತಲೂ
ಎಳೆ ಹಸಿರ ಸುಳಿವಿಲ್ಲ
ಬಣ್ಣ ಕಾಣುವ ಹಂಬಲ
ಅರೇ! ಹಿಮ ಭಾರದ ಜಾಲ
ಮೋಡವನೆ ನೋಡುತಿರಲು
ಕೆಂಪು ಸೂರ್ಯನೂ ಇಂಗಾಲ.

ಮಂಕು ಕವಿದಿದೆ ಬುದ್ದಿಗೆ
ನೀರ ಸೆಲೆಯೊಳಗೂ ಬರಗಾಲ
ಜೀವ ಪುಟಿದರೂ ಸುತ್ತಲೂ
ನಿರ್ಜೀವ ಉಸಿರ ಪಂಜರ
ತೇವ ಕಾಣುವ ಆಶಯ
ಅರೇ! ಸುಡುವ ನೀರಿನ ಭಯ
ಮರಳ ರಾಶಿಯನೇ ನೋಡುತಿರಲು
ಸಿಹಿ ನೀರು ಕಷಾಯ.
-ಪೆದ್ದರಿಚ್ಚ

ದೂರದ ಬೆಟ್ಟ ನುಣ್ಣಗೆ
ಅರಿತರೆ ಒಳಿತು ಬಾಳಿಗೆ
ಕಾಣದ ಒಲವನು
ಪಡೆಯುವ ಭರದಲಿ
ನಿನ್ನಯ ಬಲವನು
ತೊರೆಯದಿರು.

ಸಂತಸ ಒಳಗಿದೆ ನಿನ್ನಲೇ
ಅರಿತರೆ ಪಡೆಯುವೆ ಈಗಲೇ
ಅರಿಯದ ಸುಖವ
ಗಳಿಸುವ ಭರದಲಿ
ದುಃಖದ ಗವಿಯಲಿ
ಬೀಳದಿರು.

ಅಡಗಿದೆ ನಿನ್ನಲಿ ನಿಧಿಯು
ಅರಿತರೆ ಕಾಡದು ವಿಧಿಯು
ಕೊಳೆಯುವ ಹಣವನು
ಹುಡುಕುವ ಭರದಲಿ
ಸ್ವಾರ್ಥದ ಸುಳಿಯಲಿ
ಸಿಲುಕದಿರು
-ಪೆದ್ದರಿಚ್ಚ