ಇರುಳು ಸರಿದಿದೆ
ಬೆಳಕು ಹರಿದಿದೆ
ಹೊಸ ಭಾವನೆ ಮನದಿ ಚಿಗುರಿದೆ
ಭಯವು ತೊಲಗಿದೆ
ಧೈರ್ಯ ಅರಳಿದೆ
ಹೊಸ ಚಿಲುಮೆ ಮನದಿ ಬೆಳೆದಿದೆ

ಸೋಲ ಮರೆಸಿದೆ
ಗೆಲುವ ಕಲಿಸಿದೆ
ಬಾಳ ಹಾದಿಯ ಮನದಿ ಕೊರೆದಿದೆ
ದುಃಖ ಒರೆಸಿದೆ
ಪ್ರೀತಿ ಸುರಿದಿದೆ
ಮನದ ಒಡಲಲಿ ಬಾಳ ಬರೆದಿದೆ

ಸಾವು ಸೋತಿದೆ
ಬಾಳು ಗೆದ್ದಿದೆ
ಬಾಳೋ ಆಸೆಯೂ ಮರಳಿ ಮೂಡಿದೆ
ಸ್ವಾರ್ಥ ಬಿದ್ದಿದೆ
ತ್ಯಾಗ ಎದ್ದಿದೆ
ಬಾಳೋ ಆಸೆಗೆ ಬಲವು ಸಿಕ್ಕಿದೆ

ಸತ್ಯ ಜಯಿಸಿದೆ
ಮಿಥ್ಯ ಮಾಸಿದೆ
ಜಗದ ಇರುಳಿಗೆ ಬೆಳಕು ಮೂಡಿದೆ
ನ್ಯಾಯ ಬೆಳಗಿದೆ
ಮೋಸ ಕರಗಿದೆ
ಜಗದ ಕರುಳಿಗೆ ಒಲುಮೆ ದೊರೆತಿದೆ
-ಪೆದ್ದರಿಚ್ಚ

ಮೌನದ ಮಾತು ದೀಪ ಎಮ್ಮ ದಾರಿಗೆ
ಕೇಳಿಸದು ಸುಮ್ಮನೆ ಮೌನ ಅರಿಯದ ಕಿವಿಗೆ

ಗದ್ದಲ ನೂರಿರಲು ಜಗದ ಈ ಸೂರಿನಲಿ
ಮೌನವಿರದ ಬಾಳು ಗಾಜಿನ ಚೂರಿನಲಿ

ಉಲಿಯುವನು ದೇವನು ಮೌನದ ಮಾತಿನಲಿ
ಆಲಿಸು ನೀ ಅನುದಿನವು ಭರವಸೆಯ ಪ್ರೀತಿಯಲಿ
-ಪೆದ್ದರಿಚ್ಚ

ಕಲ್ಲಾದ ಹೃದಯಗಳು ಕಲ್ಲಾಗಿ ನೋಡುತಿರೆ
ಕಣ್ಣೀರ ಸುರಿಸುತಿದೆ ಕಲ್ವಾರಿಯ ಕಲ್ಲು
ಮುಳ್ಳಾದ ಮಾತುಗಳ ಸುರಿಮಳೆಯ ನಡುವೆ
ಮಮಕಾರ ತೋರುತಿದೆ ತಲೆ ಮೇಲಿನ ಮುಳ್ಳು

ಸುರಿಯುತಿಹ ಆತನ ರಕ್ತವ ಕಂಡು
ಎಪ್ಪಾಗಿ ಹೋಗಿದೆ ಸ್ವಾರ್ಥದ ಮನಸ್ಸು
ಮನಕಲಕುವ ನೋವಿನ ಗೋಳಾಟದ ನಡುವೆ
ನಲಿದಾಡಿದೆ ದ್ವೇಷದ ಕನಸು
ಏನಾಗಿದೆ ಮನವೇ ಏನಾಗಿದೆ
ಕಣ್ಣೇಕೆ ಇಂದು ಕುರುಡಾಗಿದೆ

ಕರುಣೆಯನೇ ಅರಿಯದ ತರ್ಕದ ನಡುವೆ
ಸುಡುಬಿಸಿಲೂ ತಂಪಾಗಿ ಹವೆ ಸೂಸಿದೆ
ಕುರುಡಾದ ಕಣ್ಣುಗಳ ಸಂಗಮದಲ್ಲಿ
ಶಿಲುಬೆಯ ಆ ಮರವು ಬಿಗಿದಪ್ಪಿದೆ

ಸುರಿಯುತಿಹ ಆತನ ರಕ್ತವ ಕಂಡು
ಎಪ್ಪಾಗಿ ಹೋಗಿದೆ ಸ್ವಾರ್ಥದ ಮನಸ್ಸು
ಮನಕಲಕುವ ನೋವಿನ ಗೋಳಾಟದ ನಡುವೆ
ನಲಿದಾಡಿದೆ ದ್ವೇಷದ ಕನಸು
ಏನಾಗಿದೆ ಮನವೇ ಏನಾಗಿದೆ
ಕಣ್ಣೇಕೆ ಇಂದು ಕುರುಡಾಗಿದೆ
-ಪೆದ್ದರಿಚ್ಚ

ಜನರಿದ್ದರೆ ಸಾಕೇ ಬೋಜನಕೆ
ಪ್ರೀತಿಯ ಭಾವನೆಗಳಿಲ್ಲದೆ
ಮರುಭೂಮಿಯಲ್ಲಿನ ಮಳೆಯಂತಾದಿತು
ಚಪ್ಪರಿಸಿದ ಮೃಷ್ಟಾನ್ನವು.

ಜನರಿದ್ದರೆ ಸಾಕೇ ಬೋಜನಕೆ
ಸ್ಪಂದಿಸದ ಹೃದಯಗಳಿಲ್ಲದೆ
ಎರಡು ಪಂಜರಗಳೊಳಗಿನ ಹಕ್ಕಿಗಳಂತಾದಿತು
ಗದ್ದಲದ ಸಮ್ಮಿಲನವು.

ಜನರಿದ್ದರೆ ಸಾಕೇ ಬೋಜನಕೆ
ಸಮಾನತೆಯ ಭಾವವಿಲ್ಲದೆ
ಚುಚ್ಚುವ ಮುಳ್ಳಿನ ಆಸನವಾದಿತು
ಕುಳಿತಾ ಕುರ್ಚಿಯು.

ಜನರಿದ್ದರೆ ಸಾಕೇ ಬೋಜನಕೆ
ಹಂಚಲು ಸಮಯವಿಲ್ಲದೆ
ಹಣವಿಲ್ಲದ ವಿನಿಮಯ ವ್ಯಾಪಾರವಾದೀತು
ಆನಂದಿಸಿದ ಆಚರಣೆಯು.

ಜನರಿದ್ದರೆ ಸಾಕೇ ಬೋಜನಕೆ
ಸೃಷ್ಟಿಕರ್ತನ ಒಲವಿಲ್ಲದೆ
ಪ್ರಾಣಿಗಳ ತಿನ್ನುವ ತೊಟ್ಟಿಯಂತಾದಿತು
ತಿನ್ನುವ ತಟ್ಟೆಯು.
-ಪೆದ್ದರಿಚ್ಚ

ಬಿರುಗಾಳಿಗೆ ಎದೆಕೊಟ್ಟು ನಿಲ್ಲಬಲ್ಲವರಾರು?
ಹದ್ದೋ, ಸ್ವಚ್ಛಂದವಾಗಿ ಹಾರುತಿದೆ ನೋಡು!
ನುಗ್ಗುವ ನೀರನು ತಡೆಯಬಲ್ಲವರಾರು?
ಪುಟ್ಟ ಮೀನೋ, ಮೈಮರೆತು ಈಜುತಿದೆ ನೋಡು!
ಸುಡುವ ಬಿಸಿಲಲಿ ಹೆದರದೆ ನಿಲ್ಲ ಬಲ್ಲವರಾರು?
ಚಿಕ್ಕ ಹೂವೋ, ನಗುನಗುತಾ ಕುಣಿದಾಡುತಿದೆ ನೋಡು!
ಗಗನ ಚುಂಬಿಸುವ ಎತ್ತರದ ಶಿಖರವ ಏರಬಲ್ಲವರಾರು?
ಚಿಟ್ಟೆಯೋ, ಮುದದಿ ಮುತ್ತಿಕ್ಕುತ್ತಿದೆ ನೋಡು!
ನಿನ್ನೊರಗಿನ ಶಕ್ತಿಯ ನೋಡಿ ಕುಂದದೆ
ದೇವನಿತ್ತ ನಿನ್ನೊಳಗಿನ ಶಕ್ತಿಯ ಅರಿತು ಸ್ವಚ್ಛಂದವಾಗಿ ಬಾಳು ಪೆದ್ದರಿಚ್ಚ!

ವೈರಿಗಳಲ್ಲ ದ್ರೋಹ ಬಗೆವವರು
ಜೊತೆಯಲಿದ್ದು ಎಮ್ಮ ಅರಿತವರು

ವೈರಿಯಾದವರು ದ್ರೋಹ ಬಗೆಯರು
ದ್ರೋಹ ಬಗೆದವರು ವೈರಿಯಾಗುವರು

ದ್ರೋಹ ಮಾಡುವರು ಪ್ರೀತಿ ಅರಿಯದವರು
ದ್ರೋಹ ಬಗೆಯುವರು ಪ್ರೀತಿ ಸವಿಯದವರು

ಪ್ರೀತಿ ಸವಿಯದವರು ಪ್ರೀತಿ ಮಾಡರು
ಪ್ರೀತಿ ಮಾಡದವರು ದ್ರೋಹ ಬಗೆವರು

ದ್ರೋಹ ಮಾಡುವವರು ಮೂರ್ಖರಾಗುವರು
ದಾಹ ನೀಗದೆ ದೂರ್ತರಾಗುವರು

ಪ್ರೀತಿ ಮಾಡುವವರು ದೈವ ಮಾನವರು
ದ್ರೋಹ ರೋಗವ ಅಳಿಸಿ ಹಾಕುವರು
-ಪೆದ್ದರಿಚ್ಚ

ಸುಗಂಧ ಸುವಾಸನೆ ನೀನು
ಗಬ್ಬು ಗೊಬ್ಬರ ನಾನು
ಅಪ್ಪಿಕೋ ಎನ್ನನೊಮ್ಮೆ
ಪಡೆವೆ ಕ್ಷಣದ ಮುಕ್ತಿಯನು

ಕಸ್ತೂರಿ ಮೃಗದಂತೆ ನಾನು
ಅರಿಯದೆ ಒದ್ದಾಡುತಿಹೆನು
ಅಪ್ಪಿಕೋ ಅರಿಯುವೆನು
ಒಳಗಿರುವ ಸುಗಂಧವನು

ಸುವಾಸನೆಯ ಮರೆತುಬಿಟ್ಟಿಹೆ
ತಪ್ಪುಗಳ ದುರ್ನಾತದಿ
ಅಪ್ಪಿಕೋ ಎನ್ನನ್ನೊಮ್ಮೆ
ದುರ್ನಾತವ ಮರೆಯುವೆನು
-ಪೆದ್ದರಿಚ್ಚ

ಸ್ವಾರ್ಥದ ಮತ್ತಲಿ ತೇಲುತಲಿ
ಹೊಗಳುವ ಜನರೇ ತೆಗಳುವರು
ಹಗ್ಗದ ಮೇಲೆ ಕುಣಿಯುತಲಿ
ಸತ್ಯಕೆ ನೇಣನು ಬಿಡಿಯುವರು

ಗೆಳೆಯರು ಯಾರು ಅರಿಯದು ಜಗದಲಿ
ನಗುವಲಿ ಮೋಸವ ತೊಟ್ಟಿಹರು
ಕಣ್ಣೀರನು ಯಾರು ಒರೆಸ್ವರು ತಿಳಿಯದು
ಅಳುವಲೂ ದ್ರೋಹವ ಮಾಡುವರು.

ಮೋಸವ ಅರಿಯದ ಎನ್ನಯ ದೇವನೆ
ಸತ್ಯವ ಅರಿಯಲು ನೀ ಕಲಿಸು
ಕತ್ತಲ ಯುಗಕೆ ಅಂತ್ಯವ ಹಾಡುತ
ಸತ್ಯದ ದೀಪವ ನೀ ಉರಿಸು.
-ಪೆದ್ದರಿಚ್ಚ

ಮನದೊಳಗೆ ಒಡಕು
ಅದನ್ನೇ ಹೊರಗೂ ಕಾಣುವ ತವಕ
ಮನದೊಳಗೆ ಗೊಂದಲ
ಅದನ್ನೇ ಹೊರಗೂ ಹರಡುವ ಛಲ
ಮನದೊಳಗೆ ಕತ್ತಲು
ಬೆಳಕಿಲ್ಲದೆ ಬಾಳು ಮುಳ್ಳಿನ ಹಿತ್ತಲು
ಮನದೊಳಗೆ ಗದ್ದಲ
ಮೌನ ಅರಿಯದೇ ಬಾಳು ಚಂಚಲ.
ಮನದೊಳಗೆ ಅಂದವ ಕಾಣದವನು
ಹೊರಗೆ ಅಂದವ ಕಾಣಲಾರ ಪೆದ್ದರಿಚ್ಚ!

ಕಲ್ಲನ್ನು ಎಸೆಯುವ ಬುದ್ದಿ
ಬಾಲ್ಯದಿಂದಲೇ ಬಾಲದಂತೆ ಅಂಟಿಕೊಂಡಿದೆ
ನಾಯಿಯತ್ತ ಕಲ್ಲನು ಒಡ್ಡಿ
ನಗುತ್ತಿದ್ದ ನಗು ಇನ್ನೂ ಒಣಗದ ದಂಟಿನಂತಿದೆ.

ಮಾಡಿದ ತಪ್ಪಿಗೆ ತೂರುತಿದ್ದರು
ಕೈಗೆ ಸಿಕ್ಕ ಕಲ್ಲನು ಜನರು ಶಿಕ್ಷೆ ನೀಡಲು
ಜನುಮ ತಾಳಿವೆ ನ್ಯಾಯಾಲಯಗಳು
ಎಂತಲೇ ಬಳಸುತಿಹರು ಹೊಸ ಕಲ್ಲುಗಳ ತೂರಲು

ಎಕ್ಕಬಹುದು ಕಲ್ಲುಗಳ ಸುಲಭವಾಗಿ
ರಾಶಿಬಿದ್ದಿದೆ ವಾಟ್ಸಾಪ್ ಫೇಸ್ಬುಕ್ನಲ್ಲಿ ಉಚಿತವಾಗಿ
ಎಸೆಯಬಹುದು ಆಟಿಕೆಯಾಗಿ
ಇಡೀ ಜಗವನೇ ಬಳಸಬಹುದು ಮೈದಾನವಾಗಿ

ಟೀಕೆಯ ಕಲ್ಲಿನ ಏಟು
ರಕ್ತ ಚಿಮ್ಮಿಸುವ ಘಾಯಕ್ಕಿಂತ ಬಲು ಘಾಟು
ಎಸೆದವಗೆ ಅರಿವಾಗದು
ತನಗೆ ಎದುರಾಗೋವರೆಗೆ ಆ ಕಲ್ಲಿನ ವಹಿವಾಟು

ಮನೆ ಕಟ್ಟುವ ಕಲ್ಲುಗಳಲೇ
ಕೆಡವಿ ಬೀಗುವ ಮನಗಳು ಕಲ್ಲಿನಂತಾಗಿವೆ
ಎದುರಾಗೋ ದೇವ ಕಲ್ಲಲೇ
ನಿನ್ನ ಕಾಣದೆ ಜಗದಲಿ ಗುಡಿಯೂ ಗುಹೆಯಾಗಿದೆ
-ಪೆದ್ದರಿಚ್ಚ