ಭುವಿಯ ಎಳೆಯ ಉದರವನು
ಬೆವರಿನ ಹನಿಗಳು ಸ್ಪರ್ಶಿಸಿವೆ
ಉದರದಿ ಹಸಿರಿನ ಜನನವನು
ಬೆವರಿನ ಹನಿಗಳು ಹರ್ಷಿಸಿವೆ
ಸೃಷ್ಟಿಗೆ ಹೊನ್ನಿನ ಒಡವೆಗಳ
ಬೆವರಿನ ಹನಿಗಳು ತೊಡಿಸುತಿವೆ
ಮನುಕುಲದಸಿವಿನ ತುಟಿಗಳಿಗೆ
ಬೆವರಿನ ಕರಗಳು ಉಣಿಸುತಿವೆ

ಹರಿಯುವ ನದಿಗೆ ಸಾವಿರದು
ಸುರಿಯುವ ಬೆವರಿಗೆ ನೋವಿರದು
ದುಡಿಮೆಯ ಕರವೇ ಅಳಿಯದ ಸಿರಿಯು
ಸಾಗುವ ಹಾದಿಗೆ ಕೊನೆಯಿರದು

ಮನುಜಗೆ ದುಡಿಮೆಯ ಮಹಿಮೆಯನು
ಬೆವರಿನ ಹನಿಗಳು ಕಲಿಸುತಿವೆ
ಸಂತೃಪ್ತಿಯ ಬಾಳಿನ ಹಾದಿಯನ್ನು
ಬೆವರಿನ ಹನಿಗಳು ತೋರುತಿವೆ
ತ್ಯಾಗದ ಬಾಳಿಗೆ ಸಾಂತ್ವನವ
ಬೆವರಿನ ಹನಿಗಳು ಸುರಿಯುತಿವೆ
ಕತ್ತಲ ಬಾಳಿಗೆ ಕಿರಣವನು
ಬೆವರಿನ ಹನಿಗಳು ಬೀರುತಿವೆ

-ಪೆದ್ದರಿಚ್ಚ

ಬೆತ್ತಲು ಪಯಣ ಬಾಳಿನ ಕೊನೆಗೆ
ಅರಿಯದು ಏಕೋ ಪೆದ್ದಣ್ಣ
ಏನನು ಒಯ್ಯಲು ಆಗದು ನಿನಗೆ
ಹಂಚುತಾ ಬಾಳೋ ಮಂಗಣ್ಣ

ಮುಚ್ಚಿದ ಮುಷ್ಟಿಗೆ ನರಕದ ನೋವು
ಬೇಗನೆ ತೆರೆಯೋ ಪೆದ್ದಣ್ಣ
ತೆರೆದರೆ ಕೈಯನು ಸ್ವರ್ಗವ ತಟ್ಟುವೆ
ನಲಿವನು ಕಾಣುವೆ ಮಂಗಣ್ಣ

ಮೂಟೆಯ ಕಟ್ಟಿ ಸಿರಿತನ ಪಡೆಯಲು
ಸಾಯುವ ತನಕ ಪೆದ್ದಣ್ಣ
ಕರಗಳ ಎತ್ತಿ ನೆರವನು ನೀಡಲು
ಸಿರಿತನ ಅಳಿಯದು ಮಂಗಣ್ಣ

ಸಾವಿನ ದವಡೆಗೆ ತಲುಪುವ ಮೊದಲು
ಕಣ್ಣನು ತೆರೆಯೋ ಪೆದ್ದಣ್ಣ
ಇರುವುದ ಪರರಲಿ ಹಂಚುತಾ ಬಾಳಲು
ಸಾಯದೆ ಬದುಕುವೆ ಮಂಗಣ್ಣ
-ಪೆದ್ದರಿಚ್ಚ

ದೇವಾಲಯ ದೊಡ್ಡದಾದರೂ
ದೇವರು ಪುಟ್ಟ ಗುಡಿಯಲಿ
ದೇಹ ಎಷ್ಟೇ ದಪ್ಪವಾದರೂ
ಜೀವ ಚಿಕ್ಕ ಹೃದಯದಲಿ

ಯಂತ್ರ ಎಷ್ಟೇ ದೊಡ್ಡದಾದರೂ
ಹಿಡಿತ ಪುಟ್ಟ ಸ್ವಿಚ್ಚಿನಲಿ
ಮರವು ಎಷ್ಟೇ ಬೆಳೆದರೂ
ಮೂಲ ಪುಟ್ಟ ಕಾಳಿನಲಿ

ಸಾಧನೆ ದೊಡ್ಡದಾದರೂ
ಆರಂಭ ಪುಟ್ಟ ಹೆಜ್ಜೆಗಳಲಿ
ಬೋಧನೆಗಳು ಉದ್ದವಾದರೂ
ಸಾರ ಚಿಕ್ಕ ಸಾಲುಗಳಲಿ
-ಪೆದ್ದರಿಚ್ಚ

ದಯಾಮಯೀ ದೇವನ
ದಯೆ ಪಡೆದವರು
ದಯೆ ತೋರಲಾಗದೆ
ಹೃದಯ ಕಳೆದುಕೊಂಡರು

ಪ್ರೀತಿಮಯೀ ದೇವನ
ಪ್ರೀತಿ ಪಡೆದವರು
ಪ್ರೀತಿ ಮಾಡಲಾಗದೆ
ಕಾಡುವ ಪ್ರೇತರಾದರು

ಶಾಂತಿಧೂತ ದೇವನ
ಶಾಂತಿ ಪಡೆದವರು
ಶಾಂತಿ ನೀಡಲಾಗದೆ
ದ್ವೇಷ ಸಾರುತಿಹರು

ನೀತಿವಂತ ದೇವನ
ನೀತಿ ಕಲಿತವರು
ನೀತಿಯ ಬಾಳಲಾರದೆ
ಬಾಳದೆ ತಿಥಿಯಾಗಿಹರು

ಸೃಷ್ಟಿಕರ್ತ ದೇವನ
ಸೃಷ್ಟಿಯಾಗಿರುವವರು
ಸೃಷ್ಟಿ ಅರಿಯಲಾರದೆ
ಅನಿಷ್ಠವಾಗಿಹರು

ಪೋಷಿಸುವ ದೇವನ
ಪೋಷಣೆ ಪಡೆದವರು
ಪೋಷಿಸಲಾಗದೆ
ದೂಷಣೆ ಮಾಡುತಿಹರು

ಪ್ರೇರೇಪಿಸುವ ದೇವನ
ಪ್ರೇರಣೆ ಪಡೆದವರು
ಪ್ರೇರಣೆ ನೀಡಲಾಗದೆ
ಶೋಷಣೆ ಮಾಡುತಿಹರು

ದೇವನು
ಎಲ್ಲಾ ಮಾಡುವ ಸರ್ವಶಕ್ತ
ಆದರೂ ಸೋಲುವನು
ಮಾನವನ ಅವಿಶ್ವಾಸದ ಎದುರಿನಲಿ

ದೇವನು
ಎಲ್ಲೆಲ್ಲೂ ಇರುವ ಸರ್ವವ್ಯಾಪಿ
ಆದರೂ ಬಾಳಲಾರನು
ಮಾನವನ ಕೆಟ್ಟ ಯೋಚನೆಗಳಲಿ.

ದೇವನು
ಎಲ್ಲಾ ಅರಿಯುವ ಸರ್ವಜ್ಞಾನಿ
ಆದರೂ ಅರಿಯಲಾರನು
ಮಾನವನ ಸ್ವಾರ್ಥದ ಪರಮಾವಧಿ.
-ಪೆದ್ದರಿಚ್ಚ

ಕಲಿಯದೆ ಕಲಿತ ವಿಷಯವು ಒಂದಿದೆ
ನನ್ನಯ ಪುಟ್ಟ ತಲೆಯೊಳಗೆ
ಹೇಗೋ ಎಂದೋ ಕಲಿತಿಹೆ ತಿಳಿಯದು
ಮರೆಯಲು ಆಗದೆ ಬಳಲಿರುವೆ

ಓದದೆ ಬರೆಯದೆ ಬಳಸಲು ಕಲಿತಿಹೆ
ಯಾವ ಗುರುಗಳ ನೆರವಿರದೆ
ಪರೀಕ್ಷೆಯೇ ಇಲ್ಲದೆ ಅಂಕವ ಪಡೆದಿಹೆ
ಉತ್ತಮ ನಾನು ಊರಿನಲೆ

ಸಂದೇಹದ ಜ್ಞಾನವ ಏಕೆನೆ ನೀಡಿಹೆ
ತಿಳಿಯದು ದೇವ ಮನದೊಳಗೆ
ಗೀಚು ನೀ ನಂಬಿಕೆ ಬಾಳಲಿ ಬಳಲಿಹೆ
ಸುಂದರ ಬಾಳಿನ ಪುಟಗಳಿಗೆ
-ಪೆದ್ದರಿಚ್ಚ

ನಿಸರ್ಗವ ಒಮ್ಮೆ ನೋಡು
ತನ್ನನೇ ಧಾರೆಯೆರೆಯುತಿದೆ
ಕೊಟ್ಟರೂ ಬರಿದಾಗುತ್ತಿಲ್ಲ
ದುಃಖ ಕಾಣುವುದಿಲ್ಲ
ಸ್ವಾರ್ಥದ ಸುಳಿವಿಲ್ಲ
ಸಿರಿವಂತ ನೀನು
ಬುದ್ದಿವಂತ ನೀನು
ಕೊಡಲೇಕೆ ಹೆದರುವೆ
ಕೊಡಲಾಗುವುದನು

ನಗುವ ಚೆಲ್ಲುತ್ತಿರು
ಕರವ ನೀಡುತಿರು
ಬತ್ತಿಹೋಗದು ಬಾಳು
ಚೆಲುವ ನೋಡುತಿರು
ಬೆನ್ನ ತಟ್ಟುತಿರು
ಪ್ರೀತಿ ತೋರುತಿರು
ಸಾವೇ ಇರದು ನಿನಗೆ
ನಿರುತ ಬಾಳುತಿರು
-ಪೆದ್ದರಿಚ್ಚ

ಕೈಯ ಬಿಗಿಯಪ್ಪುಗೆಯಲ್ಲಿದ್ದ ಕಾಳಿಗೆ
ಬಿದ್ದ ನೋವು
ಚಿಗುರೊಡೆವ ಭಾರವಸೆಯೇ ಆಸರೆ…
ಭೂಮಿಯ ಅಪ್ಪುಗೆಯಲ್ಲಿದ್ದ ಮೊಳಕೆಗೆ
ಬಿರಿವ ನೋವು
ಸಸಿಯಾಗುವ ಭರವಸೆಯೇ ಆಧಾರ…
ಮಣ್ಣಿನ ಅಪ್ಪುಗೆಯಲ್ಲಿದ್ದ ಸಸಿಗೆ
ಒಡೆವ ನೋವು
ಫಲ ನೀಡುವ ಭರವಸೆಯೇ ಸಾಂತ್ವನ…
ಸಸಿಯ ಅಪ್ಪುಗೆಯಲಿದ್ದ ಫಸಲಿಗೆ
ತೊರೆವ ನೋವು
ಧಾನ್ಯವಾಗುವ ಭರವಸೆಯೇ ಸಂತೃಪ್ತಿ…
ಹುಸುಕಿನ ಅಪ್ಪುಗೆಯಲಿದ್ದ ಧಾನ್ಯಕೆ
ಬಿರಿವ ನೋವು
ಆಹಾರವಾಗುವ ಭರವಸೆಯೇ ಸಮಾಧಾನ…
ನೋವೆಂದೂ ಅಂತ್ಯವಲ್ಲ
ಹೊಸತನಕೆ ನಾಂದಿ
ಎಂಬುದ ಅರಿತು
ನಗುನಗುತಾ ಬಾಳು ಪೆದ್ದರಿಚ್ಚ!

‘ಅಚ್ಚರಿಗೊಂಡೆ’ ಎಂಬುದು
ಇಂದು ಇತಿಹಾಸ
ಮನುಕುಲ ಮಾಡುತಿದೆ
ಅಚ್ಚರಿಯ ಉಪವಾಸ
ದಿನದಿನವೂ ಬೆಳೆಯುತಿದೆ
ಆಧುನಿಕತೆಯ ಅಟ್ಟಹಾಸ
ಅಚ್ಚರಿಗಳಿಲ್ಲದೆ ಬಾಳು
ಕಳೆದುಕೊಳ್ಳುತಿದೆ ಉಲ್ಲಾಸ
ನಿಜವಾಗಿಯೂ ಮರೆತುಹೋಗಿದೆ
ನೈಜತೆಯ ನೋಡುವ ಅಭ್ಯಾಸ
ಕಾರ್ಟೂನ್ ಗಳ ನೋಡಿ
ಬೀರುತಿದೆ ಮಂದಹಾಸ
ಮಾಯವಾಗುತಿದೆ ನಿಜ
ನವೀನತೆ ಕಾಣುವ ಹವ್ಯಾಸ
ಅಚ್ಚರಿಕಾಣದ ಬಾಳು
ದಿಟವಾಗಿಯೂ ವಿಪರ್ಯಾಸ
ದೇವ ನೀಡಿದ ಕಣ್ಣುಗಳಲಿ
ಕಾಣುವುದೇ ಒಂದು ಅಚ್ಚರಿ
ಎಂಬುದ ಅರಿತು
ಅಚ್ಚರಿಗಳ ಕಾಣುವ ವರಕ್ಕಾಗಿ
ಬೇಡುತಿರು ಪೆದ್ದರಿಚ್ಚ!

ಬಣ್ಣವಿಲ್ಲದ ಭೂತ
ವಿಚಿತ್ರವೆಂದರೆ…
ಕತ್ತಲಲಿ ಮಾತ್ರ ಇರುವುದು
ಮನದಿ ಭಯವಿರುವ ತನಕ
ಕಪ್ಪು ಕತ್ತಲಲಿ
ಇಲ್ಲದ ಕಪ್ಪು ಭೂತವು ನಡುಗಿಸುವುದು ಎಮ್ಮನು

ಭಯವೇ ಭೂತವು
ಕಿತ್ತೊಗೆಯಲಾಗದ ಗೋಡೆಯು
ಭಯವು ಮರೆಯಾದೊಡೆ
ಏನೂ ಅಲ್ಲ ಚೀನಾದ ಮಹಾಗೋಡೆಯೂ.

ಭಯದಿ ಸಾಯುವ ಮುನ್ನ
ಭಯದ ಭೂತವು ಸಾಯಲಿ
ದೇವನಿತ್ತ ಬಲದ ನೆರವಲಿ
ಬಾಳು ಗುರಿಯತ್ತಾ ಸಾಗಲಿ
-ಪೆದ್ದರಿಚ್ಚ