ಮರಳಿ ಬಾರದು ಮತ್ತೇ ಗೂಡಿಗೆ
ಹಾರಿ ಹೋದರೆ ಜೀವದಕ್ಕಿಯು
ತಿರುಗಿ ಬಾರದು ನದಿಯು ಬಯಲಿಗೆ
ಒಮ್ಮೆ ಹೋದರೆ ಕಡಲ ಸೇರಲು

ಏನೇ ಆದರೂ ಬೇಗ ಸಾಧಿಸು
ಒಡಲ ಉಸಿರು ನಿಲ್ಲೋ ಮೊದಲು
ಉಪ್ಪು ನೀರಲಿ ಜೀವ ಚಿಗುರದು
ಅರಿಯೋ ಕಡಲ ಸೇರೋ ಮೊದಲು

ಒಮ್ಮೆ ಬಾಳಲು ಒಂದೇ ಬಾಳಿದೆ
ಉಸಿರು ನಿಂತರೆ ಮತ್ತೇ ಏನಿದೆ
ಮರಳಿ ಬಾರದ ಸತ್ಯ ಅರಿಯುತಾ
ಒಳಿತು ಮಾಡುತಾ ಬಾಳು ಸುಖವಿದೆ
-ಪೆದ್ದರಿಚ್ಚ

ಬದಲಾಗುವ ಭಯವಿಲ್ಲದಿರೆ
ಏರಬಹುದು ಸಾಧನೆಯ ಶಿಖರ
ಬದಲಾಗುವ ಮನಸ್ಸಿದ್ದರೆ
ಸಾಗಬಹುದು ಬಲು ದೂರ
ಬದಲಾಗುತಾ ಸಾಗುತಿರೆ
ಸಕಲವೂ ಹೊಸತನದ ಆಗರ
ಬದಲಾಗುವ ಭಯಬಿಡುತಾ ಸಾಗು
ನಿನ್ನ ಬಾಳಾಗುವುದು ಬಂಗಾರ
-ಪೆದ್ದರಿಚ್ಚ

ಇಂದಿನ ಮಾನವನು
ಎಲ್ಲವನು ಬಲ್ಲವನು
ಆದರೆ ಅರಿತಿಲ್ಲ ಇನ್ನೂ
ತನ್ನೊಳಗಿರುವ ಬಲವನು
ತೋರಿದರೆ ಮನಸ್ಸುಮಾಡಿ
ತನ್ನೊಳಗಿನ ಒಲವನು
ಪಡೆಯಬಲ್ಲನೋ ಏನೋ
ತನ್ನೊಳ ಸೇರುವ ಗೆಲುವನು
ಈ ಗೆಲುವಲಿ ಕಾಣಬಲ್ಲನು
ತನಗಿರುವ ನಿಜ ಚೆಲುವನು
ಪೆದ್ದರಿಚ್ಚ

ಸೃಷ್ಟಿಗಿಂತ ಉತ್ತಮ ಗುರು ಇನ್ನೊಬ್ಬರಿಲ್ಲ
ಆದರೆ ಕಲಿಯುವವರು ವಿರಳ
ತೆರೆದ ಸುಂದರವಾದ ಪುಸ್ತಕವದು
ಓದಿ ಕಲಿಯುವುದು ಸರಳ
ನಮ್ಮ ಜೊತೆಗೇ ಇರುವುದು
ನೋಡಿಯೂ ಕಲಿಯದವರು ಬಹಳ

ನೂರಿದೆ ಇನ್ನೂ ಕಲಿಯುವುದು
ಒಮ್ಮೆ ನೋಡಬೇಕು ಬಿಟ್ಟು ಕಂಗಳ
ದೈವ ಚಿತ್ತವ ಮಾಡಲು ಕಲಿಸುವುದು
ಕೇಳಲಾರದೆ ಯಾವುದೇ ಸಂಬಳ
ಕಲಿತಾಗ ಒಡನೇ ಬೆಳಗುವುದು
ಬಣ್ಣ ಬಣ್ಣದಿ ಮನದ ಅಂಗಳ
-ಪೆದ್ದರಿಚ್ಚ

ದೇವಾ, ತಪ್ಪೆಲ್ಲಾ ನಿಂದೆ
ಎಲ್ಲಾ ಜೀವಿಗಳಿಗಿಂತ
ಉತ್ತಮನಾಗಿ
ಮಾನವನ ಮಾಡಿದ್ದು ನೀನು
ಮಾಡ್ಬಾರ್ದಿತ್ತು

ಅದೇನೋ ಪರ್ವಾಗಿಲ್ಲ
ದೇವಾ, ತಪ್ಪೆಲ್ಲಾ ನಿಂದೆ
ಆ ಮಾನವನಿಗೆ ಹೆಚ್ಚಿನ
ಬುದ್ದಿ ಕೊಟ್ಟಿದ್ದು ನೀನು.
ಕೊಡ್ಬಾರ್ದಿತ್ತು

ಅದೇನೋ ಪರ್ವಾಗಿಲ್ಲ
ದೇವಾ, ತಪ್ಪೆಲ್ಲಾ ನಿಂದೆ
ಬುದ್ದಿ ಜೊತೆಗೆ ಸ್ವಾತಂತ್ರ್ಯವನ್ನು
ನೀಡಿದ್ದು ನೀನು
ನೀಡ್ಬಾರ್ದಿತ್ತು.

ಅದೇನೋ ಪರ್ವಾಗಿಲ್ಲ
ದೇವಾ, ತಪ್ಪೆಲ್ಲಾ ನಿಂದೆ
ಮಾನವನ ಮನಸ್ಸಲ್ಲಿ
ಆಸೆ ಇಟ್ಟಿದ್ದು ನೀನು
ಇಡ್ಬಾರ್ದಿತ್ತು.

ಅದೇನೋ ಪರ್ವಾಗಿಲ್ಲ
ದೇವಾ, ತಪ್ಪೆಲ್ಲಾ ನಿಂದೆ
ಆಸೆ ಜೊತೆಗೆ ತುಂಬಾ
ಆಯ್ಕೆಗಳ ಬಿಟ್ಟಿದ್ದು ನೀನು
ಬಿಡ್ಬಾರ್ದಿತ್ತು.

ಅದೇನೋ ಪರ್ವಾಗಿಲ್ಲ
ದೇವಾ, ತಪ್ಪೆಲ್ಲಾ ನಿಂದೆ
ತಪ್ಪು ಮಾಡಿದಾಗಲೆಲ್ಲಾ
ಕ್ಷಮಿಸಿ ತಪ್ಪನು ಸುಟ್ಟಿದ್ದು ನೀನು
ಸುಡ್ಬಾರ್ದಿತ್ತು.
-ಪೆದ್ದರಿಚ್ಚ

ಮನದಾಳದಲಿ
ನೂರೊಂದು ಆಸೆಗಳು
ಅವುಗಳ ಆಯಸ್ಸೋ
ತರಗೆಲೆಯಂತೆ
ಇಂದು ಜನನ
ಕೆಲವೇ ದಿನಗಳಲಿ
ಅವುಗಳ ಶವ ಸಂಸ್ಕಾರ.
ಒಳ್ಳೆಯದೇ ಬಿಡಿ
ನನಗೇನು ದುಃಖವಿಲ್ಲ
ಸಾವಿರ ದಿನ ಇಲಿಯಾಗಿ
ಇರುವುದಕ್ಕಿಂತ
ಮೂರು ದಿನ ಹುಲಿಯಾಗಿರು
ಎನ್ನುತ್ತಿದ್ದರು ಹಿರಿಯರು!
ಆದರೆ
ನನ್ನಾಸೆಗಳಿಗೋ
ಅರ್ಥವೂ ಇಲ್ಲ
ಸತ್ವವೂ ಇಲ್ಲ
ನೂರು ದಿನ ಮೂರು ದಿನ
ಎರಡೂ ಒಂದೇ…

ದೇಹಾತ್ಮಗಳು ಇದ್ದರೂ
ಆಸೆಗಳ ಸಿಂಹಪಾಲು
ಮಣ್ಣಾಗುವ ದೇಹದ್ದೇ
ಅದಕ್ಕೋ ಏನೋ
ಆಸೆಗಳೂ ಬೇಗ
ಮಣ್ಣಾಗುತ್ತವೆ.
ಆತ್ಮದ ಆಸೆಗಳು
ಕೆಲವೇ ಕೆಲವೂ
ಆದರೆ…
ಕಿವಿಗೊಡುವವರು ಯಾರು!
ಆಸೆಗಳ ತೀರಿಸುವ
ಮುಗಿಯದ ಆಟದಲಿ
ದೇಹವೂ ಸಾವಿಗೆ ಸಿದ್ಧವಾಗಿದೆ…
ಆತ್ಮದ ಆಸೆಗೆ ಕಿವಿಗೊಟ್ಟಿದ್ದರೆ
ಸಾವು ದೂರವಾಗುತ್ತಿತ್ತೋ ಏನೋ!!!!

ಒಂದೇ ಒಂದು ನೋಟ ಸಾಕು
ಪ್ರೀತಿಯಲ್ಲಿ ಬೀಳಲು
ನೋಟ ಸಾಕೇ ಪ್ರೀತಿ ಮಾಡಲು
ಮತ್ತೊಮ್ಮೆ ನೋಡಬೇಕು
ಪ್ರೀತಿಯನ್ನು ಅರಿಯಲು
ಪ್ರೀತಿಯಲ್ಲಿ ಜೊತೆಗೆ ಬಾಳಲು

ಇನೊಮ್ಮೆ ನೋಡಬೇಕು
ಪ್ರೀತಿಯನ್ನು ಸವಿಯಲು
ಪ್ರೀತಿಯಲ್ಲಿ ಬೆರೆತು ಬೆಳೆಯಲು
ನೋಟ ಮಾತ್ರ ಸಾಲದು
ಅವಿತ ಪ್ರೀತಿ ಅರಿಯಲು
ತೆರೆದ ಹೃದಯ ಬೇಕು ತಿಳಿಯಲು

ಮನದ ಕಣ್ಣ ತೆರೆಯದೆ
ಪ್ರೇಮದಂದ ಅರಿಯದು
ದೈವ ಪ್ರೇಮ ಸವಿಲಾಗದು
ದೈವ ಪ್ರೀತಿ ಸವಿಯದ
ಪ್ರೀತಿ ಹೆಚ್ಚು ಬಾಳದು
ಮನದಿ ಸುಖವ ಪಡೆಯಲಾಗದು
-ಪೆದ್ದರಿಚ್ಚ

ಭಯವಿಲ್ಲದ ಮನಸ್ಸು
ಹೊಳೆವ ಮುತ್ತಂತೆ
ಕೊಳ್ಳಲಾಗದ ಸೊತ್ತಂತೆ
ಭಯವ ಗೆಲ್ಲದ ಮನಸ್ಸು
ಬದುಕಿದರೂ ಸತ್ತಂತೆ

ಭಯವಿಲ್ಲದ ಮನಸ್ಸು
ಹಸಿರ ಬನವಂತೆ
ಕಳೆದುಕೊಳ್ಳದ ಧನವಂತೆ
ಭಯವ ಗೆಲ್ಲದ ಮನಸ್ಸು
ನಡೆದಾಡುವ ಹೆಣವಂತೆ

ಭಯವಿಲ್ಲದ ಮನಸ್ಸು
ವಿಶಾಲ ಸಾಗರವಂತೆ
ಸದ್ಗುಣದ ಆಗರವಂತೆ
ಭಯವ ಗೆಲ್ಲದ ಮನಸ್ಸು
ಉಗಿಯಲಾಗದ ಒಗರಂತೆ

ಭಯವಿಲ್ಲದ ಮನಸ್ಸು
ಹೊಸ ಜೇನ ಸಿಹಿಯಂತೆ
ಅಳಿಸಲಾಗದ ಸಹಿಯಂತೆ
ಭಯವ ಗೆಲ್ಲದ ಮನಸ್ಸು
ಉಣಲಾಗದ ಕಹಿಯಂತೆ

ಭಯವಿಲ್ಲದ ಮನಸ್ಸು
ದೇವರ ಆಲಯವಂತೆ
ಶಾಂತಿ ಪ್ರೀತಿಯ ನಿಲಯವಂತೆ
ಭಯವ ಗೆಲ್ಲದ ಮನಸ್ಸು
ಗೊಂದಲದ ವಲಯವಂತೆ
-ಪೆದ್ದರಿಚ್ಚ

ದೇವರ ಕಾಣುವ ಹಂಬಲ
ನಿನಗೂ ಇದೆ
ನನಗೂ ಇದೆ
ನಮ್ಮ ಹುಡುಕುವ ರೀತಿ ಮಾತ್ರ
ಇನ್ನೂ ಹಾಗೇ ಇದೆ
ನೋಡುವ ರೀತಿ ಅಂತೂ
ಇನ್ನೂ ವಕ್ರವಾಗಿದೆ.

ಹುಡುಕುತಿರುವೆಯಾ ಕಾಣಲು
ಆತನೇನೂ ಕಾಣೆಯಾಗಿಲ್ಲ
ತಟ್ಟುತಿರುವೆಯಾ ಬಾಗಿಲನು
ಆತನ ಸನ್ನಿಧಾನಕೆ ಬಾಗಿಲೆ ಇಲ್ಲ
ಕೂಗುತ್ತಿರುವೆಯಾ ಕರೆಯಲು
ಆತನೆಂದೂ ಕಿವುಡನಾಗಿಲ್ಲ

ಬದಲಾಗಬೇಕು ನಾನು ನೀನು
ನೋಡಲು ಸೃಷ್ಟಿಯಲ್ಲಡಗಿರುವ ಸೃಷ್ಟಿಕರ್ತನನು
ಬದಲಾಗಬೇಕು ನಾನು ನೀನು
ನೋಡಲು ಪರರಲ್ಲಿರುವ ದೇವನನು
ಬದಲಾಗಬೇಕು ಗೆಳೆಯ ನಾನು ನೀನು
ಕಾಣಬೇಕಾದರೆ ಕಣ್ಣು ಮುಚ್ಚಿದಾಗಲೂ ಆತನನು
-ಪೆದ್ದರಿಚ್ಚ

ದೇವರ ಪ್ರೀತಿಗೆ ಸಾಕ್ಷಿಯು ನೂರಿದೆ
ತೆರೆದರೆ ಮನದ ಕಣ್ಣುಗಳ
ಪಡೆವೆವು ಹೃದಯದ ಬಾಗಿಲ ತೆರೆದರೆ
ತಿನ್ನಲು ಸ್ವರ್ಗದ ಹಣ್ಣುಗಳ

ಸತ್ಯವ ಅರಿಯಲು ನಿತ್ಯದ ಬಾಳಲಿ
ಸಾಕ್ಷಿಯು ಬೇಕಿದೆ ಒಂದೆರಡು
ಸಾವಿರ ಕಾರಣ ಇದ್ದರೂ ಎದುರಲಿ
ದೇವರ ಕಾಣದು ಈ ಕುರುಡು

ನಿನ್ನಯ ಬೆಳಕನು ಮೂಡಿಸು ಎನ್ನಲಿ
ಸರಿಸುತಾ ಮನದ ಕಾರಿರುಳು
ಎನ್ನನು ನಡೆಸು ನಿನ್ನಯ ಪಥದಲಿ
ಹಿಡಿಯಲು ನೀಡುತಾ ನಿನ ಬೆರಳು
-ಪೆದ್ದರಿಚ್ಚ