ಸೃಷ್ಟಿಯ ನೋಡಿ ಚಿಕ್ಕದು ಎನ್ನಬೇಡ
ಅದರ ಸೃಷಿಕರ್ತನ ನೋಡು
ಕಿರಿದು ಎಂದು ಹಲ್ಲು ಕಿರಿಯಬೇಡ
ಅಡಗಿರುವ ಶಕ್ತಿಯ ನೋಡು

ಬೀಜ ನೋಡಲು ಕಿರಿದು
ಮರವಾಗುವ ಮೊದಲು
ಬೆಳೆದು ಮರೆಯಾದುದು
ಕಾಣದು ರಾತ್ರಿ ಹಗಲು

ಕಣ್ಗಳ ತೆರೆದು ನೀ ನೋಡು…
ಕಿರಿದು ಹಿರಿದೆನ್ನದೇ ನೋಡು
ಕಣ್ಣೆರಡು ಸಾಲವು ಕಾಣಲು
ಆತನ ಪವಾಡಗಳ ಸಾಲು
ಪೆದ್ದ ರಿಚ್ಚಾ

ನೀಡಿದಾಕ್ಷಣ ಖಾಲಿಯಾಗುವುದಿಲ್ಲ
ನೀಡುವವನು ಬಡವನಾಗುವುದಿಲ್ಲ
ದಾನ ಮಾಡಿದವನು ದಣಿಯಾಗುವನು
ದಾನ ಪಡೆದವನು ಋಣಿಯಾಗುವನು

ನೀಡುವ ಮನಸ್ಸು ನೀಗುವುದು ಆಪತ್ತು
ಪಡೆದವನ ನಗುವೆ ಅಳಿಯದ ಸಂಪತ್ತು

ಓ ಪೆದ್ದರಿಚ್ಚಾ,
ಇರಲೊಂದು ಹಸಿವು ನಿನ್ನ ಹಸಿವಿನ ಜೊತೆಗೆ

ಹಸಿವು ನೀಗುವ ಹಸಿವಿರುವ ವರೆಗೆ
ಹಸಿವು ಸುಡದು ಹಸಿವಿರುವವರಿಗೆ

ದಾಹವು ತೀರದ ರಕ್ಕಸರಿಹರು
ಮುಗ್ದರ ರಕುತವ ಹೀರುವರು
ಪ್ರೀತಿಯ ಅರಿಯದ ಕುರುಡರು ಇಹರು
ದೀನರ ಕಣ್ಣನು ಕುಕ್ಕುವರು
ಬೆವರನು ಸುರಿಸದ ಅಸುರರು ಇಹರು
ಬಡವರ ಬೆವರನು ಕುಡಿಯುವರು
ಜ್ಞಾನವ ಅರಿಯದ ಲಫಂಗರು ಇಹರು
ಜ್ಞಾನಿಗೆ ಗೋರಿಯ ಕಟ್ಟುವರು

ಅರಿಯೋ ನೀ ರಕ್ಕಸ ಅಳಿಯುವೆ ನೀನು
ನಿನ್ನಯ ಬೊಕ್ಕಸ ಒಣಗುವುದು
ನೆತ್ತರ ಕುಡಿಯುತಾ ಬಾಳುವ ನಿನ್ನಲಿ
ನಿನ್ನಯ ರಕುತಕೆ ಬೆಲೆ ಇರದು
ಹೆದರಿಸಿ, ವಂಚಿಸಿ ಬಾಳುವ ಜೀವನ
ಪ್ರಾಣಿಗೆ ಸರಿಸಮವಾಗುವುದು
ಬೆವರಿನ ಪಾನವು ನಿನ್ನಯ ಪಾಲಿಗೆ
ಪಾಷಣ ಪಾನಕವಾಗುವುದು
-ಪೆದ್ದರಿಚ್ಚ

ಪ್ರೀತಿಯ ಕಡಲಲಿ ತೇಲಿದರೂ
ಪ್ರೀತಿಯ ರುಚಿ ಸಿಗದಾಯಿತು
ಪ್ರೀತಿಯ ಜೊತೆಯಲಿ ಸಾಗಿದರೂ
ಪ್ರೀತಿಯ ಪರಿಚಯ ಮಾಸಿತು
ಹೃದಯದ ಒಡಲಲಿ ಜಾಗವು ಇರದಿರೆ
ಪ್ರೀತಿಯ ನಂಟು ಕಸಿಯಿತು!

ಪ್ರೀತಿಯ ಸಿಂಚನ ಮೂಡಲು
ಹೃದಯದ ಬಡಿತವು ಚಿಗುರಿತು
ಪ್ರೀತಿಯ ಸೆಳೆತವು ಏರಲು
ಹೃದಯದ ಮಿಡಿತವು ಬಲಿಯಿತು
ಹೃದಯದ ಮನೆಯಲಿ ಚಿಂತೆಯ ಕಸವಿರೆ
ಪ್ರೀತಿಯ ನಂಟು ಕಸಿಯಿತು!

ಪ್ರೀತಿಯ ಗುರಿಯು ತಿಳಿಯಿತು
ಮನಸ್ಸಿಗೆ ದಿಕ್ಕು ತೋಚಿತು
ಪ್ರೀತಿಯು ಸೇವೆಯ ಅಪ್ಪಿತು
ಹೃದಯಕೆ ತೃಪ್ತಿಯು ಲಭಿಸಿತು
ಹೃದಯದ ಗೂಡಲಿ ಆಸೆಯು ತುಂಬಿರೆ
ಪ್ರೀತಿಯು ಉಸಿರನು ಬಿಟ್ಟಿತು!
-ಪೆದ್ದರಿಚ್ಚ

ಕತ್ತಲು ಬೆಳಕನು ಜಯಿಸದು
ಮೋಸವು ನೀತಿಯ ಮರೆಸದು
ಮಿಥ್ಯವು ಸತ್ಯವ ಅಳಿಸದು
ಜಗವೇ ತಲೆಕೆಳಗಾದರೂ…

ರೋಷವು ಪ್ರೇಮವ ಮುರಿಯದು
ದ್ವೇಷವು ಕ್ಷಮೆಯ ಬಿರಿಯದು
ಸ್ವಾರ್ಥವು ತ್ಯಾಗವ ಹುರಿಯದು
ಜಗವೇ ತಲೆಕೆಳಗಾದರೂ…

ವಿಷವೂ ಅಮೃತವಾಗದು
ಕಹಿಯು ಸವಿ ಸಿಹಿಯಾಗದು
ನೋವಲಿ ಸುಖವು ಲಭಿಸದು
ಜಗವೇ ತಲೆಕೆಳಗಾದರೂ…

ಒಳಿತನು ಸಾರುವ ನಿನಗೆ
ಸೋಲಿನ ಭಯವೇತಕೆ!
ಸತ್ಯದಿ ಬಾಳುವ ನಿನಗೆ
ವೈರಿಯ ಪರಿವೆ ಏತಕೆ!
ಸಾಗು ನೀ ಸಾಗು ನೀ ಮುಂದೆ
ಹೆದರದೆ ನೋಡದೆ ಹಿಂದೆ
ಸಾಕು ಸತ್ಯದ ಬಲವೊಂದೆ
ಆಗಲು ಅಮರನು ಮುಂದೆ!
-ಪೆದ್ದರಿಚ್ಚ

ಕತ್ತಲ ಜಗದಲಿ ಕತ್ತಲ ನೀಗಲು
ಬೆಳಕನು ತಂದ ಬೆಳಕಿನ ಒಡೆಯ
ಸ್ವಾರ್ಥದ ಒಡಲಲಿ ಪ್ರೀತಿಯ ತುಂಬಲು
ಕಲಿಸಲು ಬಂದ ಪ್ರೇಮದ ನಡೆಯ

ಮೊಗದಲಿ ಮಸಿಯೇ ಆಗಲು ರೂಪವು
ಒಳಗಿನ ಅಂದವ ತೋರಲು ಬಂದ
ಸ್ವಾರ್ಥವೇ ಬಾಳಿನ ನಾವಿಕನಾಗಿರೆ
ತ್ಯಾಗದ ದಿಕ್ಕನು ತೆರೆಯ ಬಂದ

ಸಿರಿತನ ತಾರೆಯು ಮೊಳಗಲು ಗಗನದಿ
ದೀನತೆ ಚಂದಿರ ಆಗಿ ಬಂದ
ಸ್ವಾಗತ ಕೋರಲು ಜನತೆಯು ಕಾಯಲು
ಅರಿಯದ ದಿಕ್ಕಲಿ ಅರಳಿ ಬಂದ

ಬೆಳಕಲೂ ಮಿನುಗುವ ಉಜ್ವಲ ತಾರೆಯೇ
ಕತ್ತಲ ಕೋಣೆಯ ಬಾಗಿಲ ತೆರೆಸು
ನೋವಲೂ ಪ್ರೀತಿಯ ಹರಿಸುವ ದೇವನೆ
ಬೆಳಕಲಿ ಬಾಳಲು ಎನ್ನ ಹರಸು
-ಪೆದ್ದರಿಚ್ಚ

ಮನದಾಳದ ಮೌನ ಹಾಡಿಗೆ
ನುಡಿ ನೀನು ದೇವಾ ಶರಣಾದೆ ನಾ
ನನ್ನಂತರಂಗದ ಸವಿ ಮಾತಿಗೆ
ಭಾವ ನೀನು ಶಿರಬಾಗುವೆ ನಾ

ಎನ್ನ ಒಳದನಿಯ ತಾಯಿ ನೀನಲ್ಲವೇ
ನಿನ್ನ ನುಡಿಯು ಅದರ ಗುರುವಲ್ಲವೇ
ನಿನ್ನ ಮಗುವ ಕರಹಿಡಿದು ಮುನ್ನಡೆಸ ಬಾ
ನಿನ್ನ ಹಾದಿ ಬಿಡದಂತೆ ಕಾಪಾಡ ಬಾ
ನಿನ್ನ ಧ್ವನಿಯ ಪ್ರತಿಧ್ವನಿಯು
ನಿನ್ನ ಬಿಂಬದ ಪ್ರತಿಬಿಂಬವು
ನಿನ್ನ ಪ್ರೀತಿಯ ಸಾಧನ ನೀ ಮಾಡ ಬಾ

ನನ್ನ ಒಡಲಿನ ಸ್ಪರ್ಶ ನೀನಲ್ಲವೇ
ನನ್ನ ಭಾವಕೆ ಅರ್ಥ ನಿನ್ನಿಂದಲೇ
ನನ್ನ ಒಡಲಿನ ಮಡಿಲಲ್ಲಿ ಹೂವಾಗ ಬಾ
ನನ್ನ ಭಾವದ ಕಡಲಲ್ಲಿ ಮಗುವಾಗ ಬಾ
ನಿನ್ನ ಕರದ ಕಿರು ಬೆರಳು
ನಿನ್ನ ಸ್ವರದ ಸವಿ ಹರಳು
ನಿನ್ನ ನುಡಿಯ ಸಾರುವ ದನಿಯಾಗಿಸ ಬಾ.
-ಪೆದ್ದರಿಚ್ಚ

ಎಲ್ಲವೂ ಸಿಗುವುದು ನಶ್ವರ ಜಗದಲಿ
ಜೀವ ನೀಡುವ ವರದ್ಹೊರತು
ಕೃಪೆಯನು ಹಣದಲಿ ಕೊಳ್ಳಲು ಆಗದು
ಪ್ರೀತಿ ಭಕ್ತಿಯ ಬಲದ್ಹೊರತು.

ಹಣವಿದೆ ಹರುಷಕೆ ಆದರೂ ಕೊರತೆ
ಕೊಳ್ಳಲು ಏನಿದೆ ನಿರುತವು ಚಿಂತೆ
ಒಳಿತನೇ ಬಯಸುವ ಹೃದಯದ ನಡತೆ
ದೇವನ ಅರಿಯದೆ ಸೊರಗಿದೆ ಒರತೆ!

ದೇವನ ಅನುಗ್ರಹ ಅನನ್ಯ ಸಿರಿತನ
ಎಲ್ಲೆಯ ಅರಿಯದ ಶಾಶ್ವತ ಗೆಳೆತನ
ನಿನ್ನಲಿ ಚಿಗುರಲು ಆತ್ಮಿಕ ಬಡತನ
ಅಳಿಯದೆ ಉಳಿವುದು ನಿನ್ನಯ ಮನೆತನ
– ಪೆದ್ದರಿಚ್ಚ

ಜ್ಞಾಪಿಸು ಮನವೇ ಈ ಈ ಕ್ಷಣವೇ
ದೇವನ ಎಂದು ವಂದಿಸಿದೆ?
ಕರ್ತನು ಸುರಿದ ಅಗಣಿತ ವರಕೆ
ಮರೆಯದೆ ಎಂದು ವಂದಿಸಿದೆ?

ದೇವನು ಇರದೇ ಬಾಳು ಶೂನ್ಯವು
ಅರಿತು ಪ್ರಾರ್ಥಿಸಿ ವರ ಪಡೆದೆ
ಶೂನ್ಯಕೆ ಬೆಲೆಯ ಪಡೆದ ಕೂಡಲೇ
ದೇವನ ಮರೆತು ಹೊರ ನಡೆದೆ.

ಅಬಲನು ನಾನು ಮರೆತೆನು ನಿನ್ನನು
ನಮಿಸದೆ ಪಡೆದ ವರಗಳಿಗೆ
ಇನ್ನೊಂದೇ ವರವ ಬೇಡುವೆ ನೀಡು
ಕೃತಜ್ಞತಾ ಭಾವನೆ ನನ್ನೊಳಗೆ!
-ಪೆದ್ದರಿಚ್ಚ

ಸ್ವಾರ್ಥದ ಬದುಕಿಗೆ ಸಾವಿದೆ ಬೇಗನೆ
ಅಳುವರು ಯಾರೋ ನಿನ್ನೆದುರು?
ನಿನ್ನಯ ಕಣ್ಣಲಿ ಸೋರದು ಕಂಬನಿ
ಭಾವನೆ ಅರಿಯದ ಹೆಣ ನೀನು!

ಪ್ರೀತಿಯ ಕಾಣದ ಹೃದಯವು ಮಸಣವು
ಬೆಳಕನು ಅರಿಯದ ಕಾರ್ಮುಗಿಲು
ಸಾಯುವ ಮೊದಲೇ ಮಸಣದ ಬಾಳು
ಬಯಸುವೆ ಏಕೆ ನೀ ಹೇಳು?

ಹೃದಯದ ಗುಡಿಯಲಿ ಪೂಜಿಸು ದೇವನ
ಪ್ರೀತಿ ಸೇವೆಯ ಹೂ ಬಳಸಿ
ಕಿಲಕಿಲ ನಗುತಲಿ ಬರುವನು ದೇವನು
ನಿನ್ನಯ ಬಳಿಗೆ ನಿನ್ ಹರಸಿ!
– ಪೆದ್ದರಿಚ್ಚ