ನಂಬಿಕೆ ಇಲ್ಲದ ನಿನ್ನಯ ಬಾಳು
ನೀರೇ ಇಲ್ಲದ ಮರುಭೂಮಿ
ನಂಬಿಕೆ ಕಾಣದ ನಿನ್ನಯ ಮನವು
ಏನು ಬೆಳೆಯದ ಒಣಭೂಮಿ

ನಂಬಿಕೆ ಬೆಳೆಯಲಿ ನಿನ್ನಯ ಬಾಳಲಿ
ಬದುಕಿದೆ ನಿನಗೆ ಜಗದಲ್ಲಿ
ನಂಬಿಕೆ ಬೆಳೆಯನು ಮನದ ಹೊಲದಲಿ
ಬೆಳೆದರೆ ಬಾಳಿದೆ ಇಹದಲ್ಲಿ

ನಂಬಿಕೆ ಸಿಂಚನ ಆಗಲಿ ಬಾಳಿಗೆ
ಸಂತಸ ಕಾದಿದೆ ಕ್ಷಣದಲ್ಲಿ
ಅರಿಯದೆ ಮನುಜನು ನಂಬಿಕೆ ಮುರಿದರೆ
ನೋವಿನ ಸುರಿಮಳೆ ಮನದಲ್ಲಿ
– ಪೆದ್ದರಿಚ್ಚ

ಸುಳ್ಳಿನ ಮನೆಯಲಿ
ಏಕೆ ನೀ ಬಾಳುವೆ
ಹೊರಗಡೆ ಬಾ
ಬಲು ಬೇಗ
ಸುಳ್ಳಿನ ಮನೆಗೆ
ನಾಶವು ಕಾದಿದೆ
ಮೈಯನು ಕೊಡವಿ
ಬಾ ಬೇಗ
ಸುಳ್ಳಿನ ಮನೆಯಲಿ
ಸಾವಿರ ನೋವಿದೆ
ಬಾಗಿಲ ಮುಚ್ಚಿ
ಬಾ ಬೇಗ
ಸತ್ಯದ ಗುಡಿಯಲಿ
ಸಂತಸ ಬಾಳಿದೆ
ಒಳಗಡೆ ಹೋಗಲು
ಬಾ ಬೇಗ
-ಪೆದ್ದರಿಚ್ಚ

ಸ್ವಾರ್ಥದ ಬಾವಿ
ಅದರೊಳಗೆ ನಾ ಕಪ್ಪೆ
ನನ್ನದೇ ಆದ ಒಂದು ಪ್ರಪಂಚ

ತಿಳಿಯುವ ಹಂಬಲ
ಅದು ಬಾವಿಯಲಿ ಸೆರೆ
ಮಲಗಲೊಂದು ಆಲಸ್ಯದ ಮಂಚ

ಬಿಟ್ಟು ಹೊರಬರಬೇಕು
ನಾ ಬಾಳುವ ಬಾವಿ ಒಮ್ಮೆ
ಕಾಣಲು ದಿವ್ಯ ವೈಭವದ ಕುಂಚ

ಕಣ್ತೆರೆದು ನೋಡಬೇಕು
ಸುತ್ತ ಮುತ್ತಾ ಒಳಗೆ ಹೊರಗೆ
ಬಾಳ ಸವಿಯಲು ಕೊಂಚ
-ಪೆದ್ದರಿಚ್ಚ

ತಲೆಯಂತಿಲ್ಲ ಕಾಲು
ಕಾಲಿನಂತೆ ಮೊಗವು
ಮೂಗಿನಂತಿಲ್ಲ ಕೈ
ಬೆರಳಿನಂತೆ ಕಣ್ಣು

ನೋಡದು ಹೃದಯ
ಕೇಳದು ಹೊಟ್ಟೆ
ಹಿಡಿಯದು ಜಠರ
ನುಂಗದು ರೊಟ್ಟೆ

ಆದರೂ ಎಲ್ಲವೂ
ಒಂದೇ ದೇಹ
ಬೆಳೆಯಲು ಜೊತೆಗೆ
ಬೆಸೆದಿಹ ದೇವ

ಜಗದ ದೇಹದಿ
ಎಲ್ಲರೂ ಒಂದೇ
ತಿಳಿದರೆ ಇದನು
ಸ್ವರ್ಗವು ಇಂದೇ
– ಪೆದ್ದರಿಚ್ಚ

ಯಾರಿಗಿಲ್ಲ ಹಸಿವು ಹೇಳಿ
ಹಸಿವಿಗೆ ದಾಸರು ನಾವು
ಅದನ್ನರಿಯದವರು ಯಾರು ಹೇಳಿ
ಅದ ಗೆಲ್ಲದವರಿಗೆ ಸಾವು

ಹಸಿವು ನೀಡಿದ ದೇವನಿಗೆ
ಹೇಳಬೇಕು ವಂದನೆ
ಅದಿರದೇ ಹೋಗಿದ್ದರೆ
ಭೋಜನಕೆಲ್ಲಿತ್ತು ಬೆಲೆ

ಹಸಿವೆ ನೀಗಲು ದುಡಿತ
ಹಸಿವು ನೀಗಲು ಮಿಡಿತ
ಎರಡು ಹೊತ್ತಿನ ಭೋಜನಕೆ
ಕಿರು ಬಾಳಿನ ತುಡಿತ
-ಪೆದ್ದರಿಚ್ಚ

ದೇವನ ಎದುರಲಿ ನಿಲ್ಲಲು ತಿಳಿಯಿತು
ಎಲ್ಲರು ಒಂದೇ ಸೃಷ್ಟಿಯಲಿ
ಭೇದ ಭಾವವು ಮನುಜನ ಕಣ್ಣಲಿ
ಕಣ್ಣನು ತೆರೆಯದ ಕುರುಡನಲಿ

ದೀನತೆ ಇರುವ ಮನುಜನ ಮನದಲಿ
ಗೌರವ ಅಡಗಿದೆ ಹೃದಯದಲಿ
ದೇವನ ಸವಿದಿಹ ಭಕುತನ ಬಾಳಲಿ
ಶೇಷ್ಠತೆ ಅರಳಿದೆ ಮಾತಿನಲಿ

ನಿಲ್ಲಲು ಅನುದಿನ ದೇವನ ಎದುರಲಿ
ಪ್ರೀತಿಯ ಅರಿಯುವೆ ಮನದಲ್ಲಿ
ಅರಿಯಲು ಪ್ರೀತಿಯ ನಿನ್ನಯ ಮನದಲಿ
ಪರನನು ಗೆಲ್ಲುವೆ ಜಗದಲ್ಲಿ
-ಪೆದ್ದರಿಚ್ಚ

ಸಾವಿಗೆ ಯಾರೂ ಹೊರತಲ್ಲ
ಎಲ್ಲರ ಮರೆಯದೆ ಅಪ್ಪುವುದು
ಸಮಯವು ಯಾರಿಗೂ ಕಾಯಲ್ಲ
ಎಲ್ಲರ ಕೊನೆಗೆ ಒಯ್ಯುವುದು

ಜೀವನ ಜಗದಲಿ ಉಳಿಯಲ್ಲ
ಸಾವಲಿ ಅಂತ್ಯವ ಕಾಣುವುದು
ಒಳಿತಿನ ಬಾಳು ಅಳಿಯಲ್ಲ
ಸಾವಿನ ಬಳಿಕವೂ ಸಾಗುವುದು

ಭಕುತಗೆ ಸಾವಿನ ಭಯವಿಲ್ಲ
ಕೊನೆಯಲಿ ದೇವನ ಕಾಣುವನು
ನಂಬುವ ಮನಸ್ಸಿಗೆ ಸಾವಿಲ್ಲ
ದೇವರ ಜೊತೆಗೆ ಬಾಳುವನು
-ಪೆದ್ದರಿಚ್ಚ

ಹುಟ್ಟುತ ಬಂದೆ ಈ ಭುವಿಗೆ
ಆ ದೇವನ ವರ ಪಡೆದು
ಸಾಧನೆಯೊಂದ ಜಗದೊಳಗೆ
ಮಾಡುವ ಗುರಿ ಹಿಡಿದು

ಸಾಧಿಸಿ ಹೋಗುವ ಛಲವಿರಲಿ
ದೇವನ ಬಲವಿದೆ ನಿನಗೆ
ಸೋಲಿನ ಭಯವು ಬರದಿರಲಿ
ನಿನ್ನಯ ಸಾಧನೆ ಹೊಸದೆ

ಭಗವಂತನು ಭುವಿಗೆ ಕಳಿಸಿಹನು
ನೀಡಲು ನಿನ್ನಯ ಕೊಡುಗೆ
ಸಕಲವ ನಿನಗೆ ನೀಡಿಹನು
ಬೆಳಗಲು ದೀಪವ ಭುವಿಗೆ

ಜೀವನ ನಿನ್ನಯ ಮುಗಿಸದಿರು
ನೀಡದೆ ನಿನ್ನಯ ಸೇವೆಯನು
ಬರೆಯಲು ಪದಗಳ ಹೆದರದಿರು
ಮುಗಿಸಲು ಸುಂದರ ಕವನವನು
-ಪೆದ್ದರಿಚ್ಚ

ಜಗವೆಲ್ಲಾ ಇರುಳ ಕಾಣಲು
ಭಕುತ ಇರುಳಾಚೆಗಿನ ಬೆಳಕು
ಭರವಸೆ ಮನದಲಿರಲು
ಇರುಳೊಂದು ಅಳುಕು ಬಳುಕು

ಇರುಳು ಬಾಳದು ಹೆಚ್ಚು
ಸಾವದಕೆ ಬರಲು ಬೆಳಕು
ದೂರವನು ದಿಟಡಿ ಕಾಣಲು
ಇರುಳೊಂದು ಅಳುಕು ಬಳುಕು

ನೋವೂ ಸಹಿಸಲಾಗದ ಇರುಳು
ಕಾಣದಿದ್ದರೆ ವಿಶ್ವಾಸದ ಬೆಳಕು
ಕಣ್ಣೆತ್ತಿ ದೇವನ ನೋಡಲು
ಇರುಳೊಂದು ಅಳುಕು ಬಳುಕು
-ಪೆದ್ದರಿಚ್ಚ

ಭಕುತನು ಕೂಗಿದ ಭಜನೆಯಲಿ
ಹೃದಯದ ಕದವನು ಮುಚ್ಚಿ
ಕೀರ್ತನೆ ಹಾಡಿದ ಬಾಯಿಯಲಿ
ಇಳಿಸದೆ ಹೃದಯಕೆ ಬಿಚ್ಚಿ

ಸಾಲವು ನಮ್ಮಯ ಪೂಜೆಗಳು
ಮೆಚ್ಚುಗೆ ಪಡೆಯಲು ದೇವನಲಿ
ಮಿಡಿಯಲು ಎಮ್ಮಯ ಹೃದಯಗಳು
ದೇವನು ಎದುರು ಕ್ಷಣಗಳಲಿ

ಹೃದಯವು ಬೆರೆಯಲಿ ಪೂಜೆಯಲಿ
ದೇವನ ಸ್ಮರಿಸುತಾ ಭಕ್ತಿಯಲಿ
ಪ್ರೀತಿಯು ಬೆರೆಯಲಿ ಭಜನೆಯಲಿ
ದೇವನು ವಾಸಿಪ ಮನಗಳಲಿ
-ಪೆದ್ದರಿಚ್ಚ