ಸಾವಿಲ್ಲದ ಬದುಕಿಲ್ಲ
ಸಾಯಲೇಬೇಕು ನಾವು
ಸಾಯಲು ಭಯವೇಕೆ
ಜೊತೆಗಿಹುದು ಸೃಷ್ಟಿಯು
ಬಾಳೋಣ ಅನುದಿನ
ಭಯವ ದೂರವಿಟ್ಟು
ಬಾಳ ಗುರಿಯನು
ತಲುಪಲು ಪಣತೊಟ್ಟು

ಅಂತ್ಯ ಬೇಕಿದೆ
ಹೊಸತನವ ಕಾಣಲು
ಸಾವು ಬೇಕಿದೆ
ಸೃಷ್ಟಿಕರ್ತನ ಸೇರಲು

ಅಂತ್ಯದ ಭಯಬೇಡ
ಗುರಿಯ ನೋಡುತಿರು
ಸಾವನು ಜಯಿಸುವೆ
ದೇವನ ನೋಡುತಿರು
ಪಯಣಿಗರು ನಾವು
ಭುವಿಯಲ್ಲಿ ಅರಿತಿರು
ಜೊತೆಗೆ ದೇವನಿಹನು
ಭಯವಿಲ್ಲದೆ ಸಾಗುತಿರು
-ಪೆದ್ದರಿಚ್ಚ

ಇಹನೊಬ್ಬ ನಿನ್ನೊಳಗೆ
ಪ್ರೀತಿಗಾಗಿ ಹಾತೊರೆವ
ಪ್ರೀತಿಸಬಲ್ಲ ಪ್ರೇಮಿ
ಮೌನಿಯಾಗು ಒಮ್ಮೆ
ಆತನ ಎದುರಾಗಲು…
ಎಬ್ಬಿಸಲು ಒಳಗಿರುವ
ಆ ಪ್ರೇಮಿಯನು
ಒಮ್ಮೆ ಧ್ಯಾನಿಯಾಗು…
ಧ್ಯಾನಿಯಾಗಲು ನೀನು
ನೈಜ ಪ್ರೇಮಿಯಾಗು…
ಮೌನದ ಧ್ಯಾನದಲಿ
ಸಿಗುವನು ಪ್ರೇಮಿಯು
ಕೇಳುವುದಾಗ ನಿನಗೆ
ಹಂಬಲಿಸುವ ಪ್ರೇಮಿಯ
ಹೃದಯದ ಬಡಿತ
ತನ್ನ ಪರಮ ಪ್ರೇಮಿಯ
ಪ್ರೀತಿಯ ಸುಧೆಯಲಿ
ದೂರವಾಗದಂತೆ ಒಂದಾಗಲು…
-ಪೆದ್ದರಿಚ್ಚ

ಕಾಣದ ದೇವನ ಕಾಣದ ಮೊಗವು
ಕಣಕಣದಲೂ ಇಂದು ನಗುತಲಿದೆ
ಕಣ್ಣಿಗೆ ಕಾಣದ ಕೀಟದ ಮೊಗದಲೂ
ದೇವನ ದಂತವು ಹೊಳೆಯುತಿದೆ

ಸೃಷ್ಟಿಯ ಸೊಭಗಲಿ ದೇವನ ಒಲವು
ಭಕುತನ ಬರುವಿಗೆ ಕಾಯುತಿದೆ
ಮನಸ್ಸಿನ ಕಣ್ಣನು ತೆರೆದಿಹ ಮನುಜಗೆ
ಆತನ ಪ್ರೇಮವು ತಲುಪುತಿದೆ

ದೇವನ ನಗುವಿದೆ ಸೃಷ್ಟಿಯ ಒಡಲಲಿ
ಭಕುತನ ಇಂದು ಸೆಳೆಯುತಿದೆ
ಬೆರೆಯಲು ಆತನ ಸುಂದರ ನಗುವಲಿ
ದೇವನ ಕರವು ಕರೆಯುತಿದೆ
-ಪೆದ್ದರಿಚ್ಚ

ಬಾಡಿಗೆ ಮನೆಯಲಿ
ಸುಖದ ನಿದ್ರೆಗೆ ಜಾರಿದ ಮಾತ್ರಕ್ಕೆ
ಆ ಮನೆಯ ಯಜಮಾನ
ಅಸ್ಥಿತ್ವ ಕಳೆದುಕೊಳ್ಳನು

ಕಿಸೆಯಲ್ಲಿನ ಹಣವ ನೀಡಿ
ಹೊಟ್ಟೆ ತುಂಬಲು
ಅಕ್ಕಿಯ ಕೊಂಡ ಮಾತ್ರಕ್ಕೆ
ರೈತ ಬೆಲೆ ಕಳೆದುಕೊಳ್ಳನು

ಆಸೆಯಿಂದ ಶಾಲೆಗೆ ಹೋಗಿ
ಘನ ಪುಸ್ತಕಗಳನು
ಓದಿ ಬರೆಯಲು ಕಲಿತ ಮಾತ್ರಕ್ಕೆ
ಗುರುವು ಸೋತುಹೋಗನು

ಬುದ್ದಿ ಜೀವಿಯಂತೆ
ಸೃಷ್ಟಿಯ ಕಣಕಣವನು
ಸವಿದು ಅರಿತ ಮಾತ್ರಕ್ಕೆ
ಅದನ್ನು ಸೃಷ್ಟಿಸಿದ ದೇವನು
ಇಲ್ಲದಂತಾಗುವನೇ ಪೆದ್ದರಿಚ್ಚ!

ಗಗನವೇ ಧರೆಗೆ ಇಳಿಯುವುದು
ಮಕ್ಕಳ ನಗುವಲ್ಲಿ
ಕಾಮನ ಬಿಲ್ಲೇ ಮೂಡುವುದು
ಮಕ್ಕಳ ನಲಿವಲ್ಲಿ
ಮೊಡವೇ ಜಿನುಗಿ ಕರಗುವುದು
ಮಕ್ಕಳು ಇರುವಲ್ಲಿ
ದೇವನೇ ಪ್ರೀತಿಯ ಬಡಿಸುವನು
ಮಕ್ಕಳ ಕರದಲ್ಲಿ

ಸ್ವರ್ಗವ ಭುವಿಯಲಿ ನೆಡುವ ಮಕ್ಕಳೆ
ಶುಭವನು ಕೋರುವೆವು
ನಾಳಿನ ಭರವಸೆ ಮೂಡಿಸೋ ಮಕ್ಕಳೇ
ನಲಿಯುತಾ ಹಾಡುವೆವು
ನಿಮ್ಮಯ ನಾಳೆಯ ಹರಸುತಲಿ ವರಗಳ ಕೋರುವೆವು
ನಿಮ್ಮಯ ನಲಿವಲಿ ನೋವನು ಮರೆಯುತಾ
ಒಳಿತನು ಬೇಡುವೆವು

ಸೃಷ್ಟಿಯ ಸೊಭಗು ಬೆಳೆಯುವುದು
ಮಕ್ಕಳ ನಡೆಯಲ್ಲಿ
ಚಿಲಿಪಿಲಿ ಕಲರವ ಮೂಡುವುದು
ಮಕ್ಕಳ ನುಡಿಯಲ್ಲಿ
ಪ್ರೀತಿಯ ಅಲೆಗಳು ಏಳುವುವು
ಮಕ್ಕಳ ನೋಟದಲಿ
ದೇವನು ನೋವನು ತಣಿಸುವನು
ಮಕ್ಕಳ ಪಾಠದಲಿ

ಶುಭಾಶಯ ಶುಭಾಶಯ
ನಿಮ್ಮಯ ನಾಳೆಯು ಅರಳಲಿ
ಆಶಯ ಶುಭಾಶಯ
ಶುಭಾಶಯ ಶುಭಾಶಯ
ನಿಮ್ಮಯ ಕೀರ್ತಿ ಮೊಳಗಲಿ
ಆಶಯ ಶುಭಾಶಯ

ಕಣ್ಣು ಮುಚ್ಚಿ ಏಕೆ ನಡೆವೆ
ಕಣಕಣವೂ ಅವನದೇ
ಪ್ರೀತಿಯಿಂದ ತೆರೆದು ನೋಡು
ಆತನನ್ನೇ ಕಾಣುವೆ

ನೋಡಲೇಕೆ ಕಷ್ಟಪಡುವೆ
ಪೊರೆಯನೊಮ್ಮೆ ತೆಗೆಯದೆ
ಪೊರೆಯನೊಮ್ಮೆ ಸರಿಸಿಬಿಡು
ಆತನನ್ನೇ ಕಾಣುವೆ

ಕತ್ತಲಲ್ಲಿ ಏಕೆ ಇರುವೆ
ದೀಪವನ್ನು ಹಚ್ಚದೆ
ಕಿಡಿಯನ್ನೊಮ್ಮೆ ನೋಡಿಬಿಡು
ಆತನನ್ನೇ ಕಾಣುವೆ

ಹಠವನ್ನೇಕೆ ಮಾಡುತಿರುವೆ
ಮನದ ಕಣ್ಣ ತೆರೆಯದೆ
ಪ್ರೀತಿಯಿಂದ ತೆರೆದುಬಿಡು
ಆತನನ್ನೇ ಕಾಣುವೆ
-ಪೆದ್ದರಿಚ್ಚ

ರೋಗ ಇದ್ದರೇನು?
ಭಯಬೇಡ ಮನಕೆ
ಮದ್ದಿಲ್ಲವೇ ಅದಕೆ…

ರೋಗ ದೇವನ ಸೃಷ್ಟಿಯಲ್ಲ!
ಜೀವ ಆತನ ಕೊಡುಗೆ
ಆತನಿರಲು ಭಯವು ಏತಕೆ?

ದೇವನು ದೊಡ್ಡವನಲ್ಲವೇ?
ಹೆದರುವೆ ಏಕೆ ರೋಗಕೆ?
ಆತನಲಿದೆ ಮದ್ದು ಅದಕೆ…

ರೋಗ ಕೊಲ್ಲಬಹುದು ದೇಹವ
ಕೊಳ್ಳಲಾಗದದಕೆ ಆತ್ಮವ
ನಂಬು ಒಮ್ಮೆ ನಿನ್ನ ದೇವನ

ಕೇಳಿಬಿಡು ಒಮ್ಮೆ ದೇವನ
ಮಾಡಿಬಿಡು ಆತನ ವಚನ
ನಿನ್ನ ಬಾಳು ದಿವ್ಯ ಚೇತನ
-ಪೆದ್ದರಿಚ್ಚ

ಹುಟ್ಟಿಗೆ ನಿನ್ನಯ ಕಾರಣ ಒಂದಿದೆ
ಮೌನದಿ ಕುಳಿತು ಅರಿತುಬಿಡು
ಆತನು ನೀಡಿದ ಗುರಿಯು ನಿನಗಿದೆ
ದೇವನ ಎದುರಲಿ ಕೇಳಿಬಿಡು

ಬಾಳಿನ ಗುರಿಯನು ಅರಿತರೆ ಬಾಳಲಿ
ಸಂತಸ ನದಿಯು ಹರಿಯುವುದು
ಆ ಗುರಿಯ ದಿಕ್ಕಲಿ ಅನುದಿನ ನಡೆದರೆ
ಜೀವನ ಸಾಗರ ಸೇರುವುದು

ಸಕಲವ ಮಾಡಿದ ದೇವನ ಎದುರಲಿ
ಎಲ್ಲರು ಸುಂದರ ಸೃಷ್ಟಿಗಳು
ಗುರಿಯನು ಅರಿತು ಬಾಳುವ ಜನರಲಿ
ಬರುವುವು ಸುಂದರ ಕವನಗಳು

ಅರಿಯದೆ ನಿನ್ನಯ ಬಾಳಿನ ಗುರಿಯನು
ಹೆಜ್ಜೆಯ ಮುಂದೆ ಇಡಬೇಡ
ಗುರಿಯನು ತಲುಪಲು ಜೊತೆಗೆ ಇರುವನು
ನಿನ್ನಯ ದೇವನು ಮರಿಬೇಡ
-ಪೆದ್ದರಿಚ್ಚ

ಸಹವಾಸದ ದೋಷ ಅಂಟದು ಬಾಳಿಗೆ
ಮನದಲಿ ಒಳಿತು ನೆಲೆಸಿರಲು
ಹೊರಗಿನ ರೋಗವು ಅಂಟದು ದೇಹಕೆ
ಮನದಲಿ ಶಕ್ತಿಯು ಬಲಿತಿರಲು

ಇತರರ ಏಕೆ ದೂರುವೆ ನೀನು
ಒಳಿತನು ಮನದಲಿ ಅರಿತಿರದೆ
ಇರುಳನು ಏಕೆ ಬೈಯುವೆ ನೀನು
ಬೆಳಕಿನ ಕಿಡಿಯನು ತಿಳಿದಿರದೆ.

ನಿನ್ನಯ ಮನದಲಿ ನಿನ್ನಯ ದೇವನು
ನೀಡಿಹ ನಿನಗೆ ಒಳಿತನ್ನು
ಹಚ್ಚು ನೀ ಬೇಗ ಒಳಿತಿನ ಕಿಡಿಯನು
ಬೆಳಗಲು ಜಗದ ಇರುಳನ್ನು

ಸಹವಾಸವ ದೂರುವ ಕೆಟ್ಟಯ ಚಟವನು
ಬಾಳಲಿ ಏಕೆ ಬೆಳೆಸಿರುವೆ?
ನಿನ್ನಯ ಸ್ನೇಹದಿ ಇತರರ ಬಾಳನು
ಬೆಳಗಲು ಏಕೆ ಹಿಂಜರಿವೆ?
-ಪೆದ್ದರಿಚ್ಚ

ಮೊಗ ಅರಳಿದರೆ ಚೆನ್ನ ಹೂವಿನಂತೆ
ನಗುವಿದ್ದು ನಡುವಲಿ
ನಷ್ಟವೇನಿಲ್ಲ ಬಾಯಿತುಂಬಾ ನಕ್ಕರೆ
ನಗಲೇಕೆ ಚಳುವಳಿ
ಒಮ್ಮೆ ನಕ್ಕುಬಿಡು
ಇದೆ ಉಲ್ಲಾಸದ ಬಳುವಳಿ

ಅರಳಿ ಬಾಡಿದ ಹೂವು ತಿಪ್ಪೆಗೆ
ಪರಿಮಳ ಈಗ ವಾಸನೆ
ಗೊಬ್ಬರವಾದರೂ ಸಸಿಗೆ
ಹೆಸರೆಲ್ಲಾ ಕೊಳೆತ ತಿಪ್ಪೆಗೆ
ನಕ್ಕು ಅರಳಿಬಿಡು
ನೀಡಬೇಕಿಲ್ಲ ಅದಕೆ ಬಾಡಿಗೆ