ಸೃಷ್ಟಿಯ ಅರಮನೆ ನಿನ್ನದು ದೇವನೆ
ನೀನೇ ಸರ್ವರ ಅಧಿಪತಿಯು
ಬಾಳುತಲಿಹೆನು ನಿನ್ನನು ಅರಿಯದೆ
ಹರಸೋ ಎನ್ನನು ಬೇಡುವೆನು

ನೀನೇ ಮಾಡಿದ ಕಸವನು ನಾನು
ನಿನಗಿಂತ ಮೇಲೆ ಇರಿಸೆಹೆನು
ನಿನ್ನನು ಅರಿಯದೆ ಆಗಿಹೆ ನಾನು
ಕರಗದ ಕಸದ ತೆಳು ಪೊರೆಯು

ನಿನ್ನಲಿ ಬೆರೆಯಲು ಕಲಿಸೋ ದೇವ
ಬೆಸೆದು ಹೃದಯವ ಪ್ರೀತಿಯಲಿ
ಮನದಲಿ ಇರುವ ಕತ್ತಲೆ ಕದವ
ತಟ್ಟುತಾ ತೆರೆಯೋ ಜ್ಞಾನದಲಿ
-ಪೆದ್ದರಿಚ್ಚ

ಬೂಟಿಗೂ ಪಾದಕೂ ಯಾಕೋ ಜಗಳ
ಕೆಲವೇ ದಿನಗಳ ಈ ಕದನ
ಶೇಷ್ಠರು ಯಾರು ಎನ್ನುತಾ ಸಾಗಿದೆ
ನಗುವನು ಕೆಣಕುವ ಸಿಹಿ ಕಥನ

ನಿನ್ನನು ಪೊರೆವೆ ಎನ್ನುವ ಬೂಟಿಗೆ
ನೀನಿಲ್ಲದೆ ಬಾಳಿಹೆ ಎನ್ನುವ ಪಾದ
ಘನತೆಯ ನೀಡುವೆ ಎನ್ನುವ ಬೂಟಿಗೆ
ಎಸೆಯುವೆ ನೆನ್ನವು ಎನ್ನುವ ಪಾದ

ಹಳೆ ಪಾದಕೆ ಬೂಟು ಹೊಸ ಬೂಟಿಗೆ ಪಾದ
ಜೊತೆ ಜೊತೆಲಿ ಸದಾ ನಡೀಬೇಕು
ಹಳತು ಹೊಸತು ಇಲ್ಲದೇ ವಾದ
ಜಗಳವ ಕಾಯದೇ ಬೆರಿಬೇಕು
-ಪೆದ್ದರಿಚ್ಚ

ಮನೆಯ ಮೊದಲ ಶಾಲೆಯಲಿ
ನೋಡಿದ ಮೊದಲ ಗುರುವು ನೀನು
ಮನದ ಖಾಲಿ ತಟ್ಟೆಯಲಿ
ಮೂಡಿದ ಮೊದಲ ಬಿಂಬವು ನೀನು
ಏನನು ಅರಿಯದ ಬಾಯಿಯಲಿ
ಮೂಡಿದ ಮೊದಲ ಪದ ನೀನು
ಬಾಳಿನ ಕಡಲಿನ ಪಯಣದಲಿ
ಇರಿಸಿದ ಮೊದಲ ಹೆಜ್ಜೆಯು ನೀನು

ಗುರುವನು ನಮಿಸುವ ಶುಭದಿನದಿ
ನಮಿಸುವೆ ಮೊದಲು ತಾಯಿಯನು
ಆಕೆಯ ನಮಿಸುತ ಹರುಷದಲಿ
ನೆನೆಯುವೆ ಕಲಿಸಿದ ಗುರುಗಳನು
ಗುರಿಯನು ತಲುಪಲು ಕರವಿಡಿದು
ನಡೆಸಿದ ನಿಮಗೆ ವಂದನೆಯು
ದೇವನ ಸನ್ನಿಧಿ ಸೇರುವ ವರೆಗೂ
ನಿಮ್ಮಯ ನೆನಪನು ಮೆರೆಯುವೆನು

ಗುರಿಯನು ತಲುಪಿದ ಸಂತಸವು
ಅಲೆಯ ರೂಪದಿ ಮೂಡುತಿರೆ
ಮರೆಯದ ಸಾವಿರ ಸಲಹೆಗಳು
ಇನ್ನೂ ಏರಲು ತಿಳಿಸುತಿವೆ
ಮನದ ಪುಟ್ಟ ಕೋಣೆಯಲಿ
ಶಾಲೆಗೆ ಮರಳುವ ಆಸೆಗಳು
ನಗುತಲಿ ತಡೆದರೂ ಹಟಮಾಡಿ
ಮತ್ತೇ ಮತ್ತೇ ಮೂಡುತಿವೆ.
-ಪೆದ್ದರಿಚ್ಚ

ಬೀಸುವ ಗಾಳಿಗೂ ಬೇಕಂತೆ ರಜೆ
ದಿಕ್ಕಿನಿಂದ ದಿಕ್ಕಿಗೆ
ನಿರಂತರವಾಗಿ ಅಲೆದು ಬಳಲಿದೆಯಂತೆ
ವಿರಮಿಸಲು ಬೀಸದೆ

ನೀರಿಗೆ ತಿಳಿಯದೆ ಗಾಳಿಯ ಸುದ್ದಿ
ಹರಿವ ನೀರಿಗೂ ಬೇಕಂತೆ ರಜೆ
ಇಳಿಜಾರಿಗೆ ಹರಿದು
ಎದೆ ಚರ್ಮಕೆ ಗಾಯವಂತೆ
ವಿರಮಿಸಲು ಹರಿಯದೆ

ಗಾಳಿ ಇಲ್ಲದ್ದಿದ್ದರೂ ಗಾಳಿಸುದ್ದಿ ಬಲವಾಗಿದೆ
ಭೂಮಿ ತಾಯಿಗೂ ಬೇಕಂತೆ ರಜೆ
ಹೊತ್ತು ಹೊತ್ತು
ಶಕ್ತಿ ಗರ್ಭದ ಪದರದಲ್ಲಿವಂತೆ
ವಿರಮಿಸಲು ಹೆರದೆ

ಉಪಗ್ರಹಗಳ ಮಹಿಮೆ
ಸುದ್ದಿ ಮೇಲೆ ತಲುಪಿದೆ
ಗಗನಕ್ಕೂ ಬೇಕಂತೆ ರಜೆ
ಆಸರೆ ನೀಡಲು ಅಪ್ಪುತಾ
ಕರಗಳು ಬತ್ತಿವೆಯಂತೆ
ವಿರಮಿಸಲು ಕರಮುಚ್ಚಿ

ಸುಮ್ಮನಿರಲಾಗುವುದೇ ಎಲ್ಲರೂ ರಜೆ ಬಯಸಲು
ಬೆಂಕಿಗೂ ಬೇಕಂತೆ ರಜೆ
ಉರಿದು ಉರಿದು
ಮನಸ್ಸು ನಿಸ್ಸಾರವಾಗಿದೆಯಂತೆ
ವಿರಮಿಸಲು ಉರಿಯದೆ

ಮಾಡಬೇಕಾದುದನು ಮಾಡದೇ
ವಿರಮಿಸಲು ಆಗುವುದೇ ಭೂತ ಭಾಂದವರೇ
ಮಾಡಬೇಕಾದುದನು ಮಾಡಿ
ಮಾಡಬಹುದಾದುದನು ಮಾಡದೆ
ವಿರಮಿಸಬಹುದಲ್ಲವೇ ಸ್ನೇಹಿತರೇ!
-ಪೆದ್ದರಿಚ್ಚ

ಬಾಳಿನ ಪಯಣದಿ
ಸಾಗಲು ಮುಂದೆ
ಜ್ಞಾನದ ನೆರವನು ಪಡಿಬೇಕು
ಪ್ರೀತಿಯು ಚಿಗುರು
ಮನಸ್ಸಲಿ ಬೆಳೆಯಲು
ಜ್ಞಾನದ ಬೇರು ನಗಬೇಕು

ಅರಿಯದೆ ಯಾರಲು
ಪ್ರೇಮಿಸಲಾಗದು
ಅರಿಯಲು ಬಾಳಲಿ ದುಡಿಬೇಕು
ಪ್ರೀತಿಯ ಕಡಲಲಿ
ದೈರ್ಯದಿ ತೇಲಲು
ಜ್ಞಾನದ ದೋಣಿಯ ಹಿಡಿಬೇಕು

ಸ್ವಾರ್ಥವ ತೋರದೆ
ಪ್ರೀತಿಸ ಪರರನು
ದೇವನ ಮೊದಲು ಅರಿಬೇಕು
ದೇವನ ಪ್ರೀತಿಯ
ಬಾಳಲಿ ಸವಿದು
ಇತರರ ಬಾಳಲಿ ಸುರಿಬೇಕು
-ಪೆದ್ದರಿಚ್ಚ

ಹೋಗುವೆ ನಾನು ದೇವರ ಗುಡಿಗೆ
ಅರಸುತಾ ಆತನ ಪ್ರೀತಿಯನು
ಆತನ ಪ್ರೀತಿಯ ಸಿಂಚನವಾಗಲು
ಸೇರುವೆ ಮನದ ಗುಡಿಯನ್ನು

ಹೋಗುವೆ ನಾನು ದೇವರ ಗುಡಿಗೆ
ಬೇಡುತಾ ಆತನ ವರಗಳನು
ಮರಳುವೆ ವರಗಳ ಸುರಿಮಳೆಯಾಗಲು
ಪರನಲೂ ಕಾಣುವೆ ದೇವನನು

ಹೋಗುವೆ ನಾನು ದೇವರ ಗುಡಿಗೆ
ಕಾಣಲು ಆತನ ಮೊಗವನ್ನು
ಆತನ ಮಮತೆಯ ದರ್ಶನವಾಗಲು
ಎಲೆಯಲೂ ಕಾಣುವೆ ನಗುವನ್ನು
-ಪೆದ್ದರಿಚ್ಚ

ಆಗಸದಾರುವ ಹಕ್ಕಿಯು ಮೊದಲು
ಗೂಡಲಿ ಕುಳಿತು ಕಲಿಯುವುದು
ರೆಕ್ಕೆಯು ಬಲಿಯದು ನಿಲ್ಲದೆ ಕಾಲಲಿ
ಹಾರಲು ಮೇಲಕೆ ಬಾನಿನಲಿ

ಹಕ್ಕಿಯ ತಲೆಗೆ ಹೊಳೆಯುವ ಸತ್ಯವು
ತಿಳಿಯದೇ ನಿನಗೆ ಓ ಮನುಜ
ಭುವಿಯಲಿ ನಡೆಯದೆ ಹಾರುವ ಆಸೆಲಿ
ತುಂಬುವೆ ಮೂರ್ಖತನದ ಕಣಜ

ದರ್ಪದ ಭಾರದಿ ಹಾರಲು ಆಗದು
ಬಳಲುವೆ ಆಗದೆ ಕ್ಷಣಗಳಲಿ
ದೀನತೆ ಚಿಗುರಲು ಹಗುರವು ಬಾಳು
ಮುಗಿಲನು ಮುಟ್ಟುವೆ ನಿಮಿಷದಲಿ
-ಪೆದ್ದರಿಚ್ಚ

ಗೋಡೆಗಳೋ ಗೋಡೆಗಳು
ಹಿಂದೆ ಮುಂದೆ
ಎಡದಲಿ ಬಲದಲಿ
ಅವುಗಳ ಗುಂಪಲಿ ಮೇಲೊಂದು
ರಕ್ಷಣೆ ಏನೋ
ಸಿಗುವುದು ಖಚಿತ
ಅವುಗಳ ಒಳಗೆ
ನಾ ಕೈದಿ
ಆಸರೆ ಏನೋ
ದೊರೆವುದು ಉಚಿತ
ಬೆಳಕಿನ ಜಗದಲಿ
ಒಳಗಿರುಳು

ಗೋಡೆಗಳೋ ಗೋಡೆಗಳು
ಚಿಕ್ಕದು ದೊಡ್ಡದು
ಕಿರಿದು ಹಿರಿದು
ಅಪ್ಪಿವೆ ಜೊತೆಗೆ
ಕಬ್ಬಿಣವ
ಬೆಳೆದಿವೆ ಹೆದರದೆ
ಗುಡ್ಡದ ತೆರದಿ
ಅವುಗಳ ಒಳಗೆ ನಾ
ಬಾಡಿದ ಹೂವು
ನಿಂತಿವೆ ಅಲುಗದೆ
ಅರಸನ ದರ್ಪದಿ
ನೀಡಿವೆ ಮನುಜಗೆ
ಬಾಳದ ಸಾವು
-ಪೆದ್ದರಿಚ್ಚ

ನಿನ್ನಯ ಬಾಳಿನ ದೀಪದ ಬತ್ತಿ
ಮನದ ನ್ಯಾಯದ ಎಣ್ಣೆಯಲಿ
ಬೆಳಗುತಲಿರಲಿ ಈಗಲೂ ನಾಳೆಯು
ನಿನ್ನಯ ಸಾಧನೆ ನಾಳೆಯಲಿ

ಬೆಳಗದೆ ಇರದು ದೀಪಕೆ ಬೆಲೆಯು
ಎಸೆವರು ಮೂಲೆಗೆ ಕಸವೆಂದು
ಹಿಡಿವರು ಎತ್ತಿ ಒಮ್ಮೆ ಬೆಳಗಲು
ರಕ್ಷಣೆ ನೀಡುವ ಅರಸನೆಂದು

ನ್ಯಾಯದ ಎಣ್ಣೆಯ ಬಿಡುತಿರು ದೀಪಕೆ
ಹೃದಯದಿ ಬಡಿತ ಇರುವರೆಗೆ
ಆರದ ದೀಪವ ನೆನೆವರು ಎಲ್ಲರೂ
ಅಳಿವ ಈ ಜಗದ ಕೊನೆವರೆಗೆ
-ಪೆದ್ದರಿಚ್ಚ

ಮೋಸದ ಕೆಸರಲಿ
ಸತ್ಯದ ಕಮಲವ
ಬೆಳೆಯುವ ಕನಸು ಮನುಜನಲಿ
ಕೇಡಿನ ಮೊಸರಲಿ
ನೀತಿಯ ತುಪ್ಪವ
ಕಡೆಯುವ ಮನಸ್ಸು
ಮನುಕುಲದಿ

ಬೆಳಕಿನ ಹಾಳೆಗೆ
ಕತ್ತಲ ಸುರಿಯುವ
ಯೋಜನೆ ಮನುಜರ ಮನಗಳಲಿ
ದೂರ್ತನ ಮೊಗದಲಿ
ನಗುವನು ತೋರಿಸಿ
ಮುತ್ತನು ನೀಡ್ವರು ಮುಳ್ಳಿನಲಿ

ಅಕ್ಕರೆ ಹೆಸರಲಿ
ದ್ವೇಷದ ಸಕ್ಕರೆ
ಬಾಯಿಗೆ ತುಂಬುವ ಜನರಿಹರು
ಪ್ರೀತಿಯ ಹೆಸರಲಿ
ನೀತಿಯ ಬದಲಿಸಿ
ವಂಚಿಸೋ ಯೋಧರು ಎದ್ದಿಹರು
-ಪೆದ್ದರಿಚ್ಚ