ಸೃಷ್ಟಿಯು ಹಾಡಿದೆ ಮಂಗಳ ಗಾನ
ಸಕಲವ ಆಳುವ ಒಡೆಯನಿಗೆ
ತನ್ನಯ ಸೊಭಗಲಿ ನುಡಿದಿದೆ ರಾಗ
ಸಕಲವ ಸೃಜಿಸುವ ದೇವನಿಗೆ

ಬಯಲಲಿ ಇರುವ ಹುಲ್ಲಿನ ಕಡ್ಡಿಯೂ
ಅಪ್ಪಣೆಗಾತನ ಕಾಯುವುದು
ಸಾಲಲಿ ಸಾಗುವ ಸಣ್ಣಯ ಇರುವೆಯೂ
ಕೀರ್ತನೆಯಾತನ ಹಾಡುವುದು

ಪ್ರಾರ್ಥನೆ ಮಾಡುವ ಭಕ್ತನ ಮನದಲಿ
ಪ್ರೀತಿಯ ಹಾಡು ಗುನುಗುವುದು
ನಂಬಿಕೆ ಇರುವ ಭಕ್ತನ ಬಾಳಲಿ
ದೇವನ ಚಿತ್ತವು ಅರಳುವುದು

ಅನುದಿನ ಎನ್ನಯ ನಡೆಯಲಿ ನುಡಿಯಲಿ
ಆತನ ಕೀರ್ತನೆ ಹಾಡುವೆನು
ಆತನು ನೀಡಿಹ ಜೀವದ ಉಸಿರಲಿ
ಆತನ ಮಹಿಮೆಗೆ ಬಾಳುವೆನು
– ಪೆದ್ದರಿಚ್ಚ

ದರ್ಪದ ಮೋಡ ಬಾಳಲಿ ಕವಿದಿದೆ
ಇರುಳನು ಕಣ್ಣಿಗೆ ನೀಡಿ
ಅಹಂಕಾರದ ಸಿಡಿಲು ಬಾಳಿಗೆ ಬಡಿದಿದೆ
ಸ್ವಾರ್ಥದ ಜೊತೆಯಲಿ ಕೂಡಿ

ದರ್ಪದ ಪದರವ ಕಾಣದ ಕುರುಡ
ದೇವ ನಾ ದಯೆ ತೋರು
ಕರೆದಿಹ ಮನಸ್ಸು ಅರಿಯದ ಮೂಢ
ಅರಿವನು ನೀ ನೀಡು
ಇರುಳಿನ ನೋವಿದೆ ಮನದಂಗಳದಿ
ಬೆಳಕನು ಅನುಗ್ರಹಿಸು
ಅಂದವ ಕಾಣದೆ ಸೊಭಗನು ಬಯಸಿದೆ
ಬದುಕಲು ಸಹಕರಿಸಿ

ಸ್ವಾರ್ಥದ ಮರಳು ಹರಡಿದೆ ಬಾಳಲಿ
ಮನಸ್ಸಿಗೆ ಬರಡನು ನೀಡಿ
ಆಸೆಯ ಅಮಲು ಏರಿದೆ ಮನದಲಿ
ಅನೀತಿಯ ಜೊತೆಯಲಿ ಕೂಡಿ
– ಪೆದ್ದರಿಚ್ಚ

ಕಣ ಕಣದಲೂ ಇಹನು ಎಮ್ಮಯ ದೇವನು
ತೆರೆಯುವ ಕಣ್ಣನು ಒಮ್ಮೆ
ಜನ ಜನರಲೂ ಆತನು ನುಡಿವನು ಮಾತನು
ಕೇಳುವ ಬನ್ನಿರಿ ಒಮ್ಮೆ

ಅವಕಾಶವು ನೂರು ಕಾಣಲು ಆತನ
ಕಾಣುವ ಮನಸ್ಸಿರಲಿ
ವರಗಳು ಹಲವು ಸ್ಪರ್ಶದಿ ಆತನ
ಬೆಳೆಯುವ ಗುರಿಯಿರಲಿ

ಸೃಷ್ಟಿಯ ಸೊಭಗಲಿ ಮಿನುಗುವ ದೇವನ
ಕಾಣಲು ಬನ್ನಿರಿ ಒಮ್ಮೆ
ಬಾಳಿನ ಗೆರೆಯಲಿ ಬರೆಯುವ ಕರ್ತನ
ನೋಡಲು ಬನ್ನಿರಿ ಒಮ್ಮೆ

ಮಗುವಿನ ನಗುವಲಿ ಅರಳುವ ದೇವನ
ಸೊಭಗನು ನೋಡುವ ಒಮ್ಮೆ
ಸುರಿಯುವ ಮಳೆಯಲಿ ಹರಸುವ ದೇವನ
ಕೊಡುಗೆಯ ನೋಡುವ ಒಮ್ಮೆ
– ಪೆದ್ದರಿಚ್ಚ

ಎಲ್ಲವ ಅರಿಯುವ ಮನುಜನಿಗೆ
ತನ್ನನೇ ಅರಿಯುವ ಮನಸ್ಸಿಲ್ಲ
ಎಲ್ಲವ ಕಲಿಯುವ ಸುಮನುಜಗೆ
ಆತ್ಮದ ಒಳಿತಿನ ಹಂಗಿಲ್ಲ

ಅರಿಯಲು ದೇವನ ಮನುಜನಿಗೆ
ಇದ್ದರೂ ದಾರಿ ಕಾಣಲ್ಲ
ಮನುಜಗೆ ಆತ್ಮದ ಬೆಳವಣಿಗೆ
ನಶ್ವರ ಜಗದಲ್ಲಿ ಬೇಕಿಲ್ಲ

ದೇವನ ಅರಿಯುವ ಮನುಜನಿಗೆ
ನಶ್ವರ ಜಗದಲಿ ಭಯವಿಲ್ಲ
ಅರಿತರೆ ಬಾಳಲಿ ಮೆರವಣಿಗೆ
ಯಾರೇ ತಡೆದರೂ ನಿಲ್ಲಲ್ಲ
-ಪೆದ್ದರಿಚ್ಚ

ಶಾಂತಿಗೆ ಜಗವು ಕಾದಿದೆ ನೋಡಾ
ಬೇಗನೆ ಕಿಚ್ಚನು ಹೊತ್ತಿಸ ಬಾ
ಏಕತೆ ಎಲ್ಲೆಡೆ ಬಯಸಿದೆ ನೋಡಾ
ಮನಗಳ ಬೇಗನೆ ಬೆಸೆಯಲು ಬಾ

ಸ್ವಾರ್ಥದ ರೋಗವು ಹಬ್ಬಿದೆ ನೋಡಾ
ಮದ್ದನು ಸುರಿಸಲು ಬೇಗನೇ ಬಾ
ಪ್ರೀತಿಗೆ ಹೃದಯವು ಬೇಡಿದೆ ನೋಡಾ
ನಿನ್ನಯ ಸ್ಪರ್ಶವ ನೀಡಲು ಬಾ

ನಿನ್ನಯ ಸ್ನೇಹವ ಅರಸಿದೆ ನೋಡಾ
ಮಾತನು ಆಡಲು ಒಡನೆಯೇ ಬಾ
ಬೆಳಕನು ಅರಸಿ ಅಲೆದಿಹೆ ನೋಡಾ
ಬಾಳಿನ ದೀಪವ ಹಚ್ಚಲು ಬಾ
-ಪೆದ್ದರಿಚ್ಚ

ದೇವನಿಗೂ ಮನುಜನಿಗೂ
ಎಲ್ಲಿಲ್ಲದ ನಂಟು
ಮಳೆಗರೆವ ಮೋಡದಂತೆ ದೇವ
ಹನಿ ನೀರಿಗಾಗಿ ಕಾಯುವ
ಭುವಿಯಂತೆ ಮನುಜ
ಅರಿಯದು ಮಳೆಸುರಿವ ಘಳಿಗೆ
ಮೋಡವ ಅರಿಯದೆ ಹೋದರೆ ಭುವಿಗೆ
ಆದರೆ…
ಅರಿತರೆ ಭುವಿಯೊಮ್ಮೆ
ಮಳೆಹನಿಯ ಮಹಿಮೆ
ಭುವಿಗೆ ಸ್ವರ್ಗಲೋಕದ ಹಿರಿಮೆ

ಕಳ್ಳನಂತೆ ಬರುವುದು
ಸುರಿವ ಮಳೆಯು
ಮಲಗಿರುವಾಗ ಕೆಲವೊಮ್ಮೆ ಜಗವು
ಆದರೆ…
ಕಾದು ಕುಳಿತು
ಆಹ್ವಾನಿಸುವ ಭುವಿಗೆ
ಮಳೆ ಹನಿಯ ಸ್ಪರ್ಶದ ಕೊಡುಗೆ

ವರಗಳ ಸುರಿಸುವ
ಪ್ರೀತಿಯ ದೇವನೂ
ಕಳ್ಳನಂತೆ ಭಕ್ತನಲ್ಲಿಗೆ ಬರುವನು
ಆದರೆ…
ವಿಶ್ವಾಸದ ದೀಪ ಹಿಡಿದು
ಸಿದ್ದನಿರಲು ಭಕ್ತನು
ಕಳ್ಳನ ಹಿಡಿದು ಆತನಲ್ಲೊಂದಾಗುವನು.
-ಪೆದ್ದರಿಚ್ಚ

ಸೃಷ್ಟಿಕರ್ತನ ಸೇವಕ ನೀನು
ಅನುದಿನ ಸುಮ್ಮನೆ ದುಡಿಯುತಿರು
ಆತನ ಚಿತ್ತಕೆ ಮಣಿಯುತಾ ನೀನು
ಬೆವರನು ಸುರಿಸುತಾ ದುಡಿಯುತಿರು

ಸಕಲ ಸೄಷ್ಟಿಗೆ ಒಡೆಯನು ಅವನು
ನೀನೋ ಕೇವಲ ಸೇವಕನು
ಒಡೆಯನು ಆಗುವ ಆಸೆಯ ತೊರೆದು
ನಿಷ್ಟೆಯ ಮನಸ್ಸಲಿ ದುಡಿಯುತಿರು

ಒಡೆಯನ ಆಜ್ಞೆಯ ಪಾಲಿಸಿ ಅನುದಿನ
ಸೃಷ್ಟಿಯ ಸೊಭಗನು ಅಧೀಕರಿಸು
ಹುಟ್ಟು ಸಾವಿನ ನಡುವಿನ ದಿನಗಳ
ಆತನ ಸೇವೆಲಿ ಘನೀಕರಿಸು
-ಪೆದ್ದರಿಚ್ಚ

ಆಸೆಯ ರೋಗಕೆ ಮದ್ದಿಲ್ಲ
ಜಿಗಿಬಿಗಿ ಹೊಳೆಯುವ ಜಗದಲ್ಲಿ
ಆಸೆಯ ಸೆಲೆಯಲಿ ಸುಖವಿಲ್ಲ
ವಿಲವಿಲ ನರಳುವ ಬಲೆಯಲ್ಲಿ

ಆಸೆಯ ತೊರೆದರೆ ಬಾಳಲ್ಲಿ
ಕಿಲಕಿಲ ನಗುವೆ ಮನದಲ್ಲಿ
ಆಸೆಯ ಹಿಡಿದರೆ ಕರದಲ್ಲಿ
ಕುಸುಕುಸು ಅಳುವೆ ಇಹದಲ್ಲಿ

ಆಸೆಯ ಸ್ನೇಹದಿ ದೂರವಿರೆ
ವರಗಳ ಪಡೆಯುವೆ ದೇವನಲಿ
ಆಸೆಯ ಮೋಸಕೆ ಬಲಿಯಾಗೆ
ದುಃಖವ ಗಳಿಸುವೆ ಬೊಗಸೆಯಲಿ

ಆಸೆಯು ಇರಲಿ ಮನದಲ್ಲಿ
ದೇವನ ಒಲಿಸಲು ಭಕ್ತಿಯಲಿ
ಜಗದ ಆಸೆಯ ತೊರೆದಲ್ಲಿ
ಬೆಳೆಯುವೆ ದೇವನ ಶಕ್ತಿಯಲಿ
-ಪೆದ್ದರಿಚ್ಚ

ನನಗಾಗಿ ನಾನಲ್ಲ
ಹಾಗೇಯೇ ನೀನು
ನಿನಗಾಗಿ ನಾನು
ನನಗಾಗಿ ನೀನು

ನನ ಜೀವ ನನದಲ್ಲ
ನೀಡಿಹನು ಅವನು
ನಿನ ಜೀವನ ನಿನದಲ್ಲ
ಕೇಳುವನು ಅವನು

ಪ್ರೀತಿಯಿದೆ ಹೃದಯದಲಿ
ಹಂಚಿದರೆ ಹಾಡು
ಮುಚ್ಚಿದರೆ ಮನದಲಿ
ಕರಿ ಕತ್ತಲ ಕಾಡು

ಕಲ್ಲಿನಂತೇಕಿರಲಿ
ಒಂದರ ಮೇಲೊಂದು
ಒಟ್ಟಿಗಿದ್ದರೆ ಹುಟ್ಟದು
ಪ್ರೀತಿಗೆ ಬೇರೊಂದು

ಹಕ್ಕಿಗಳು ಬೆರೆಯವು
ಗುಂಪಲಿ ಇನ್ನೊಂದು
ರೆಕ್ಕೆಗಳ ನೋಡಲು
ಗುಂಪು ಬೇರೊಂದು

ಜೇನುಳದಂತೇಕಿರಲಿ
ಒಂದರ ಜೊತೆಗೊಂದು
ತಲ್ಲೀನ ಕೆಲಸದಲಿ
ಸಂಬಂಧ ಎಂದು!

ಚಿಟ್ಟೆಯಂತೆ ನಾನಿರಲು
ಹೂವಾಗು ನೀನು
ನಿನಗಾಗಿ ನಾನು
ನನಗಾಗಿ ನೀನು
-ಪೆದ್ದರಿಚ್ಚ

ಹುಟ್ಟು ಸಾವಿನ ನಡುವಿನ ಬಾಳು
ಒಂದು ಸುಂದರ ಕವನ
ಹುಟ್ಟು ಮೊದಲ ಸಾಲು
ಸಾವು ಕೊನೆಯ ಸಾಲು
ಈ ಎರಡು ಸಾಲುಗಳ ನಡುವೆ
ಸಾವಿರ ಪದಗಳ ಬೀಡು
ಕೆಲವೊಮ್ಮೆ ಅರ್ಥ ನೂರು
ಕೆಲವೊಮ್ಮೆ ನಿಸ್ಸಾರ ಚೂರು
ಬರೆದು ಮುಗಿಸಲಾಗದು ಒಮ್ಮೆಲೇ
ಅದು ಪ್ರತಿದಿನ ಕಾರುಬಾರು
ಪದಗಳಿಲ್ಲದ ಪ್ರೇರಣೆ ಅವನದು
ಅರ್ಥವಿಲ್ಲದ ಪದಗಳು ನನ್ನದು
ಆದರೂ ಸಾಗುತಿದೆ ಕವನದ ಸಾಲು
ಕೊನೆಯ ಸಾಲಿನ ತುಡಿತದಲಿ
ಪ್ರತಿ ಹೃದಯದ ಮಿಡಿತದಲಿ
ಸೇರುತಿದೆ ಕವನಕೆ
ಒಂದೊಂದೆ ಸಾಲು
-ಪೆದ್ದರಿಚ್ಚ