ಕುರಿಗಾಯಿ ಇಲ್ಲದ ಕುರಿಯಂತೆ
ಎನ್ನಯ ಬಾಳಾಗಿದೆ
ಸಾಗಲು ದಿಕ್ಕಿಲ್ಲದೆ
ತೋರುವ ಗುರುವಿಲ್ಲದೆ

ಒಬ್ಬ ಗುರುವಿಲ್ಲದೆ
ಒಂದು ಗುರಿಯಿಲ್ಲದೆ
ಸಾಗುವುದಾದರೂ ಎಲ್ಲಿಗೆ
ಬಲವಿದ್ದರೆ ಸಾಕೇ
ಸಾಗಲಾಗದು ದೂರ
ಸಮವದು
ಗಾಳಿಯಿಲ್ಲದ ಚಕ್ರಕೆ

ಗುರುವಿಲ್ಲದ ಗುರಿ
ದೂರದಲ್ಲಿ ಕಾಣುವ ಗಿರಿ
ಎಷ್ಟೇ ಸಾಗಿದರೂ ಬಲದಿ
ಕಾಣುವುದು ಅದು
ಅಂದವಾಗಿ ದೂರದಿ
ಗುರುವಿನ ಕರ ಹಿಡಿಯಲು
ಒಮ್ಮೆ ದಿಟಡಿ
ಗುರಿಯ ತುದಿಯು
ಕಾಲ್ಕೆಳಗೆ ಕ್ಷಣದಿ
-ಪೆದ್ದರಿಚ್ಚ

ಕಣ್ಣ ಬಿಡಲೇನು ಇಂದು
ಪ್ರೀತಿಯಿಂದ ನೋಡಲು
ರೆಪ್ಪೆಗಳು ಮುಚ್ಚಿವೆ
ಕತ್ತಲನು ಸೆಳೆದು
ನೋಡಲಾಗದಂತಾಗಿದೆ
ಮನಸ್ಸಿದ್ದರೂ ಒಳಗೆ

ಕಣ್ಣ ಬಿಡಲೇನು ಇಂದು
ಉರಿವ ಬೆಂಕಿಯಂತಿರಲು ಬೆಳಕು
ಕೆಂಪಾಗುವ ಭಯವಿದೆ
ಒಳಗೆ ಸೇರಲು ಧೂಳು
ಬಿಡಲಾಗುತ್ತಿಲ್ಲ ಎನಗೆ
ಮನಸ್ಸಿದ್ದರೂ ಒಳಗೆ

ಕಣ್ಣ ಬಿಡಲೇನು ಇಂದು
ಸತ್ಯದ ಅಂದ ಕಾಣಲು
ಬಾಯನ್ನು ತೆರೆಯಲಾಗದು
ಅಂದವ ವರ್ಣಿಸಲು ಬೇಕೆಂದರೆ
ಭಯವಾಗುತ್ತಿದೆ ತೆರೆಯಲು ನನಗೆ
ಕಾಣಲು ಮನಸ್ಸಿದ್ದರೂ ಒಳಗೆ
-ಪೆದ್ದರಿಚ್ಚ

ಪ್ರೀತಿಯ ಅರಮನೆಯ ಆಸೆ
ಮನದ ಪುಟ್ಟ ಬಟ್ಟಲಲಿ
ಬಿರುಗಾಳಿಗೂ ಅದು ಕದಲದು
ಕಲ್ಲೇ ಅದರ ಬುನಾದಿಯು

ಆಸೆಯಂತೆಯೇ ದೈರ್ಯವೂ ಇದ್ದರೆ
ಅರಮನೆ ಸಿದ್ದ
ಆದರೆ ಆಸೆಯ ಬುನಾದಿ
ಪುಡಿಯಾಗದ ಕಲ್ಲು
ಮನಸ್ಸಿನ ಬುನಾದಿ
ಕಲ್ಲಾಗದ ಪುಡಿ ಮರಳು

ಬಿರುಗಾಳಿಗೆ ಮೂಸದ
ಚಿರಂಜೀವಿ ಆಸೆ
ಮತ್ತೇ ಮತ್ತೇ
ಬೀಸುತಿದೆ ತಂಪಾಗಿ

ಪ್ರೀತಿಯ ಅರಮನೆಗೆ
ಬುನಾದಿಯ ಹಾಕಲು
ಕಲ್ಲಾಗಿದೆ ಮನಸ್ಸು
ಮರಳಂತೆ ಪುಡಿಯಾದರೆ
ನಾನು ಕಟ್ಟಿಬಿಡುವೆ
ಮರಳ ಸೇರಿಸಿ
ಕಲ್ಲಿನ ಮೇಲೊಂದು
ಕಲ್ಲಿನಂತೆ ಕದಲದ
ಪ್ರೀತಿಯ ಪುಟ್ಟ ಅರಮನೆ!
-ಪೆದ್ದರಿಚ್ಚ

ಹಸಿವಾಗಲು ನನಗೆ
ಸೃಷ್ಟಿ ತುಂಬಿ ನಿಂತಿದೆ
ನೀಗಲು ಹಸಿವನು
ಏನೂ ಬೇಡದೆ
ಹಸಿವೇನೋ ಒಮ್ಮೆ
ಮರೆಯಾಯಿತು ಪಡೆಯಲು
ಈಗ ನನಗೇ ತಿಳಿಯದೆ
ಆಸೆಯ ಹಸಿವಾಗಿದೆ
ನೀಡಲು ಯಾರಿಹರು
ಹುಡುಕುತಿಹೆನು ನಿಲ್ಲದೆ
ಸಿಕ್ಕರೂ ಬಡಿಸಲಾರರು
ಕೊನೆಯಿಲ್ಲದ ಹಸಿವಿಗೆ
ಉಪವಾಸದ ನೋವೇ
ಹಿತವಾಗಿದೆ
ಆಸೆಯ ಹಸಿವಿನ
ಕುತಂತ್ರವ ತಿಳಿದ ಕೂಡಲೇ
-ಪೆದ್ದರಿಚ್ಚ

ಸಾಧನೆ ಛಲವು ಮನದಲಿ ಇರಲು
ತಿಳಿಯದು ದೇಹಕೆ ದಾಹವು ಹಸಿವು
ಸಾಧಿಸೋ ಗುರಿಯು ಕಣ್ಣಿಗೆ ಸಿಗಲು
ಅರಿಯದು ಮನಕೆ ನೋವಿನ ಒಲವು

ಹೆದರದೆ ಮುಂದೆ ನೀ ಸಾಗು
ತಿರುಗದೆ ಹಿಂದೆ ನೀ ಸಾಗು
ದೇವನೆ ನಿನಗೆ ದಾರಿಯ ತೋರ್ವನು
ಗುರಿಯನು ಹಿಡಿದು ನೀ ಸಾಗು

ದೂರದಿ ಕಾಣುವ ಸುಂದರ ನಾಳೆಯು
ಸುಮ್ಮನೆ ನಿಂತರೆ ಹತ್ತಿರ ಬರದು
ಮನಸ್ಸನ್ನು ಮಾಡುತಾ ನಿರುತವು ದುಡಿದರೆ
ನಾಳೆಯ ಚಿಂತೆಯು ಹತ್ತಿರ ಇರದು
-ಪೆದ್ದರಿಚ್ಚ

ಯೋಗ್ಯನು ಯಾರು ದೇವರ ಎದುರಲಿ
ಪಾಪದ ಹೊರೆಯನು ಹೊರುತಿರಲು
ಆತನು ಕರುಣೆಯ ತೋರದೆ ಹೋದರೆ
ಜೀವನ ಬೆಳಕನು ಕಾಣದ ಇರುಳು

ಬೆಳಕೇ ಇಲ್ಲದ ಕತ್ತಲು ಬೇಕೇ
ಬಣ್ಣ ಬಣ್ಣದ ಜಗದಲ್ಲಿ
ಕೊಳಕೇ ತುಂಬಿದ ಮನ ಬೇಕೇ
ಸುಂದರ ಹೂಗಳ ಕನಸಿನಲಿ

ಬಾರೋ ಕತ್ತಲ ಬೆಳಗುವ ಚಂದಿರ
ಅಳಿಯುವ ಕತ್ತಲ ಅಟ್ಟುತಲಿ
ಬಾರೋ ತೋರಲು ಬೆಳಗುವ ಸೂರ್ಯನ
ಭರವಸೆ ಮನದಲಿ ಭಿತ್ತುತಲಿ
-ಪೆದ್ದರಿಚ್ಚ

ಕಾಯುವುದು ಬೋರಾದರೂ
ಬರುವವರ ಬರುವ ನೆನೆದಾಗ
ಮನದೊಳಗೆ ಉಲ್ಲಾಸ
ಎಲಿಲ್ಲದ ಹರುಷ

ಕಾಯುವುದು ನೋವಾದರೂ
ಬರುವವರ ಪ್ರೀತಿ ನೆನೆದಾಗ
ನೋವಲ್ಲೂ ಸಂತಸ
ಮರೆತೆಲ್ಲಾ ಉಲ್ಲಾಸ

ಕಾಯುವುದು ಬೇಡವಾದರೂ
ಬರುವವರ ಇರುವ ನೆನೆದಾಗ
ಮನದಲ್ಲೊಂದು ತೃಪ್ತಿ
ಅಳಿದು ಹೋಗದ ಸಂತೃಪ್ತಿ
-ಪೆದ್ದರಿಚ್ಚ

ನಿನ್ನಯ ಒಳಗಿದೆ ದೈರ್ಯದ ಅರಮನೆ
ಅರಿಯದೆ ಏಕೆ ಅಳುತಿರುವೆ
ಭಯದ ಭೂತದ ಗುಡಿಸಲು ತೊರೆಯದೆ
ಇರುಳಲಿ ಏಕೆ ಮಲಗಿರುವೆ

ನಿನ್ನಯ ಬಾಳಿಗೆ ನೀನೇ ದೊರೆಯು
ಅರಿಯದೆ ಏಕೆ ಬಾಳುತಿಹೆ
ಭಯದ ದಾಸ್ಯವು ಬಾಳಿಗೆ ಹೊರೆಯು
ತೊರೆಯದೆ ಏಕೆ ನರಳುತಿಹೆ

ದೈರ್ಯದ ನೆರವನು ಪಡೆಯದೆ ಬಾಳಲಿ
ಭಯದಿ ಏಕೆ ಕೊರಗಿತಿಹೆ
ಕೆಳಗಡೆ ಬಿದ್ದು ಭಯದ ಇರುಳಲಿ
ಏಳದೆ ಏಕೆ ಮರುಗುತಿಹೆ
-ಪೆದ್ದರಿಚ್ಚ

ಬಾಳು ನಶ್ವರ
ಹುಟ್ಟು ಸಾವಿನ ನಡುವಿನ
ಒಂದು ದುರ್ಬಲ ಸ್ವರ
ಉಸಿರಿರುವ ತನಕ
ಆ ಸ್ವರ ಮಧುರ
ನಿಸ್ಸಾರ ಆ ನಂತರ

ಸ್ವರ ಹೋದರೂ
ಸಾವಿಲ್ಲ ಬಾಳಿಗೆ
ಸ್ವರ ಸಂಗೀತವಾಗಿದ್ದರೆ
ಗುನುಗುವರು ಗಾನವನು
ನೂರು ತಲೆಮಾರಿನವರೆಗೆ

ನಿನ್ನ ಬಾಳಿಗೆ
ನೀನೇ ದೊರೆ
ಹೆದರದೆ ಹಾಡೊಮ್ಮೆ
ದೂರವಿಟ್ಟು ಭಯದ ಹೊರೆ

ಬಾಳು ಆಗದು ನಶ್ವರ
ಸಂಗೀತವಾದಾಗ ನಿನ್ನ ಸ್ವರ
-ಪೆದ್ದರಿಚ್ಚ

ಬೆವರುತಿಹನು ಮೊದಲ ಬಾರಿಗೆ
ನೀರು ಕುಡಿಯದ ಸೂರ್ಯ
ಬರಲಿರುವ ನಾಶವ ಕಂಡು
ತನ್ನ ಹೆಣಕ್ಕೆ ಆಳದ ಗುಂಡಿ
ತೋಡುತಿರುವ ಮನುಜನ ಕಂಡು

ಸುಡುವ ಆ ರವಿಯ
ಕೆಂಪು ಕಣ್ಣಲೂ ಕಣ್ಣೀರು
ಬೆತ್ತಲಾಗುತಿರುವ ಧರೆಯ ಕಂಡು
ಸ್ವಾರ್ಥದ ಧಗೆಯಲಿ
ತನ್ನ ಬೆತ್ತಲು ಮುಚ್ಚುತ್ತಿರುವ ಮನುಜನ ಕಂಡು

ಬೆಂಕಿಯ ಸೂರ್ಯನ ಮೊಗದಲಿ
ಜಿನುಗುವ ರಕುತದ ಹನಿಗಳು
ರಕ್ತದ ಮಡುವಲ್ಲಿರುವ ಇಳೆಯ ಕಂಡು
ಕರುಣೆಯಿಲ್ಲದೆ ರಕ್ತ ಹೀರುತ್ತಿರುವ ಮನುಜನ ಕಂಡು
-ಪೆದ್ದರಿಚ್ಚ