ಹೃದಯಕೆ ಒರಗಿ
ಹೃದಯದ ನೋವನು
ಅರಿಯಲು ಮನಸ್ಸು ಮಾಡಿದೆನು
ನೋವನು ಅರಿಯಲು ಸಾಧ್ಯವೇ ಇಲ್ಲ
ಎಂಬುದ ಈಗ ತಿಳಿದಿಹೆನು

ಪ್ರೇಮದಿ ಬೆಸೆದ ಹೃದಯಗಳಿದ್ದರೆ
ನೋವಿಗೆ ಸ್ಪಂದನೆ ಸಿಗಬಹುದು
ನೋವಿನ ಆಳವ ತಿಳಿಯದೇ ಇದ್ದರೂ
ಮನಸ್ಸಿಗೆ ಸಾಂತ್ವನ ಸಿಗಬಹುದು

ನೋವನು ಅರಿಯಲು ಆಗದೇ ಹೊದರು
ಪ್ರೀತಿಯ ಮಾತನು ನುಡಿಬೇಕು
ಪ್ರೀತಿಯ ನುಡಿಯುತಾ ನೋವಿನ ಮನಸ್ಸಿಗೆ
ಮರೆಯಲು ಸಮಯವ ಕೊಡಬೇಕು
-ಪೆದ್ದರಿಚ್ಚ

ಜೀವವ ನೀಡಿದ ದೇವನೆ ನಿನಗೆ
ನನ್ನಯ ಜೀವದ ಕಾಣಿಕೆ
ನೀನೇ ನೀಡಿದ ಕೊಡುಗೆಯ ನಿನಗೆ
ನಗುತಲಿ ಪ್ರಭುವೆ ನೀಡುವೆ

ನೀನಿರಲು ನನ್ನೊಂದಿಗೆ
ಬೇರೇನು ಬೇಡ ನನ ಬಾಳಿಗೆ
ನೀನೊಬ್ಬನಿರಲು ಸಂತೃಪ್ತಿಯೇ
ಸಂತೋಷದಿಂದ ನಾ ಬಾಳುವೆ

ನೀನಿರಲು ನನ್ನೊಂದಿಗೆ
ಹೆಜ್ಜೆಯನಿಡುವೆ ನಿನ್ನೊಂದಿಗೆ
ನೀ ಜೊತೆಗಿರಲು ಆನಂದವೇ
ಉಲ್ಲಾಸದಿಂದ ನಾ ಸಾಗುವೆ
-ಪೆದ್ದರಿಚ್ಚ

ಗಗನದಿ ತಾರೆಯು ಮಿನುಗುತಿದೆ
ಕ್ರಿಸ್ತನ ಜನನವ ಸಾರುತಲಿ
ದೂತರ ಗಾನವು ಮೊಳಗುತಿದೆ
ಆತನ ಬರುವಿಕೆ ಹಾಡುತಲಿ
ಗೊಲ್ಲರು ನಲಿಯುತ ಸಾಗಿಹರು
ಬೆತ್ಲೆಹೇಮಿನ ಗೋದಲಿಗೆ
ಹಾಡುತಾ ನಲಿಯುತಾ ನಮಿಸಿಹರು
ದೇವರ ಕುವರನಿಗೆ

ಬನ್ನಿರಿ ಹಾಡೋಣ ಆತನ ನಮಿಸೋಣ
ದೇವ ಕುವರನನು ವಂದಿಸಿ ಸ್ತುತಿಸೋಣ
ದೂತರ ಗಾನದ ಜೊತೆಗೂಡಿ
ದೇವರ ಹರಸೋಣ
ಗೊಲ್ಲರ ನಲಿವಲಿ ಒಂದಾಗಿ
ಕುಣಿಯುತಾ ಹಾಡೋಣ

ಕತ್ತಲು ದೂರಕೆ ಸರಿಯುತ್ತಿದೆ
ಸೂರ್ಯನು ಮೂಡುತಲಿ
ಸೃಷ್ಟಿಯು ಅರಳಿ ನಲಿಯುತಿದೆ
ಕ್ರಿಸ್ತನ ಜನನದಲಿ
ಭಯದ ಛಾಯೆಯು ಮರೆಯಾಗಿ
ಭರವಸೆ ಮೂಡುತಿದೆ
ಪಾಪದ ಕಲೆಯು ದೂರಾಗಿ
ವರಗಳು ಸುರಿಯುತಿವೆ

ಸ್ತುತಿ ಸ್ತೋತ್ರವು ಸಲ್ಲಲಿ ದೇವನಿಗೆ ಸರ್ವೇಶ್ವರನಿಗೆ
ಆರಾಧನೆ ಮಹಿಮೆ ಕರ್ತನಿಗೆ ಸೃಷ್ಟಿಯ ಒಡೆಯನಿಗೆ

ನೀಡಿಹನು ಮುಕ್ತಿದಾತನನು
ಪಾಪದ ಜನರ ವಂಶದೊಳು
ದ್ವೇಷ ಹಗೆಯನು ನೀಗುವನು
ರಕ್ಷಿಸಿ ಪೊರೆಯುವನು

ಪೂರ್ವಜರ ಬಯಕೆಯನು
ನೀಗಲು ಪ್ರೀತಿಯ ತೋರಿಹನು
ಸ್ಮರಿಸಿ, ಹರಸಿ ಕಾಯುವನು
ಅಭಯವ ನೀಡಿಹನು

ಸಿದ್ದ ಪಡಿಸಿಹನು ನವ ಮಾರ್ಗವನು
ಬರ ಮಾಡಲು ದೇವ ಪುತ್ರನನು
ಪಾಪಕೆ ಕ್ಷಮೆಯನು ಸಾರುವನು
ಜೀವ ಜ್ಞಾನವ ನೀಡುವನು

ಕೃಪಾ ಸಾಗರನು, ದಯಾಮಯನು
ಕರುಣೆಯ ಮಳೆಯನು ಸುರಿಸಿಹನು
ಮರಣದ ಮುಸುಕಲಿ ಬಾಳ್ವರನು
ಬೆಳಗಿಸಿ ಸಲಹಿಹನು

ಮೂಕನಾದೆ
ದೇವನ ಅರಿಯದೆ
ಕಣಕಣದಲೂ
ಇರುವಾತನ ತಿಳಿಯದೆ
ಎಲ್ಲೆಡೆ ಇರುವಾತನ
ಎಲ್ಲವ ಬಲ್ಲಾತನ
ಎಲ್ಲವ ಸೃಷ್ಟಿಸಿದ
ದೇವನ ಅರಿಯದೆ
ಮೂಕನಾದೆ!

ಮಾತು ಏತಕೆ
ಸಾರವಿಲ್ಲ
ಮಾತು ಏತಕೆ
ಅದರಲಿ ಭಾರವಿಲ್ಲ
ಸದ್ದು ಮಾತ್ರ
ಮದ್ದಿಲ್ಲ ಅದರಲಿ
ಹೀಗರಲು
ಮಾತು ಏಕೆ
ಒಮ್ಮೆ ಮೂಕನಾದೆ!

ಮಾತೇ ಬೇಡ
ಕಾಣದ ದೇವನ ಕರೆಯಲು
ಮಾತೇ ಬೇಡ
ಕಾಣದ ಕರ್ತನಲಿ ಬೆರೆಯಲು
ಮಾತಿಲ್ಲದೇ ಮೌನದಿ
ಕರೆಯಲು ಆತನ
ಒಮ್ಮೆ ಮೂಕನಾದೆ!

ಮೂಕನಾದೆ ಹೊರಗೆ
ಮಾತಿಲ್ಲದೆ
ಮಾತಾಡಿದೆ ಒಳಗೆ
ಮಾತಿಲ್ಲದೆ!

ಎಲ್ಲವ ಮಾಡುವ ಎಮ್ಮಯ ದೇವನು
ನಮ್ಮಯ ಬಾಳನೂ ಕೆತ್ತುವನು
ಆತನ ಅನುಗ್ರಹ ಪಡೆಯುತಾ ಬಾಳಲು
ನಮ್ಮನು ಮೇಲಕೆ ಎತ್ತುವನು

ಎಲ್ಲೆಡೆ ಇರುವ ಎಮ್ಮಯ ದೇವನು
ನಮ್ಮನು ಪ್ರೇಮದಿ ಕಾಯುವನು
ಕಷ್ಟದ ಸಮಯದಿ ಆತನ ಕರೆಯಲು
ಒಮ್ಮೆಲೆ ಕರವನು ಹಿಡಿಯುವನು

ಎಲ್ಲವ ಅರಿತಿಹ ಎಮ್ಮಯ ದೇವನು
ನಮ್ಮನು ಅನುದಿನ ಹರಸುವನು
ಆಸರೆ ಬೇಡುತಾ ಆತನ ಕರೆಯಲು
ತನ್ನಯ ದೂತರ ಕಳಿಸುವನು
-ಪೆದ್ದರಿಚ್ಚ

ಸ್ತುತಿಸುವ ಮನಗಳು ಅರಳುವ ಹೂಗಳು
ಕಾಣಲು ಜಗದಲಿ ಬಲು ಚೆಂದ
ದೇವನೇ ಎರೆವನು ಹನಿ ಹನಿ ನೀರಲು
ಬಾಡದ ಹೂಗಳೂ ಬಲು ಅಂದ

ಇತರರ ಬಾಳಲಿ ಒಳಿತನು ಕಾಣುವ
ಮನದಲಿ ಸಂತಸ ಆನಂದ
ಹೊಗಳುತ ಸ್ತುತಿಸುತಾ ಹರಸುತ ಬಾಳುವ
ಬಾಳಲಿ ಇಹುದು ಮಹದಾನಂದ

ಒಳಿತನೇ ಮಾಡುವ ಸೃಷ್ಟಿಯ ನೋಡುತಾ
ಒಳಿತನೆ ಮಾಡುತಾ ಸಾಗೋಣ
ದೇವನ ನೆರಳಲಿ ಅನುದಿನ ಅರಳುತಾ
ದೇವನ ಮಹಿಮೆಯ ಹಾಡೋಣ
-ಪೆದ್ದರಿಚ್ಚ

ದೇವನು ಜೊತೆಯಲಿ ನಿನ್ನಯ ಇರಲು
ಹೆದರುವೆ ಏಕೆ ಓ ಮನುಜ
ದೇವನ ಅನುಗ್ರಹ ನಿನ್ನಲಿ ಸುರಿಯಲು
ಮುದುರುವೆ ಏಕೆ ಓ ತನುಜ

ಬಾಳಿನ ಹಾದಿಯ ದೈರ್ಯದಿ ಸಾಗು
ಹೆದರುವೆ ಏಕೆ ಓ ಕಂದ
ನಿನ್ನಯ ದೇವನು ನಿನ್ನನು ಕಾಯ್ವನು
ಅರಿತರೆ ಬಾಳು ಬಲು ಚೆಂದ

ದೇವನ ಅನುಗ್ರಯ ಹರಿಯುವ ನದಿಯು
ಬತ್ತದು ಎಂದಿಗೂ ತಿಳಿದಿರು ನೀ
ನದಿಯ ಬದುವಲಿ ಇದ್ದರೆ ನೀನು
ಬಾಡದು ಬಾಳು ಅರಿತಿರು ನೀ

ದೇವನ ನಿನ್ನಯ ಬಾಳಲಿ ಅರಿತರೆ
ಸಾರ್ಥಕ ನಿನ್ನಯ ಜೀವನವು
ಅರಿತು ನೀ ದೇವನ ಸಾಗಲು ಮುಂದೆ
ನಿನ್ನಯ ಬಾಳು ಪಾವನವು
-ಪೆದ್ದರಿಚ್ಚ

ದೇವರ ಅನುಗ್ರಹ ಮನುಜಗೆ ಇರಲು
ಬರಡಿನ ಭೂಮಿಯೂ ಚಿಗುರುವುದು
ಮರಳಿನ ಭೂಮಿಯೂ ಅರಳುವುದು

ದೇವರ ಅನುಗ್ರಹ ಧರೆಯಲಿ ಇರಲು
ಬಂಜೆಯೂ ಮಗುವನು ಹಡೆಯುವಳು
ವಿಧವೆಯೂ ಆಸರೆ ಪಡೆಯುವಳು

ದೇವರ ಅನುಗ್ರಹ ಧರೆಯಲಿ ಇರಲು
ದೂರ್ತನೂ ಪ್ರೀತಿಯ ಮಾಡುವನು
ವೈರಿಯೂ ಕ್ಷಮೆಯನು ನೀಡುವನು

ದೇವರ ಅನುಗ್ರಹ ಮನದಲಿ ಇರಲು
ಕಷ್ಟವೂ ಇಷ್ಟವೇ ಆಗುವುದು
ನಷ್ಟವೂ ಲಾಭಕೆ ಮರಳುವುದು
-ಪೆದ್ದರಿಚ್ಚ

ದೇವನು ಎಮ್ಮ ಜೊತೆಗಿಹನು
ರಕ್ಷಣೆ ಎಮಗೆ ನೀಡುವನು
ನಮ ಎದುರಲಿ ಕಾಣದೆ ಸಾಗುತಾ ಅನುದಿನ
ಬಾಳಿಗೆ ದಾರಿಯ ತೋರುವನು

ದೇವನು ಎಮ್ಮ ಜೊತೆಗಿಹನು
ಆಸರೆ ಎಮಗೆ ನೀಡುವನು
ನಮ ಕರವನು ಆತನ ಕರದಲಿ ಹಿಡಿದು
ಜೊತೆಯೇ ಎಮ್ಮ ಸಾಗುವನು

ದೇವನು ಎಮ್ಮ ಜೊತೆಗಿಹನು
ಪ್ರೀತಿಯ ಎಮಗೆ ತೋರುವನು
ನಮ ಹಿಂದಿನಿಂದ ನೋಡುತಾ ಪ್ರೇಮದಿ
ಕೇಡಿನಿಂದ ಎಮ ರಕ್ಷಿಪನು

ದೇವನು ಎಮ್ಮ ಜೊತೆಗಿಹನು
ಪೋಷಣೆ ಎಮಗೆ ನೀಡುವನು
ನಮ ಮೇಲಿನಿಂದ ಕರವನು ಚಾಚಿ
ಹರಸುತಾ ಎಮ್ಮನು ಕಾಯುವನು
-ಪೆದ್ದರಿಚ್ಚ