ಸುತ್ತಲೂ ಹಲವು ಗೋಡೆಗಳು
ಅದರೊಳಗೆ ನಾನು ಸೆರೆಯಾಳು
ಕೆಲವೋ ಕಟ್ಟಿದವುಗಳು
ಕೆಲವೋ ಕಾಣದವುಗಳು
ಜನಜಂಗುಳಿಯಲೂ
ಪರರ ಕಾಣಲಾಗದ
ದ್ವೀಪದೊಳಗಿನ ಬಾಳು

ಗೋಡೆಗಳು ಹಲವು
ಬೇಕಾದವುಗಳು ಕೆಲವು
ಚಿತ್ತಾರ ಕಾಣದ ಅವುಗಳ
ನೋಡಲೂ ಬೋರು
ಇಲ್ಲ ಬಾಗಿಲುಗಳು
ಗಾಜಿರುವ ಕಿಟಕಿಗಳು
ಹೊರಗೆ ನೋಡಲಾಗದೆ
ಬರೀ ಕಪ್ಪು ರಂಗಿನ ಇರುಳು.

ಓ ದೇವಾ….
ಗೋಡೆಗಳ ಕಟ್ಟಿದೆ
ಜಗಳಗಳ ನೀಗಲು
ಇಂದೋ…
ನೋಡಲಾಗದೆ ಹೊರಗೆ
ನಾ ಕಣ್ಣಿದ್ದರೂ ಕುರುಡು
ಕೆಡವಲೂ ಬಾರದು
ಹಾರಲು ಆಗದು
ಬರಲಾರದೆ ಹೊರಗೆ
ಕೊನೆವರೆಗೂ ಸೆರೆಯಾಳು…
-ಪೆದ್ದರಿಚ್ಚ

ನನ್ನ ನಿನ್ನ ಈ ಬಾಳು
ತುಸುಕಾಲದ ಗೋಳು
ಅರಿತಾಗ ಹರಿವುದು
ಜೇನು ಹಾಲು
ನನ್ನ ನಿನ್ನ ಈ ಬಾಳು
ತುಸುಕಾಲದ ಗೋಳು
ಅರಿಯದೇ ಹೋದರೆ
ಎಲ್ಲಾ ಹಾಳು…

ತುಸುಕಾಲ ಇಹುದು
ಬೀಳುವ ಮೊದಲು
ತುಸುಕಾಲ ಇಹುದು
ಮೇಲೆಳಲು
ತುಸುಕಾಲದ ಮರ್ಮ
ಅರಿತಾಗ ಬಾಳು
ಇನ್ನೇನು ಬೇಕು
ನೀನೇ ಹೇಳು…

ತುಸುಕಾಲ ಇಹುದು
ಕಾಡುವ ನೋವು
ತುಸುಕಾಲ ಇಹುದು
ಸುಖದ ನಲಿವು
ತುಸುಕಾಲದ ಧರ್ಮ
ಅರಿತಾಗ ಬಾಳು
ನೆಮ್ಮದಿಯ ಗಾನವ
ನೀನೇ ಕೇಳು…

ಮನದ ಕೆಸರಿನಲಿ ಅರಳಿತು ಕಮಲವೊಂದು
ಮನದ ಕೆಸರಿನಲಿ ಅರಳಿತು ಕಮಲವೊಂದು
ನಗುನಗುತಾ ಹೇಳಿತು ಅದಕೆ ಕಾರಣ ಆ ಸೂರ್ಯನೇ ಎಂದು…

ಮನದ ಕಪ್ಪು ಮೋಡದಿಂದ ಜಿನುಗಿತು ಹನಿಯೊಂದು
ಮನದ ಕಪ್ಪು ಮೋಡದಿಂದ ಜಿನುಗಿತು ಹನಿಯೊಂದು
ಅದು ತೇಲಾಡುತಾ ಹೇಳಿತು ಅದಕೆ ಕಾರಣ ಆ ಸೂರ್ಯನೇ ಎಂದು…

ಮನದ ಕಾರ್ಗತ್ತಲಲಿ ಮೂಡಿತು ಬೆಳಕೊಂದು
ಮನದ ಕಾರ್ಗತ್ತಲಲಿ ಮೂಡಿತು ಬೆಳಕೊಂದು
ಬೆಳದಿಂಗಳು ಹೇಳಿತು ಅದಕೆ ಆ ಸೂರ್ಯನೇ ಎಂದು…

ಮನದ ದುಃಖ ಸಾಗರದಿ ಮೂಡಿತು ಅಲೆಯೊಂದು
ಮನದ ದುಃಖ ಸಾಗರದಿ ಮೂಡಿತು ಅಲೆಯೊಂದು
ಜಿಗಿದಾಡುತಾ ಅಲೆ ಹೇಳಿತು ಅದಕೆ ಕಾರಣ ಆ ಸೂರ್ಯನೇ ಎಂದು…

ಮನದ ಅಜ್ಞಾನದಲಿ ಚಿಗುರಿತು ಕಿಡಿಯೊಂದು
ಮನದ ಅಜ್ಞಾನದಲಿ ಚಿಗುರಿತು ಕಿಡಿಯೊಂದು
ಹಾರುತಾ ಕಿಡಿ ಹೇಳಿತು ಆ ಬೆಳಕೇ ದೇವನೆಂದು…
-ಪೆದ್ದರಿಚ್ಚ

ಮೊಟ್ಟೆ ಒಡೆಯದೇ ಮರಿಯು ಬಾರದು
ಮರಿಯು ಹುಟ್ಟದೆ ಗೆಲುವು ಕಾಣದು
ರೆಕ್ಕೆ ಬಲಿಯದೆ ಹಕ್ಕಿ ಹಾರದು
ದೂರ ಹಾರದೇ ಮೇವ ಕಾಣದು

ಕಳೆದುಕೊಳ್ಳದೆ ಗಳಿಸಲಾಗದು
ನಷ್ಟವಿಲ್ಲದೆ ಲಾಭ ದೊರೆಯದು
ಕಳೆದು ಕೊಳ್ಳುವ ಭಯದಿ ಕುಳಿತರೆ
ಗಳಿಸಿಕೊಳ್ಳುವ ಸುಖವು ದೊರೆಯದು

– ಪೆದ್ದರಿಚ್ಚ

ಕಡಿಮೆ ಏನಿದೆ ಮನುಜಗೆ
ಹೇರಳವಿದೆ ಬೆಳೆ
ಕೊಯ್ಲುಗಾರರಿಗದು ಕಾಣದಿರೆ
ಆಗುವುದದೂ ಕಳೆ

ಕಾಳ ಪಡೆದ ಮನುಜಗೆ
ಮರೆತುಹೋಗಿದೆ ಕಲೆ
ಹುಲ್ಲ ತಿನ್ನಲು ಬಯಸಿದೆ
ಬೆಳೆಯ ಅರಿಯದೆ ತಲೆ

ಉರಿಯುತಿದೆ ಪೊರೆಯಲು
ದೈವ ಪ್ರೀತಿಯ ಒಲೆ
ಮನುಜ ಸೋತಿಹನರಿಯಲು
ಪ್ರೀತಿ ಉಕ್ಕುವ ಸೆಲೆ

ಬೆಳೆಯ ಮಾಡಿದೆ ಕಳೆ
ನೂರು ಪಾಪದ ಬಲೆ
ಸುರಿಸೋ ದೇವನೆ ಮಳೆ
ಸವಿಯ ಪ್ರೀತಿಯ ಅಲೆ
-ಪೆದ್ದರಿಚ್ಚ

ಆಸೆಯೇ ಮೋಸಕ್ಕೆ ಕಾರಣ
ಮೋಸ ಮಾಡುವುದೂ ಆಸೆಗೆ
ಮೋಸ ಹೋಗುವುದೂ ಆಸೆಗೆ
ಆಸೆಯಿಂದ ಎದ್ದ ಮೋಸಕೆ
ಕೊನೆಗೆ ದುಃಖದ ಹಾಸಿಗೆ…

ಆಸೆಯೇ ಮುಂದೆ ಸಾಗಲು ಕಾರಣ
ಗುರಿ ತಲುಪುವುದೂ ಆಸೆಗೆ
ಬೇಗ ತಲುಪುವುದೂ ಆಸೆಗೆ
ಮೋಸದಿಂದ ಗೆದ್ದ ಗೆಲುವಿಗೆ
ದುಃಖವೇ ಬಹುಮಾನ…

ಆಸೆಯೇ ಬೆಳವಣಿಗೆಗೆ ಕಾರಣ
ಬುದ್ಧಿವಂತನಾಗುವುದೂ ಆಸೆಗೆ
ಸಿರಿವಂತನಾಗುವುದೂ ಆಸೆಗೆ
ಗಳಿಕೆಯಲಿ ಮೋಸ ಬೆರೆತರೆ
ನೆಮ್ಮದಿ ಕಾಣದ ಕೊರಗೇ ಸಾಧನೆ…

ಆಸೆಯೇ ಕಾರಣ
ಸಾಂಗತ್ಯ ಬಯಸುವುದೂ ಆಸೆಗೆ
ಸಂಬಂಧದಲಿ ಬೆರೆಯುವುದೂ ಆಸೆಗೆ
ಮೋಸದ ನೆರಳಲಿ ಬೆಂದರೆ
ಸುಖ ಕಾಣದ ಬದುಕೇ ಸಂತತಿ…

ಆಸೆಯೇ ಸಾತ್ವಿಕತೆಗೆ ಕಾರಣ
ಸಂತನಾಗುವುದೂ ಆಸೆಗೆ
ಪಾಪಿಯಾಗುವುದೂ ಆಸೆಗೆ
ಪಾಪದ ಮೋಸದಲಿ ಮಿಂದಾಗ
ದೈವೀಕತೆಯಿಲ್ಲದ ಸಪ್ಪೆ ಬದುಕೇ ಆಸ್ಥಿ…
-ಪೆದ್ದರಿಚ್ಚ

ಒಲೆಗಳು ಕಡಿಮೆಯಾಗಿವೆ
ಆದ್ದರಿಂದಲೋ ಏನೋ
ಹೃದಯಗಳು ದ್ವೇಷದ ಒಲೆಗಳಾಗಿವೆ
ಪ್ರೀತಿಯ ಒರತೆಗಳು ಬತ್ತಿರಲು
ಹಗೆಯ ಬತ್ತಿಗಳೇ ಕುಣಿಯುತಲಿವೆ…

ಪ್ರೀತಿಪರು ಯಾರಿಲ್ಲ ದ್ವೇಷವನು
ಆದರೆ ದ್ವೇಷವೇ ಮನದ ಬಾಗಿಲ ಮೆಟ್ಟಿಲು
ಉಣಲಾರಿಗೂ ಬೇಡ ಹಗೆಯ ಅಗುಳು
ಬಡಿಸುತ್ತಿರುವರು ಕಹಿ ದ್ವೇಷವ ಸಿಹಿಯೊಳು
ಮನದೊಳಗಿನ ದ್ವೇಷ ನಿನ್ನ ಸುಡದೇ
ಪರರ ಹೇಗೆ ಸುಡುವುದು ಹೇಳು ಪೆದ್ದರಿಚ್ಚ?

ಪ್ರೀತಿಯ ಬುಗ್ಗೆ ನಿನ್ನಲಿ ಏಳಲು
ನೀ ಮೋಡದಂತಾಗುವೆ
ಭೂಮಿಯ ಬಿರುಕನು ಕಂಡು
ತಣಿಸಲು ಮಳೆಗರೆಯುವೆ…

ಪ್ರೀತಿಯ ಹೂವು ನಿನ್ನಲಿ ಅರಳಲು
ನೀ ಕಲ್ಪವೃಕ್ಷದಂತಾಗುವೆ
ಹಸಿವ ನೀಡುವ ಬೇನೆಯ ಕಂಡು
ಸಂತೈಸುವ ಫಲ ನೀಡುವೆ.

ಪ್ರೀತಿಯ ಚಿಗುರು ನಿನ್ನಲಿ ಚಿಗುರಲು
ನೀ ವಿಶಾಲ ಮರದಂತಾಗುವೆ
ಸುಡುವ ಬಿಸಿಲಲಿ ಜನರ ಕಂಡು
ರಕ್ಷಿಸುವ ನೆರಳಾಗುವೆ…

ಪ್ರೀತಿಯ ಚಿಲುಮೆ ನಿನ್ನಲಿ ಬೆಳಗಲು
ನೀ ದೀಪದಂತಾಗುವೆ
ಎಡವಿ ಬೀಳುವ ಜನರ ಕಂಡು
ಕಲಿಸುವ ದಾರಿದೀಪವಾಗುವೆ…

ಪ್ರೀತಿಯ ಹನಿಯೊಂದು ನಿನ್ನಲಿ ಹರಿಯಲು
ನೀ ಅಲೆಯಂತಾಗುವೆ
ಕಾಣದ ನೋವನು ಕಣ್ಣಲಿ ಕಂಡು
ಕನಿಕರದಿ ಮುದ ನೀಡುವೆ…
-ಪೆದ್ದರಿಚ್ಚ

ಮಳೆಯಿಲ್ಲದೆ ನೀರಿಲ್ಲ
ನೀರಿಲ್ಲದೆ ನದಿಯಿಲ್ಲ
ನದಿಯಿಲ್ಲದೆ ಕಡಲಿಲ್ಲ
ಕಡಲಿಲ್ಲದೇ ಮುಗಿಲಿಲ್ಲ
ನೀನಿಲ್ಲದೇ ಓ ದೇವಾ
ಏನೇನೂ ಇಲ್ಲಿಲ್ಲ

ತಾಯಿಲ್ಲದೆ ಮಗುವಿಲ್ಲ
ಮಗುವಿಲ್ಲದೆ ನಗುವಿಲ್ಲ
ನಗುವಿಲ್ಲದೆ ರಂಗಿಲ್ಲ
ರಂಗಿಲ್ಲದೆ ಚೆಲುವಿಲ್ಲ
ನೀನಿಲ್ಲದೇ ಓ ದೇವಾ
ಶೂನ್ಯವೇ ಬಾಳೆಲ್ಲಾ

ಎಲೆಯಿಲ್ಲದೆ ಮರವಿಲ್ಲ
ಮರವಿಲ್ಲದೆ ವನವಿಲ್ಲ
ವನವಿಲ್ಲದೆ ಹಸಿರಿಲ್ಲ
ಹಸಿರಿಲ್ಲದೆ ಉಸಿರಿಲ್ಲ
ನೀನಿಲ್ಲದೇ ಓ ದೇವಾ
ನನ್ನಲ್ಲಿ ಬಲವಿಲ್ಲ
-ಪೆದ್ದರಿಚ್ಚ

ಬಾಳು ಗಿಡದಂತಿರಬೇಕು
ನಗು ತುಂಬಿ ನಿಂತಿರಬೇಕು
ಚಳಿಯಾಗಲಿ ಸೆಕೆಯಾಗಲಿ
ಸದಾ ಬೆಳೆಯುತ್ತಿರಬೇಕು

ಬಾಳು ಗಿಡದಂತಿರಬೇಕು
ಎದೆತುಂಬಿ ನಿಂತಿರಬೇಕು
ಹಗಲಾಗಲಿ ಇರುಳಾಗಲಿ
ಹಚ್ಚ ಹಸಿರಾಗಿರಬೇಕು

ಬಾಳು ಗಿಡದಂತಿರಬೇಕು
ಭಯವಿಲ್ಲದೆ ನಿಂತಿರಬೇಕು
ಹದವಾಗಿರಲಿ ಬರಡಾಗಿರಲಿ
ಆಳವಾಗಿ ಬೇರೂರಿರಬೇಕು

ಬಾಳು ಗಿಡದಂತಿರಬೇಕು
ಕರ ಚಾಚಿ ನಿಂತಿರಬೇಕು
ಹಿರಿದಾಗಿರಲಿ ಕಿರಿದಾಗಿರಲಿ
ಕವಲುಗಳು ಗರಿಕೆದರಬೇಕು

ಬಾಳು ಗಿಡದಂತಿರಬೇಕು
ಹೂವರಳಿ ನಿಂತಿರಬೇಕು
ಹುಳಿಯಾಗಲಿ ಸಿಹಿಯಾಗಲಿ
ಹಣ್ಣುಗಳು ಮಿನುಗುತ್ತಿರಬೇಕು

ಬಾಳು ಗಿಡದಂತಿರಬೇಕು
ಕೈ ಬೀಸಿ ನಿಂತಿರಬೇಕು
ಮಳೆಯಾಗಲಿ ಬಿಸಿಲಾಗಲಿ
ನೆರಳಾಸರೆ ನೀಡುತ್ತಿರಬೇಕು

ಬಾಳು ಗಿಡದಂತಿರಬೇಕು
ಮೈತುಂಬಿ ನಿಂತಿರಬೇಕು
ಇಂದೇ ಆಗಲಿ ಎಂದೇ ಆಗಲಿ
ದೈನ್ಯದಿ ನಲಿಯುತ್ತಿರಬೇಕು
-ಪೆದ್ದರಿಚ್ಚ