ಸುಡು ಬಿಸಿಲಿನಂತಾದರೂ ಸುಡು
ಉರಿವ ಬೆಂಕಿಯಂತಾದರೂ ಸುಡು
ಒಮ್ಮೆ ಸುಟ್ಟು ಬಿಡು
ಚಳಿಹಿಡಿದ ಹೃದಯವನ್ನೊಮ್ಮೆ ಎಬ್ಬಿಸಿಬಿಡು
ನೀ ಅಡಗಿಸಿರುವ ಆ ಪ್ರೀತಿಯನ್ನೊಮ್ಮೆ
ಅರಿಯಲು ಕಲಿಸಿಬಿಡು

ಕೋಲಿನಿಂದ ಹೊಡೆದಾದರೂ ಕಲಿಸು
ಕೈಯಿಂದ ಬಡಿದಾದರೂ ಕಲಿಸು
ಒಮ್ಮೆ ಕಲಿಸಿಬಿಡು
ಮಂಕಾಗಿರುವ ಮನಸ್ಸಿಗೆ ಒಮ್ಮೆ ಬಡಿದುಬಿಡು
ನಿನ್ನ ಪ್ರೀತಿಯ ಆಳವ ಅರಿಯಲು ಕಲಿಸಿಬಿಡು

ಸುರಿವ ಮಳೆಯಿಂದಾದರೂ ತೋಯಿಸು
ಹರಿವ ನೀರನಿಂದಾದರೂ ತೋಯಿಸು
ಒಮ್ಮೆ ನೆನೆಸಿಬಿಡು
ಒಣಗಿ ಬರಡಾಗಿರುವ ನನ ಬಾಳನು ಹಡಮಾಡಿಬಿಡು
ನಿನ್ನ ಪ್ರೀತಿಯ ಅಪ್ಪುಗೆಯನು ಸವಿಯಲು ನೆನೆಸಿಬಿಡು
-ಪೆದ್ದರಿಚ್ಚ

ಎಲ್ಲರ ಹೃದಯಕೆ ಕಣ್ಣಿದೆ ಒಂದು
ಪ್ರೀತಿ ಎಂಬುದು ಅದರ್ ಹೆಸರು
ಆ ಕಣ್ಣನು ತೆರೆಯದ ಕುರುಡನ ಗೋಳು
ಹಸಿರನು ಕಾಣದ ಬರೀ ಕೆಸರು

ಊನತೆ ಇರುವ ಮನುಜರು ಇಹರು
ಸುಂದರ ಸೃಷ್ಟಿಯ ಧರೆಯೊಳಗೆ
ಹೃದಯವೇ ಇಲ್ಲದ ಮನುಜರು ಸಿಗರು
ಅಳಿಯುವ ದೇಹದ ಬಲೆಯೊಳಗೆ

ಸ್ವಾರ್ಥ ದ್ವೇಷದ ಕಲೆಗಳು ಸಹಜ
ಬಾಳಿನ ಬಿಳಿಯ ವಸ್ತ್ರದಲಿ
ಕಲೆಗಳ ತೊಳೆದು ಗಳಿಸು ನೀ ಕಣಜ
ಸೋಲದ ಪ್ರೀತಿಯ ಅಸ್ತ್ರದಲಿ

ಇರಿಸಿಹ ದೇವನು ನಿನ್ನಯ ಹೃದಯದಿ
ಬತ್ತದ ಪ್ರೀತಿಯ ಒರತೆಯನು
ಹಂಚುತಾ ಬಾಳು ಪ್ರೀತಿಯ ಇಹದಲಿ
ಮಾಡದೇ ಯಾವುದೇ ಅಳತೆಯನು
-ಪೆದ್ದರಿಚ್ಚ

ಪದಗಳು ಸಾಲವು
ಪ್ರೀತಿಯ ಹೇಳಲು
ಹೃದಯದಿ ಭಾವನೆ
ಹರಿಬೇಕು
ಪದಗಳು ನೀಡವು
ಅರ್ಥವ ಬಾಳಿಗೆ
ನಂಬಿಕೆ ಮನದಿ
ಉಳಿಬೇಕು

ಮಾತನು ಅರಿಯದ
ಮಗುವಿಗೂ ತಿಳಿದಿದೆ
ತಾಯಿಯ ಕರೆಯಲು
ಅಳುವಿಂದ
ಪದಗಳ ಹೇಳದೆ
ತಾಯಿಯು ಮಗುವಿಗೆ
ನೀಡಲು ಗೊತ್ತಿದೆ
ಮುಧದಿಂದ

ಪದಗಳು ಬೇಡ
ನಿನ್ನಯ ಭಕ್ತಿಗೆ
ದೇವಗೆ ತಲುಪವು
ತಿಳಿದಿರಲಿ
ಆತನ ಪ್ರೀತಿಗೆ
ಹೃದಯವು ಮಿಡಿದರೆ
ಸ್ವರ್ಗವೇ ಅಲ್ಲಿದೆ
ಗೊತ್ತಿರಲಿ
-ಪೆದ್ದರಿಚ್ಚ

ತಟ್ಟೆ ತೊಳೆವ ನೆಪ ಹೇಳಿ
ತುತ್ತ ಕಿತ್ತು ತಿನ್ನುವ ಜನರಿಹರು
ಮುಗ್ದನಾಗಿರಬೇಕು ಪೆದ್ದರಿಚ್ಚ
ಆದರೆ ಮೂರ್ಖನಾಗಬೇಡ

ಮುತ್ತು ನೀಡುವ ವಾತ್ಸಲ್ಯ ತೋರಿ
ರಕ್ತ ಹೀರುವ ಜನರಿಹರು
ದೀನನಾಗಿರು ಪೆದ್ದರಿಚ್ಚ
ಆದರೆ ಮೈ ಮರೆಯಬೇಡ

ಸತ್ಯ ಹೇಳುವ ಉದ್ದೇಶ ತೋರಿ
ಸುಳ್ಳ ತುರುಕುವ ಜನರಿಹರು
ತಾಳ್ಮೆಬೇಕು ಪೆದ್ದರಿಚ್ಚ
ಆದರೆ ಕಿವುಡನಾಗಬೇಡ

ಕುರಿಯಂತೆ ಬಳಿ ಬಂದು
ತೋಳದಂತೆ ಜಿಗಿವ ಜನರಿಹರು
ಆತಿಥ್ಯ ಇರಲಿ ಪೆದ್ದರಿಚ್ಚ
ಆದರೆ ಕುರುಡನಾಗಬೇಡ

ಅರಳುವ ಹೂವೆಲ್ಲೆಲ್ಲಾ ಮಕರಂದ ಉಂಟೇ ಪೆದ್ದರಿಚ್ಚ?
ಜೇನ ಹುಳುವಿನಂತಾಗು
ಹೂವಿಂದ ಹೂವಿಗೆ ಹಾರುತಿರು
ಸವಿಯ ಸವಿಯುತಿರು
ಜೇನ ನೀಡುವ ಜ್ಞಾನಿಯಾಗು
ಸಿಹಿಯ ನೀಡುತಾ ಅಮರನಾಗು.

ಚಿನ್ನದ ಸರವನು ನಾಯಿಗೆ ತೊಡಿಸಿ
ಮುತ್ತಿನ ಹಾರವ ಹಂದಿಗೆ ಮುಡಿಸಿ
ಸಿರಿತನ ತೋರುವ ಮೂರ್ಖ ಮನುಜನ
ಕರೆಯುವೆ ಹೇಗೆ ನೀ ಹೇಳು!

ಸಿರಿತನ ನಿನ್ನಯ ಬೆಳಗಲಿ ಒಳಿತಲಿ
ಪರರಿಗೆ ದಾರಿಯ ತೋರುತಲಿ
ಕೇಡನು ಅರಿಯದೆ ಇರುಳಿನ ನೆರಳಲಿ
ತೊಡಿಸುವೆ ಏಕೆ ಚಿನ್ನದಲಿ.

ಇತರರು ನಿನಗೆ ಮಾಡಲು ಬಯಸುವ
ಒಳಿತನು ಮೊದಲು ನೀ ಮಾಡು
ಸ್ವರ್ಗದ ಬಾಗಿಲು ಎದುರಲಿ ನಿನ್ನಯ
ಬೇಗನೆ ತೆರೆವುದು ನೀ ನೋಡು
-ಪೆದ್ದರಿಚ್ಚ

ಹುಟ್ಟು ಸಾವಿನ ನಡುವೆ
ಬೆಟ್ಟದಂತಹ ವಿಶಾಲ ಹೃದಯಕೆ
ದೇವರ ಯೋಜನೆಯ ಗುಟ್ಟು
ಮೆಲ್ಲ ಮೆಲ್ಲಗೆ ಆಗುವುದು ರಟ್ಟು

ಬಟ್ಟಲಿನಂತೆ ಬಾಳು ಚಿಕ್ಕದಾದರೂ ಸರಿ
ಚಟ್ಟ ಏರುವ ಮುನ್ನ ಕೆಟ್ಟವನಾಗಬಾರದು
ಮುಟ್ಟಲು ಮನಸು ಹಿಟ್ಟಿನಂತಿದ್ದರೂ ಸರಿ
ಸುಟ್ಟು ಕರುಕಲಾಗಬಾರದು

ದೇವನು ಹೋಗನು ನಿನ್ನ ಬಿಟ್ಟು
ಕಾಯುವನು ಆತನ ದೂತನನು ಇಟ್ಟು
ಆತನೊಲವು ಬಿಡಿಸಲಾಗದ ನಂಟು
ಅರಿತರದನು ಸಾವಲೂ ಜೀವನ ಉಂಟು

ಲೆಕ್ಕಹಾಕು ದಿನಗಳಿವೆ ಎಷ್ಟು
ಕಳೆದು ಕೂಡಿದರೆ ಒಂದೆರದು ಒಟ್ಟು
ತಡಮಾಡದಿರು ಬೇಗನೇ ಜೀವನವ ಕಟ್ಟು
ಎದುರಾಗುವ ಮುನ್ನ ತರತರದ ಬಿಕಟ್ಟು

ಸಾಧಿಸಬೇಕಾದುದನು ಬಿಟ್ಟು
ಸೋಮಾರಿಯಾಗಬೇಡ
ದಯವಿಟ್ಟು
ಆಗದಿರಲಿ ಬಾಳು ನಿಸ್ಸಾರ ಹೊಟ್ಟು
ನಿನ್ನ ಕಂಡು ದೇವನಿಗೆ ಬರದಿರಲಿ ಸಿಟ್ಟು
-ಪೆದ್ದರಿಚ್ಚ

ಸುಮನಸ್ಕ ಮನುಜರು ಇನ್ನೂ ಇಹರು
ದೇವರ ಇರುವಿಕೆ ತಿಳಿಸುವರು
ಸದ್ಗುಣ ಫಲಗಳ ಬೆಳೆಯುತಲಿಹರು
ದೇವರ ಸವಿಯನು ಹಂಚುವರು

ಸೃಷ್ಟಿಯ ದೇವನು ಹಚ್ಚುತಲಿಹನು
ಹೃದಯದಿ ಪ್ರೇಮದ ಜ್ಯೋತಿಹನು
ಆ ಬೆಳಕಿನ ಕಿರಣವು ನೀಗುತಲಿಹುದು
ಬಡವನ ನೋವಿನ ಕತ್ತಲನು

ಹಸಿವಿನ ಒಣಗಿದ ಭೂಮಿಗೆ ಸಿಗುವುದು
ಸಿಂಚನ ದಾನಿಯ ದಾನದಲಿ
ಆ ದಾನವ ಪಡೆದ ಬಡವಗೆ ದೊರೆವುದು
ದೇವನ ದರ್ಶನ ಹೃದಯದಲಿ

ಬಡವರ ಹಸಿವನು ನೀಗುವ ಮನುಜಗೆ
ಆತ್ಮದ ಭೋಜನ ಲಭಿಸುವುದು
ಒಂದೇ ಒಂದು ದಾನದ ನೆರವಲಿ
ಇಬ್ಬರ ಹಸಿವೂ ನೀಗುವುದು
-ಪೆದ್ದರಿಚ್ಚ

ನೀರಿನಲ್ಲಿ ಈಜಬಲ್ಲೆ
ಗಾಳಿಯಲ್ಲೂ ತೇಲಬಲ್ಲೆ
ನೆಲವ ಅಗೆದು ನಿಧಿಯ ತೆಗೆವ
ನಿನಗೆ ಇನ್ನೂ ಚಿಂತೆಯೇ?

ಎಲ್ಲವನ್ನು ಅರಿಯಬಲ್ಲೆ
ಜ್ಞಾನವನ್ನು ಪಡೆಯಬಲ್ಲೆ
ಸರಿ ತಪ್ಪು ಅರಿಯಬಲ್ಲ
ನಿನಗೆ ಇನ್ನೂ ಚಿಂತೆಯೇ?

ತಿನ್ನೋ ಅನ್ನ ಬೆಳೆಯಬಲ್ಲೆ
ಸೂರೊಂದ ಕಟ್ಟಬಲ್ಲೆ
ಮಾನ ಮುಚ್ಚೋ ಬಟ್ಟೆ ಉಡುವ
ನಿನಗೆ ಇನ್ನೂ ಚಿಂತೆಯೇ?

ಪ್ರೀತಿಯನ್ನು ನೀಡಬಲ್ಲೆ
ಪ್ರೇಮವನ್ನು ಸವಿಯಬಲ್ಲೆ
ಕಷ್ಟ ಸುಖವ ಅರಿಯಬಲ್ಲ
ನಿನಗೆ ಇನ್ನೂ ಚಿಂತೆಯೇ?
-ಪೆದ್ದರಿಚ್ಚ

ಕರವೆತ್ತಿ ನೆರವ ನೀಡದೆ
ಕರ್ತನೇ ಎಂದರೆ ದೇವನನು
ಆಲಿಸಬಲ್ಲನೆ ನಮ್ಮ ಪ್ರಾರ್ಥನೆಯ…
ನಿರರ್ಥಕವಲ್ಲವೇ ನಮ್ಮ ಪದಗಳು

ಪರರ ಭಾವವ ಅರಿಯದೇ
ಪ್ರಭುವೇ ಎಂದರೆ ದೇವನನು
ಕೇಳುವನೆ ದೇವನು ನಮ್ಮ ಪ್ರಾಥನೆಯ…
ಅರ್ಥಹೀನವಲ್ಲವೇ ನಮ್ಮ ಉಚ್ಚಾರವು

ಸೌಮ್ಯಭಾವವ ತೊರೆದು
ಸ್ವಾಮಿ ಎಂದರೆ ದೇವನನು
ತಲುಪುವುದೇ ದೇವನಿಗೆ ನಮ್ಮ ಪ್ರಾರ್ಥನೆಯು…
ನಿಸ್ಸಾರವಲ್ಲವೇ ನಮ್ಮ ಪಟನೆಯು

ಸೃಷ್ಟಿಯ ಸವಿಯದೆ ಮಲಿನಗೊಳಿಸಿ
ಸೃಷ್ಟಿ ಕರ್ತನೆ ಎಂದರೆ
ಇಷ್ಟವಾಗಬಹುದೇ ದೇವನಿಗೆ ನಮ್ಮ ಪ್ರಾರ್ಥನೆಯು…
ಫಾರಿಸಾಯಕವಲ್ಲವೇ ನಮ್ಮ ಜೇನ ನುಡಿಗಳು

ದಯೆ ತೋರದೆ ಬಾಳಿನಲಿ
ದೇವ ಎಂದರೆ ದೇವನನು
ಕಿವಿಗೊಡುವನೆ ದೇವನು ನಮ್ಮ ಪ್ರಾರ್ಥನೆಗೆ…
ಮೂರ್ಖತನವಲ್ಲವೇ ನಮ್ಮ ನುಡಿಯರ್ಪಣೆ

ಪರಮ ಆಪ್ತನಿಗೂ ದ್ರೋಹ ಬಗೆವಾಗ
ಪರಮಾತ್ಮ ಎಂದರೆ ದೇವನನು
ಪ್ರಸನ್ನನಾಗುವನೆ ದೇವನು ನಮ್ಮ ಪ್ರಾರ್ಥನೆಗೆ…
ಬರಡಲ್ಲವೇ ತುಟಿಯುಲಿಯುವ ಕೀರ್ತನೆಗಳು

ಹೃದಯದಿಂದ ಹೊರಟ
ನುಡಿಗಳು ನಿರರ್ಥಕ
ಪ್ರೀತಿ ಹರಿದಾಗ ನುಡಿಗಳಲಿ
ಬಾಳು ಸಾರ್ಥಕ
– ಪೆದ್ದರಿಚ್ಚ

ಪರದಲಿ ಇರುವ ಪ್ರೀತಿಯ ದೇವನೆ
ಸಾವಿರ ನಮನವು ನಿನಗೆ
ನಿನ್ನಯ ನಾಮಕೆ ಸಲ್ಲಲಿ ಮಹಿಮೆ
ನಡೆಯಲಿ ನಿನ್ನಯ ಯೋಜನೆ
ಮನುಜರು ಬಾಳುವ ಸುಂದರ ಧರೆಯಲಿ
ನಿನ್ನಯ ರಾಜ್ಯವು ಬರಲಿ
ಸೃಷ್ಟಿಯ ಸಕಲ ಜೀವಿಗೆ ದೊರೆಯಲಿ
ನಿನ್ನಯ ಪ್ರೀತಿಯು ಸಿಗಲಿ

ಕ್ಷಮೆಯ ಸುರಿಮಳೆ ಸುರಿಸಲು ಬಾ
ಕ್ಷಮೆಯನು ನೀಡಲು ಕಲಿಸಲು ಬಾ
ಕಷ್ಟದ ಸಮಯದಿ ಪೊರೆಯಲು ಬಾ
ದುಷ್ಟನ ಕರದಿಂ ರಕ್ಷಿಸ ಬಾ
ಶೋಧನೆಗೆಮ್ಮನು ಬೀಳಿಸದೆ
ಪ್ರೀತಿಯ ಸವಿಯಲು ಕಲಿಸಲು ಬಾ
-ಪೆದ್ದರಿಚ್ಚ