ಗೋಧಿಯ ಕಾಳಿಗೂ ತಿಳಿದಿದೆ
ನಿನ್ನಯ ಹಸಿವಿನ ಭಾರ
ಮಳೆಯ ಹನಿಗೂ ಅರಿವಿದೆ
ನಿನ್ನಯ ದಾಹದ ಖಾರ
ತಿಳಿಯದು ನಿನಗೆ ಏಕೋ
ಮನುಜನೆ ಪರನ ನೋವು
ನಿನ್ನಲಿ ಅಡಗಿದೆ ಅರಿಯೋ
ಮದ್ದು ಪರನಿಗೆ ದಿನವು

ನೆರಳಿನ ಎಲೆಗೂ ತಿಳಿದಿದೆ
ರವಿಯ ಕಿರಣದ ಶಾಖ
ಮೋಡದ ಅಲೆಯೂ ಹೊರಟಿದೆ
ನೀಡಲು ಭುವಿಗೆ ಪಾಕ
ಮರೆಯುವೆ ಏಕೋ ಮನುಜ
ತಂಪನು ಎರೆಯುವ ಒಳಿತ
ಸತ್ಯವ ಹರಡುತ ಬಾಳು
ತಣಿಸಲು ಕೇಡಿನ ಉರಿತ
-ಪೆದ್ದರಿಚ್ಚ

ಭಾರದ ನೊಗ ಹೆಗಲ ಮೇಲೆ
ಹಗುರವಾಯಿತು ಎತ್ತಿಗೆ
ಹಗುರವಾಯಿತು ಹೇಗೆಂದುಯೋಚಿಸಿದರೂ ತಲೆ
ತಿಳಿಯದಾಯಿತು ಬುದ್ದಿಗೆ
ಹೆಗಲೇರಿದ ನೊಗ ಹಗುರವಾಯಿತೋ?
ನೊಗದ ಮುತ್ತಿಗೆ ಹೆಗಲಿಗೆ ಬಲ ಬಂದಿತೋ?
ನೊಗದ ಇನ್ನೊಂದು ತುದಿಯ ಕಂಡಾಗ
ಹೊಳೆಯಿತು ಉತ್ತರ ತಲೆಗೆ
ನೊಗ ಹಗುರವಾಗಲೂ ಇಲ್ಲ
ಹೆಗಲು ಬದಲಾಗಲೂ ಇಲ್ಲ
ಇನ್ನೊಂದು ತುದಿಗೆ ಹೆಗಲಿತ್ತ
ಸ್ನೇಹಿತನಿಂದ
ಭಾರವೂ ಹಗುರವಾಯಿತಲ್ಲ

ಬಾಳ ನೊಗವು ಹಗುರವಾಗದು
ಬಲದ ಹೆಗಲು ನೆರವು ನೀಡದು
ಹೆಗಲು ನೀಡುವನು ದೇವನು
ಎಂದು ಅರಿತರೆ ಮನುಜನು
ಹೊರುವ ಪ್ರತೀ ಭಾರವು ಹಗುರ ಪೆದ್ದರಿಚ್ಚ!

ಸಿಹಿಯಾದ ಹಣ್ಣಂತೆ
ದೂರದ ಕಾಡಿನಲಿ ಅದರ ಸೂರಂತೆ
ಪುಸ್ತಕಗಳ ಅರೆದು ಕುಡಿದ ಮೇಧಾವಿ
ಹಿರಿಯರ ಆಲಿಸಿ ಬೆಳೆದ ಜ್ಞಾನಿ
ಸಿರಿತನದ ಪಾಯಸ ಕುಡಿದ ಸಿರಿವಂತ
ಆ ಸಿಹಿ ಹಣ್ಣನ್ನು ಅರಸಿ ಹೊರಟ

ದೂರದ ಕಾಡಲ್ಲವೇ
ಕಾರಲ್ಲಿ ಪಯಣಿಸಿದ
ಜ್ಞಾನದ ದಿಕ್ಕೆಲ್ಲವನು ಅಳೆದು
ಕಾಡಿನ ದ್ವಾರ ತಲುಪಿದ
ಹೆದ್ದಾರಿಗಳಲಿ ನುಗ್ಗಿ
ಮರದ ದರ್ಶನ ಪಡೆದ
ಹಣ್ಣನು ನೋಡಿದ
ಪುಸ್ತಕದಲಿ ಕಂಡ
ಅದೇ ಕಣ್ಣುಕುಕ್ಕುವ ಬಣ್ಣ
ನಕ್ಷತ್ರಗಳ ಸಾಲಿನಂತೆ
ಲೆಕ್ಕಹಾಕಲಾಗದಷ್ಟು ಹಣ್ಣುಗಳು
ರುಚಿಯನ್ನು ಮನದಲ್ಲೇ ಲೆಕ್ಕಹಾಕಿ ಚಪ್ಪರಿಸಿದ

ಕಾರಿಂದ ಇಳಿಯಲು ಕಾಡುವ ಭಯ
ಕಾಲು ಮಣ್ಣಾಗದಿರಲು
ತೊಟ್ಟ ಬೂಟಿಗೆ ಮಣ್ಣಾಗಬಾರದೆಂಬ ಮೊಂಡುತನ
ಮರ ಹತ್ತಲಾಗದ ಅಜ್ಞಾನ
ಕಣ್ಣ ಮುಂದಿದ್ದರೂ
ಹಣ್ಣು ತಿನ್ನಲಾಗದ ದುರ್ಭಾಗ್ಯ
ಈ ಆಂತರಿಕ ಯುದ್ಧವಾಗುತ್ತಿದ್ದಾಗಲೇ
ಪುಸ್ತಕದ ಗಂಧಗಾಳಿ ಅರಿಯದ
ಸಿರಿತನದ ಸವಿಯನು ಕೇಳರಿಯದ
ಹರುಕಲು ಬಟ್ಟೆಯ
ಪುಟ್ಟ ಬಾಲಕನೊಬ್ಬ
ಮರಹತ್ತಿ ಹಣ್ಣುಗಳನು
ತಿಂದು ತೇಗುತ್ತಿದ್ದ
-ಪೆದ್ದರಿಚ್ಚ

ತಾಯಿಯೇ ಬಾಳಿನ ಮೂಲವು
ಆಕೆಯಿಲ್ಲದೆ ಎಲ್ಲವೂ ಮೂಕವು
ಇದ್ದರೆ ಬಳಿಯಲಿ ಆಕೆಯು ಅನುದಿನ
ಪ್ರತಿಕ್ಷಣ ಬಾಳಲಿ ಸ್ವರ್ಗವು

ತಾಯಿಯೇ ಮೊದಲ ಗುರುವು
ಆಕೆಯಿಲ್ಲದೆ ಸಿಗದು ವರವು
ಕರವನು ಹಿಡಿದು ಸಾಗುತಲಿರಲು
ಎದುರೇ ಸ್ವರ್ಗದ ಕದವು

ಕೈಯನು ಚಾಚಿಬಿಡು ಒಮ್ಮೆ
ನೋವಾಗದು ನಿನಗೆ
ದೇಹ ಸಡಿಲಾಗುವುದು
ಮನ ಅರಳುವುದು
ಬಿದ್ದವನಿಗೊಂದು ಸ್ವರ್ಗ ಕಾಣುವುದು

ಕೈಯನು ಚಾಚಿಬಿಡು ಒಮ್ಮೆ
ಕಡಿಮೆಯಾಗದು ನಿನಗೆ
ಇದ್ದುದು ಹೆಚ್ಚಾಗುವುದು
ಹೆಚ್ಚಾದುದು ಬೆಲೆ ಪಡೆಯುವುದು
ಪಡೆದವನಿಗೆ ಸ್ವರ್ಗ ಕಾಣುವುದು

ಕೈಯನು ಚಾಚಿಬಿಡು ಒಮ್ಮೆ
ಕರ ಮೊಟಕಾಗದು
ನಗು ಮಿನುಗುವುದು
ಶಾಂತಿ ಹರಿಯುವುದು
ಎದುರಾದವನಿಗೆ ಸ್ವರ್ಗ ಕಾಣುವುದು
-ಪೆದ್ದರಿಚ್ಚ

ಸ್ವರ್ಗಕೆ ದಾರಿ ಹೋಗುವುದು
ನೆರೆಮನೆಯ ಅಂಗಳದಲ್ಲಿ
ಸ್ವರ್ಗ ಕುಸುಮ ಅರಳುವುದು
ಪರನ ಹೃದಯದ ಗೂಡಲಿ
ಅಮರ ಜೀವ ಬೇಕೇನು?
ಅದೋ ಹತ್ತಿರದಲ್ಲಿದೆ
ಕೈಗೆಟಕುವ ದೂರದಲಿ

ದೈವ ಪ್ರೇಮ ಸವಿಯಬೇಕೇನು?
ಪರ ಪ್ರೀತಿಯ ಎದೆಯಲಿದೆ ನೋಡು
ದೇವನ ಮೊಗವ ನೋಡಬೇಕೇನು?
ಪರನ ನಗುವ ಮೊಗವನು ನೋಡು
ದೇವನ ಎದುರಾಗಬೇಕೇನು?
ಪರನ ನರಳಾಟವ ಕಂಡು ನೆರವಾಗು
ಅಮರ ಜೀವ ಬೇಕೇನು?
ಅದೋ ಹತ್ತಿರದಲ್ಲಿದೆ
ಕೈಯನ್ನೊಮ್ಮೆ ಚಾಚಿ ನೋಡು.
-ಪೆದ್ದರಿಚ್ಚ

ನಿನ್ನೆ ಇಂದು ನಾಳೆಗಳು
ಬಾಳಲಿ ಸಾಗಿ ಹೋಗುವುವು
ಭಯವು ಮನದಲೇಕೆ
ಅವೆಂದೂ ಬದಲಾಗವು
ಹೆಗಲು ಹಗುರಾಗಲಿ
ಭಯವ ತೊರೆದುಬಿಡು
ದೇಹವನು ಹಲವರು ಕೊಲ್ಲಬಲ್ಲರು
ನಿನ್ನಾತ್ಮವ ಯಾರೂ ಮುಟ್ಟಲಾರರು
ನಿನ್ನ ಹೆಗಲು ಹಗುರಾಗಲಿ
ಭಯದ ಹೊರೆಯ ಇಳಿಸಿಬಿಡು.

ಸಂಕಟದ ಬಿರುಗಾಳಿ ಬರಲಿ
ಭಯವೇಕೆ, ತೇಲಬಲ್ಲೆ ನೀನು
ಶೋಷಣೆಯ ಅಲೆಗಳು ಏಳಲಿ
ಭಯವೇಕೆ, ಈಜಬಲ್ಲೆ ನೀನು
ದ್ವೇಷದ ಬೆಂಕಿಯ ಕಿಡಿ ಬರಲಿ
ಭಯವೇಕೆ, ಆತ್ಮದಿ ಗೆಲ್ಲಬಲ್ಲೆ ನೀನು
ನಿನ್ನ ಹೆಗಲು ಹಗುರಾಗಲಿ
ಭಯದ ಹೊರೆಯ ಇಳಿಸಿಬಿಡು
-ಪೆದ್ದರಿಚ್ಚ

ದ್ವೇಷದ ಬಿಸಿ ಬೆಂಕಿಯ ದಗೆಯಲಿ
ಉರಿಯುತಿದೆ ಜಗವು
ತಣ್ಣಗಿನ ಕೆಂಪು ಸೂರ್ಯನೂ
ಬೇಯುತಿಹನು ಹಗೆಗೆ
ಪ್ರೀತಿ ಹರಿವ ಹೃದಯದಲಿ
ದ್ವೇಷ ಹರಿದರೆ ಎಲ್ಲವೂ ವ್ಯರ್ಥ
ಸುರಿವ ಮಳೆಯು ಉರಿವ ರವಿಯ
ತಣಿಸಲಾಗುವುದೇ ಪೆದ್ದರಿಚ್ಚ?

ನಿನ್ನದು ಎಂಬುದು ಯಾವುದೂ ಇಲ್ಲ
ಮೂರೇ ದಿನದ ಬಾಳಿನಲಿ
ನಿನ್ನದು ಎಂದಿಗೂ ಬಾರದು ಜೊತೆಗೆ
ಬಾಳಿನ ಕೊನೆಯ ಯಾತ್ರೆಯಲಿ

ಎಲ್ಲವ ದೇವನು ನೀಡಿಹ ನಿನಗೆ
ಪಡೆದಿಹೆ ನೀಡದೆ ಕಾಸೊಂದ
ರಾಶಿ ಹಾಕುತ ಪಡೆದುದನೆಲ್ಲಾ
ತೊರೆಯುವೆ ವರಗಳ ರಸವೊಂದ

ನೀಡಲು ಕಲಿತರೆ ಪಡೆಯಲು ಕಲಿಯುವೆ
ಸಿರಿತನ ಬರುವುದು ಬಾಳಲ್ಲಿ
ಹಂಚಲು ಕಲಿಯದೆ ಬಾಳುತಾ ಹೋದರೆ
ಇದ್ದರೂ ಬಡತನ ಮನದಲ್ಲಿ
-ಪೆದ್ದರಿಚ್ಚ

ಮನದೊಳಗೋ ಕಿವಿಯೊಳಗೋ
ಯಾರದೋ ಗುಸುಗುಸು
ಕಿವುಡನಂತೆ ನಟಿಸಿದರೂ
ನಿಲ್ಲದದು ಒಂದು ತಾಸು
ಗುಸುಗುಸು ಕೇಳಿಸದು
ನಾ ಕೇಳದಿದ್ದರೂ ನಿಲ್ಲದು
ಯಾರದೋ ಯಾಕೋ ಗುಸುಗುಸು
ನಾನೋ ತಲ್ಲೀನ ಗಳಿಸಲು ಕಾಸು

ಅರಿಯಬೇಕೆಂದುಕೊಂಡೆ
ಆಲಿಸುವ ಕೊರತೆ
ಆಲಿಸಬೇಕೆಂದುಕೊಂಡೆ
ಮೌನದ ಕೊರತೆ
ನಿಲ್ಲದಾಗಿದೆ ಗುಸುಗುಸು
ನನ್ನೊಳಗೆ ಮೊಳಗುವ ಪಿಸುಮಾತು

ಪಿಸುಗುಡುವ ಆತ್ಮನೇ
ನಿಲ್ಲಿಸು ನಿನ್ನ ಗುಸುಗುಸು
ಕೇಳಿಸುತ್ತಿಲ್ಲ ಎನಗೆ
ನಿನ್ನ ನಿಲ್ಲದ ಪಿಸುಮಾತು
ನಿಲ್ಲಿಸಲಾಗದಿದ್ದರೆ ಪರವಾಗಿಲ್ಲ
ಮೌನದಿ ಆಲಿಸಲು ಕಲಿಸು
-ಪೆದ್ದರಿಚ್ಚ