ತಿನ್ನುವ ಅನ್ನದಿ
ಕಲ್ಲನು ಕಂಡರೆ
ಎಕ್ಕಿ ಹಣಿಯದೆ
ಉಣ್ಣುವರೇ?
ಉಡುವ ವಸ್ತ್ರದಿ
ಕಲೆಯ ಕಂಡರೆ
ಉಜ್ಜಿ ತೊಳೆಯದೆ
ಧರಿಸುವರೆ?

ಧೂಳಿನ ಕಣವು
ದೇಹವ ಮುಟ್ಟಲು
ಮಜ್ಜನ ಮಾಡದೇ
ಹೊರಡುವರೆ?
ತೊಡುವ ಬೂಟಲೂ
ಕೊಳೆಯ ಕಂಡರೆ
ಉಜ್ಜದೆ ಕಾಲಿಗೆ
ತೊಡಿಸುವರೇ?

ಬೀಸುವ ಗಾಳಿಲಿ
ಹೊಗೆಯು ತುಂಬಿರೆ
ನೆಮ್ಮದಿ ಉಸಿರನು
ತೆಗೆಯುವರೆ?
ಬೊಗಸೆ ನೀರಲಿ
ಕಲ್ಮಶ ತುಂಬಿರೆ
ಚಿಂತೆಯ ಮಾಡದೆ
ಕುಡಿಯುವರೆ?

ಒಳಿತನೆ ಅರಸುವ
ಬುದ್ಧಿಯ ಮನುಜನೆ
ಮೌಲ್ಯವ ಏಕೆ
ಮರೆತಿರುವೆ?
ಬೆಳೆಯನು ಬೆಳೆಯುವ
ಆತ್ಮದ ಹೊಲದಲಿ
ಕೇಡನೆ ಏಕೆ
ಬೆಳೆದಿರುವೆ?
-ಪೆದ್ದರಿಚ್ಚ

ಕಂದಮ್ಮನ ಅಳುವೂ ಭಕ್ತಿಯೇ
ತಾಯ ಪ್ರೇಮದಲ್ಲಿ
ದೈವ ಪ್ರೇಮದ ಜೇನು ಜಿನುಗುವುದನು ಕಂಡಾಗ

ರೈತನ ಬೇಸಾಯವೂ ಭಕ್ತಿಯೇ
ಭುವಿಯ ಫಲದಲಿ
ಸೃಷ್ಟಿಕರ್ತನ ಪೋಷಣೆಯ ಅಪ್ಪುಗೆಯನು ಸವಿದಾಗ

ಚಮ್ಮಾರನ ಸೇವೆಯು ಭಕ್ತಿಯೇ
ಬೂಟಿನ ಹೊಳಪಿನಲಿ
ದೈವ ಇರುವಿಕೆಯ ಕುರುಹನ್ನು ಕಂಡಾಗ

ಚಾಲಕನ ಕಾರ್ಯವೂ ಭಕ್ತಿಯೇ
ಸಾಗುವ ಹಾದಿಯಲಿ
ಬಾಳ ಹಾದಿಗೊಂದು ದೈವ ಗುರಿಯನು ಕಂಡಾಗ

ಕಮ್ಮಾರನ ಪ್ರತಿ ಏಟೂ ಭಕ್ತಿಯೇ
ಪ್ರತೀ ರೂಪದಲಿ
ದೈವ ಚಿತ್ತವು ಗರಿಕೆದರುವುದನು ಕಂಡಾಗ

ಪ್ರತಿ ಉಸಿರಾಟವೂ ಭಕ್ತಿಯೇ
ಉಸಿರು ಉಸಿರಲ್ಲೂ
ಆ ಸೃಷ್ಟಿಕರ್ತನ ಶಕ್ತಿಯನು ನೆನೆದಾಗ
-ಪೆದ್ದರಿಚ್ಚ

ಕಾಯಿಯಾದ ಹೂವು
ಹಣ್ಣಾದ ಕಾಯಿಯು
ಹೆಚ್ಚು ಕಾಲ ಸಸಿಯಲಿ
ಮನೆಯಮಾಡದು

ಆವಿಯಾದ ನೀರು
ಮೋಡವಾದ ಆವಿಯು
ಹೆಚ್ಚು ಕಾಲ ಗಗನದಿ
ನಾಟ್ಯವಾಡದು

ದಂಪತಿಯ ಆಸೆಯು
ತಾಯಿತನದ ಬಸುರು
ಹೆಚ್ಚು ಕಾಲ ಉದರದಿ
ಕಾಯಲಾರದು

ಸರ್ವಶಕ್ತ ದೇವನ
ರಾಶಿ ವರದ ಚೀಲವು
ಹೆಚ್ಚು ಕಾಲ ಭಕ್ತನ
ಅಳಿಸಲಾರದು

ಇರಲಿ ಸೈರಣೆ ಬಾಳಲಿ
ಮುಕ್ತಿ ಕಾಣುವೆ ಕೊನೆಯಲಿ
ಕರವ ಮುಗಿದು ಪ್ರಾರ್ಥಿಸು
ಮೊಸವಾಗದು
-ಪೆದ್ದರಿಚ್ಚ

ಬಿತ್ತದ ಕಳೆಯೂ ಬೆಳೆವುದು ಜೊತೆಗೆ
ಬಿತ್ತಿದ ಬೆಳೆಯೊಡ ಕೊನೆವರೆಗೂ
ಎಷ್ಟೇ ಎತ್ತರ ಬೆಳೆದರೂ ಕೊನೆಗೆ
ಬೆಂಕಿಯೇ ಗತಿಯು ಎಳೆಎಳೆಗೂ.

ಕತ್ತಲು ಎಷ್ಟು ಗಾಡವೇ ಆದರೂ
ಬೆಳಗಲು ಬೆಳಕಿನ ಕಿಡಿ ಸಾಕು
ಸೂರ್ಯನ ಕಿರಣವು ಜಗದಲಿ ಮೂಡಲು
ಯಾರಿಗೆ ಕತ್ತಲ ನಗು ಬೇಕು?

ಬೆಳೆಗಳ ಬೆಳೆಯುವ ರೈತನ ಮನದಲೂ
ಭರವಸೆ ಬೆಳೆಯುತಾ ಇರಬೇಕು
ಕಳೆಗಳು ಸುತ್ತಲು ಬೆಳೆಯುತಾ ಇದ್ದರೂ
ಮನದಲಿ ಸೈರಣೆ ಇರಬೇಕು
-ಪೆದ್ದರಿಚ್ಚ

ಅಜ್ಜ ಅಜ್ಜಿ ಇದ್ದರೆ ಮನೆಯಲಿ
ಬೇಡ ಯಾವುದೇ ನಾಟಕ ಮಂಡಳಿ
ನಡೆದರೆ ಕರವನು ಹಿಡಿದು ಜೊತೆಯಲಿ
ಜಗದ ಸುದ್ದಿಯೇ ಮಕ್ಕಳ ಕಿವಿಯಲಿ

ಅಜ್ಜನ ಬೆನ್ನೇ ಮಗುವಿಗೆ ಆಟಿಕೆ
ಆತನ ಪ್ರೀತಿಯೇ ಸುಮವು ಪೀಠಕೆ
ನೆರಿಗೆಯು ಕಂಡರೂ ಹೊರಗಿನ ನೋಟಕೆ
ಆಸರೆ ಆತನೇ ಮೊದಲ ಆ ಓಟಕೆ

ಅಂತ್ಯವೇ ಕಾಣದ ಅಜ್ಜಿಯ ಕಥೆಗಳು
ಮೌಲ್ಯದ ಮದ್ದನು ಕುಡಿಸಿದ ಸಸಿಗಳು
ಅಳಿಯದೆ ಉಳಿದಿವೆ ಕಳೆದರೂ ದಿನಗಳು
ಸಾಲವು ಬರೆದರೂ ಸಾವಿರ ಪುಟಗಳು

ಮೊದಲ ಗುರುವಿನ ಮೊದಲ ಗುರುವನು
ಧನ್ಯನು ಬಾಳಲಿ ಪಡೆದವನು
ಹಿರಿಯರ ಧೈನ್ಯದಿ ಕಾಣುವ ಮನುಜನು
ಸಾವಿರ ವರುಷ ಬಾಳುವನು
-ಪೆದ್ದರಿಚ್ಚ

ಬೇಕೇ ಬೇಕು ಗದ್ದುಗೆ ಬೇಕು
ಅದರಲಿ ಕುಳಿತು ನೋಡಲೇಬೇಕು
ಕುಕ್ಕುರು ಬಡಿದು ಹರ್ಷಿಸಬೇಕು
ತೀರದ ಆಸೆಯ ಸವಿಯಲೇ ಬೇಕು

ಗದ್ದುಗೆ ನೋಡಲು ಬಲು ಚೆಂದ
ಕಾಣದ ಕಣ್ಣಿಗೂ ಬಲು ಅಂದ
ಕೂರುವ ತನಕ ನಿಲ್ಲದು ತವಕ
ಎಲ್ಲರ ಸೆಳೆಯುವ ಶ್ರೀಗಂಧ

ಕೂರಲು ಬಯಸುವ ಮುಗ್ದರ ಕಾಯೋ
ಸರ್ವರ ಪೊರೆಯೋ ಭಗವಂತ
ಕೂರುವ ಮೊದಲು ಬುದ್ಧಿಯ ನೀಡೋ
ಜ್ಞಾನವ ನೀಡುವ ಮಾಸಂತ
-ಪೆದ್ದರಿಚ್ಚ

ಭಯವನು ಹುಟ್ಟುಹಾಕಿದ
ಊರ ಹೊರಗಿದ್ದ
ಕಾಡನ್ನು ಕಡಿದು
ಹಸನು ಭೂಮಿಯ
ಸಿದ್ಧಮಾಡಿದ
ಧೀರ ರೈತರ ಮಕ್ಕಳು ನಾವು

ಹಸನು ಭೂಮಿಯ
ಗುರಿಯ ಮನಸಿನಲಿ ಹೊತ್ತು
ನೂರ್ಮಡಿ ಬೆಳೆಯ ಬೆಳೆವ
ಕನಸನು ನನಸಾಗಿಸಲು
ಹೆದ್ದಾರಿಯಿಲ್ಲದಿದ್ದರೂ
ಕಾಲ್ದಾರಿಯನು ಬೆಸೆದು
ಹಸನಾದ ಭೂಮಿಗೆ ಸಾಗಿದ
ಪರಿಶ್ರಮೀ ರೈತರ ಮಕ್ಕಳು ನಾವು

ಮುಳ್ಳಿಗೆ ಹೆದರದೆ
ಮುಗಿಲ ನಕ್ಷತ್ರದಂತೆ
ಚಿಗುರುವ ಕಳೆಗೆ ಅಂಜದೆ
ನಿಜ ಒಡೆಯನಂತೆ
ಕಿತ್ತೊಗೆದು ಮುಳ್ಳು ಕಳೆಯ
ನೂರ್ಮಡಿ ಫಸಲಿಗೆ
ಭೂಮಿಯ ಹಸನಾಗಿಸಿದ
ದಿಟ್ಟ ರೈತರ ಮಕ್ಕಳು ನಾವು

ಒರಟು ಕಲ್ಲುಗಳ ಪುಡಿಗೈದು
ಬೆಟ್ಟ ಗುಡ್ಡಗಳ ಅಗೆದು
ಬೆಳೆವ ಕಿರು ಬೀಜಕೆ
ಚಿಗುರಿ ಬೆಳೆಯಲು
ಹಸನಾದ ಭೂಮಿಯ
ತ್ಯಾಗ ಮಾಡಿದ
ಭರವಸೆಯ ರೈತರ ಮಕ್ಕಳು ನಾವು

ಇಂತಹ ದೈರ್ಯವಂತ, ಪರಿಶ್ರಮೀ,
ದಿಟ್ಟ, ಭರವಸೆಯ ರೈತರ
ಮಕ್ಕಳಾದ ನಾವು
ನಮ್ಮ ಸುತ್ತಾಮುತ್ತಾ ಬೆಳೆಯುತಿರುವ
ಕಳೆಯ ಸೌಂದರ್ಯಕೆ
ಮಾರುಹೋಗಿ
ಫೋಟೋ ತೆಗೆದು
ಆನಂದಿಸುತ್ತಿಹೆವು
ರೈತರ ಮಕ್ಕಳು ನಾವು
ಎಚ್ಚೆತ್ತುಕ್ಕೊಳ್ಳಬೇಕು
ಬೆಳೆಯಲು ನೂರ್ಮಡಿ ಬೆಳೆ
ಭೂಮಿ ಹಸನಾಗಬೇಕು!
-ಪೆದ್ದರಿಚ್ಚ

ನಿರ್ಮಲ ಪ್ರೀತಿಗೆ ಇಲ್ಲ ಅಡೆತಡೆ
ಸಾಗರ ಸೇರುವ ನೀರಂತೆ
ಪ್ರೀತಿಯ ಸವಿದಿಹ ಮನುಜನ ನುಡಿನಡೆ
ನೀರನು ಬೆರೆಸದ ಹಾಲಂತೆ

ಪ್ರೀತಿಯ ಗಳಿಸದ ಬಾಳಲಿ ಸೋಲು
ನೀರನು ಹುಡುಕುವ ಮೀನಂತೆ
ಪ್ರೇಮದ ಸಾಗರ ಕಾಣುವ ಮುಗಿಲು
ಚೆಂದದಿ ಕುಣಿಯುವ ನವಿಲಂತೆ

ಪ್ರೀತಿಯ ಹಿಬ್ಬನಿ ಸುರಿದರೆ ಬಾಳಲಿ
ಮಗುವಿನ ತೊದಲು ನುಡಿಯಂತೆ
ದೇವನ ಪ್ರೀತಿಯ ಕಂಡರೆ ಮನದಲಿ
ಆಳದಿ ಮುತ್ತನು ಪಡೆದಂತೆ
-ಪೆದ್ದರಿಚ್ಚ

ಬೊಗಳೆ ಬೊಗಳೆ ಎಲ್ಲವೂ ಬೊಗಳೆ
ಪ್ರೀತಿಯು ಇಲ್ಲದ ಮಾತು ಬೊಗಳೆ
ಪ್ರೇಮವ ಚಿಮ್ಮುವ ನೋಟವು ಬೊಗಳೆ

ಬೊಗಳೆ ಬೊಗಳೆ ಎಲ್ಲವೂ ಬೊಗಳೆ
ಭರವಸೆ ನೀಡುವ ಪದಗಳು ಬೊಗಳೆ
ಸಾಂತ್ವನ ತೋರುವ ಸಂಘವೂ ಬೊಗಳೆ

ಬೊಗಳೆ ಬೊಗಳೆ ಎಲ್ಲವೂ ಬೊಗಳೆ
ನಗುವನು ಬೀರುವ ಮೊಗವೂ ಬೊಗಳೆ
ಉತ್ಸಾಹ ತುಂಬುವ ಕಲರವ ಬೊಗಳೆ

ಬೊಗಳೆ ಬೊಗಳೆ ಎಲ್ಲವೂ ಬೊಗಳೆ
ಪ್ರೀತಿಯು ಇರದ ಸೇವೆಯು ಬೊಗಳೆ
ದೇವನ ಅರಿಯದ ಸಂಘವು ಬೊಗಳೆ

ದೇವನ ಜೊತೆಗೆ ಮೌನದಿ ಬಾಳಲು
ಪ್ರೇಮದಿ ಆತನ ಮಾತನು ಕೇಳಲು
ಬೊಗಳೆ ಜಗದ ಸದ್ದಿನ ರಗಳೆ
ಬೆಳೆಸದು ನಿನ್ನಲಿ ಸ್ವಾರ್ಥದ ಹೂಬೆಳೆ
-ಪೆದ್ದರಿಚ್ಚ

ಹೊಂಚಿನ ಹೆಂಚು ಬೇಕೇ ಮನುಜನೆ
ನಿನ್ನಯ ಬಾಳಿನ ಅರಮನೆಗೆ
ಸ್ವಾರ್ಥದ ನೆರಳು ಇಲ್ಲದ ಗುಡಿಸಲೇ
ಸಾಕು ಬಾಳಲಿ ನೆಮ್ಮದಿಗೆ

ಹೊಂಚನು ಹಾಕಿ ಗಳಿಸುವೆ ಏನು
ಅಳಿಯುವ ಪುಟ್ಟ ಜಗದೊಳಗೆ
ಪ್ರೀತಿಯ ಸಿಹಿಯನು ಹಂಚುತಾ ಬಾಳು
ಉಳಿಯುವೆ ದೇವನ ಮನದೊಳಗೆ

ಮೋಸದ ಅಗುಳು ನೀಗದು ಹಸಿವನು
ಮರಣದ ಸುಳಿಯಿದೆ ಬಾಯೊಳಗೆ
ಪ್ರೀತಿಯ ಒಂದೇ ತಿಂದರೆ ತುತ್ತು
ಹಸಿವಲೂ ಸುಖವಿದೆ ಕೊನೆವರೆಗೆ
-ಪೆದ್ದರಿಚ್ಚ