ಸಾಗುತಿರು ಹರಿವ ನೀರಂತೆ
ಕಸವಿರಲಿ ರಸವಿರಲಿ
ಬಾಚಿಕೊಂಡು ಸಾಗುತಿರು

ಏರುತಿರು ಆವಿಯ ಹನಿಯಂತೆ
ಕಾಡಿರಲಿ ನಾಡಿರಲಿ
ಗುರಿಮೋಡದತ್ತ ಏರುತಿರು

ಜಿನುಗುತಿರು ಮಳೆಯ ಹನಿಯಂತೆ
ಚಳಿಯಿರಲಿ ಬಿಸಿಲಿರಲಿ
ದೀನತೆಯಿಂದ ಜಿನುಗುತಿರು

ಬೆಳೆಯುತಿರು ಇಳಿವ ಹಿಮದಂತೆ
ಗಿರಿಯಿರಲಿ ಸಿರಿಯಿರಲಿ
ಪರಿಶುದ್ಧನಾಗಿ ಬೆಳೆಯುತಿರು

ಕುದಿಯುತಿರು ಬಿಸಿ ನೀರಿನಂತೆ
ಬೆಳಕಿರಲಿ ಇರುಳಿರಲಿ
ಕೇಡನ್ನು ಜಯಿಸಲು ಕುದಿಯುತಿರು
-ಪೆದ್ದರಿಚ್ಚ

ಬಾಳನು ಅರಿಯಲು ಮನಸ್ಸಿದೆ ನನಗೆ
ಅರಸಲು ಸಿಗದು ಉತ್ತರವು
ಜೊಹರಿಯ ಬೋಧನೆ ಇಳಿದರೆ ತಲೆಗೆ
ಉತ್ತರ ಚೌಕದಿ ಅಡಗಿಹುದು

ಎನ್ನಯ ಬಾಳನು ಮೊದಲನೆ ಚೌಕದಿ
ನಾನು ಇತರರೂ ಅರಿತಿಹೆವು
ಅರಿವುದು ಸುಲಭವು ಕೇಳಲು ಪರರಲಿ
ನಿಮಿಷದಿ ಸಿಗುವುದು ಉತ್ತರವು

ಎನ್ನಯ ಬಾಳನು ಎರಡನೆ ಚೌಕದಿ
ಕೇವಲ ನಾನು ಅರಿತಿಹೆನು
ಅಂಜಿಕೆ, ಭಯವೋ ಅರಿಯದು ಎನಗೆ
ಯಾರಿಗೂ ಹೇಳದೆ ಕುಳಿತಿಹೆನು

ಎನ್ನಯ ಬಾಳನು ಮೂರನೆ ಚೌಕದಿ
ಕೇವಲ ಪರರು ಅರಿತಿಹರು
ನನಗೆ ಕಾಣದ ಬಾಳಿನ ಮುಖವು
ಗೆಳೆಯರು ನಡೆಯಲಿ ತಿಳಿಯುವರು

ಎನ್ನಯ ಬಾಳನು ನಾಲ್ಕನೆ ಚೌಕದಿ
ಯಾರು ತಿಳಿಯದ ಕಿರು ಗುಹೆಯು
ಮೌನದಿ ದೇವನ ಕುಳಿತರೆ ಮಡಿಲಲಿ
ದೇವನೆ ಕಿವಿಯಲಿ ಗುನುಗುವನು

ಬಾಳನು ಅರಿಯಲು ನಿನ್ನಲಿ ಸಾಧ್ಯವು
ನಿನ್ನನು ಕಾಣಲು ಪರನೊಳಗೆ
ಪರರ ಜೊತೆಯಲಿ ದೇವನ ಕೇಳಲು
ಕಾಣುವೆ ನಿಧಿಯನು ಮನದೊಳಗೆ.
-ಪೆದ್ದರಿಚ್ಚ

ಭುವಿಯ ಮೊರೆಗೆ
ಕರಗೋ ಮೋಡವು
ಸುರಿಸಿ ಹನಿಯನು
ಜೀವ ತುಂಬಿದೆ
ಮನದ ಮೊರೆಗೆ
ಮಿಡಿವ ಸ್ವರ್ಗವು
ಸುರಿಸಿ ವರವನು
ಬಲವ ನೀಡಿದೆ

ಓ ದೇವನೆ ಕರುಣಿಸು
ನನ್ನ ಮನಕೆ ಭಕ್ತಿಯ
ಸೃಷ್ಟಿಪಾಲನೆ ಪಾಲಿಸು
ನನ್ನ ಬಾಳಿಗೆ ಸ್ಪೂರ್ತಿಯ
ನಿನ್ನ ಒಲವೇ ಸಾಕು ಎನಗೆ
ಎನ್ನ ಬಾಳಿನ ಯಾತ್ರೆಗೆ

ಮಗುವ ಅಳುವಿಗೆ
ಮಿಡಿವ ತಾಯಿಯು
ಪ್ರೀತಿ ತೋರಿಸಿ
ಕುಡಿಯ ಪೊರೆವಳು
ಭಕ್ತನಳುವಿಗೆ
ಮರುಗೋ ದೇವನು
ಕರವನಗಲಿಸಿ
ಅಪ್ಪಿ ಹಿಡಿವನು
-ಪೆದ್ದರಿಚ್ಚ

ಉಸಿರಿರುವವರೆಗೆ
ಚಿಗುರಿ ಹಸಿರಂತಾಗುವ ಆಸೆ
ಕೊಳೆತು ಒಣಗಿದಂತಿದ್ದರೂ
ಮರುಜೀವ ಪಡೆವ ಮಹಾದಾಸೆ
ಹಸಿರೆಲೆಗಳು ತಲೆಯೆತ್ತುವುವು
ಒಮ್ಮೆ ನಿನ್ನ ಸಿಂಚನವಾಗಲು
ಒಮ್ಮೆ ಹರಸೋ ದೇವನೇ
ನಿನ್ಹೆಸರಲಿ ಗಳಿಸಲ್ಹಸಿರು

ಉಸಿರಿರುವವರೆಗೆ
ಉಸಿರಂತೆ ಹೊಸದಾಗುವ ಆಸೆ
ತಣ್ಣಗೆ ತಟಸ್ಥನಾದರೂ
ಬಿಸಿ ಉಸಿರಾಸರೆಯ ಆಸೆ
ನರನಾಡಿಗಳು ಮತ್ತೇ ಮಿಡಿವವು
ಉಸಿರನೊಮ್ಮೆ ನೀ ಊದಲು
ಒಮ್ಮೆ ಊದೋ ದೇವಾ
ನನ್ನುಸಿರಲಿ ನಿನ್ನುಸಿರು.
-ಪೆದ್ದರಿಚ್ಚ

ಗೂಡಿನಲ್ಲಿ ಇರುವ ಹಕ್ಕಿ
ನಗದು ಮನಸ್ಸಿನಿಂದ
ಬೋನಿನಲ್ಲಿ ಇರುವ ಪ್ರಾಣಿ
ಬಾಳದೊಳಗಿನಿಂದ
ಕೂಡಿಟ್ಟ ನಗದು ಕೂಡ
ಹಾಗೇ ಅರಿಯೋ ಮನುಜ
ಹೊರಗೆ ಹಾರಿದಾಗ ಮಾತ್ರ
ಕಣ್ಣಿಗಂದ ಚೆಂದ

ಬಳಸದಿರುವ ಕಬ್ಬಿಣ
ತುಕ್ಕು ಹಿಡಿವುದು
ತಿನ್ನದಿರುವ ಅನ್ನವು
ಅಳಸಿ ಬಿಡುವುದು
ಕೂಡಿಟ್ಟ ನಿನ್ನ ಸಿರಿಯು
ಹಾಗೇ ಅರಿಯೋ ಮನುಜ
ಅವನು ಬಳಸಿದಾಗ ಮಾತ್ರ
ಬಾಳಿಗಂದ ಚೆಂದ
-ಪೆದ್ದರಿಚ್ಚ

ಗಿಡಗಳಲ್ಲಿ ಸುಮವು ಇದ್ದು
ಸವಿಯೋ ಕಣ್ಣು ಇಲ್ಲದೆ
ಹೂವಿನಂದ ತಿಳಿಯೋ ಮೂರ್ಖ
ಕುರುಡ ಕಂಡ ಆನೆಯೇ
ಮರಗಳಲ್ಲಿ ಹಂಪಲಿದ್ದು
ಇಲ್ಲದಿದ್ರೆ ನಾಲಿಗೆ
ಹಣ್ಣ ಸವಿಯು ಅರಿಯೋ ಮಂಗ
ಕವಿಯು ಕಂಡ ಕಲ್ಪನೆ

ಜೇಬಿನಲ್ಲಿ ಕಾಸು ಇದ್ದು
ಸಮಾಧಾನ ಇಲ್ಲದೆ
ನಿನ್ನ ಬಾಳು ಅರಿಯೋ ಪೆದ್ದ
ಗವಿಯ ಒಳಗಿನರಮನೆ
ಬೀರಿನಲ್ಲಿ ಚಿನ್ನ ಇದ್ದು
ನೆಮ್ಮದಿಯ ಕಾಣದೆ
ನಿನ್ನ ಜೀವ್ನ ತಿಳಿಯೋ ದಡ್ಡ
ಗುರಿಯೇ ಇಲ್ಲದಾ ಕೊನೆ
-ಪೆದ್ದರಿಚ್ಚ

ನನದೊಂದು ದಾರಿ
ನಿನದೊಂದು ದಾರಿ
ಸಾಗಲು ಬಾಳ ಗುರಿ
ನನ ರೀತಿಯು ಬೇರೆ
ನಿನ ರೀತಿಯೇ ಬೇರೆ
ಸೇರಲು ಬಾಳ ಗೆರೆ

ನನ ಬಾಳ ಕಾಲು
ದಾರಿಯಲಿ
ಸಾಗುವೆನು ಬಲವಿರುವ ತನಕ
ನನ ಮನಕೆ ಒಪ್ಪುವ ರೀತಿಯಲಿ
ಹೋಗುವೆನು ಗುರಿ ಕಾಣೋ ತನಕ
ಕರ ಹಿಡಿದು ಸಾಗಲು ಸಾಗುವೆ ದೂರ
ನಿನಗೇಕೆ ಕೈ ಎಳೆಯೋ ಸಮರ
ಸಾಗುತಿರು ಗುರಿ ಸೇರೋ ತನಕ
ಇಲ್ಲವೇ ಸಾಗು ಗುರುವಿನ ಬಳಿಕ

ಸವೆದ ಆ ಕಾಲು ದಾರಿಯಲಿ
ಕಾಲ್ಚುಚ್ಚುವ ಮುಳ್ಳಿನ ಹಾರ
ಸಾಗುತಿರೆ ತನ್ನಾಸೆಯ ರೀತಿಯಲಿ
ಕಾಲೆಳೆವ ಸ್ವಾರ್ಥದ ಭಾರ
ಧೈರ್ಯದಿ ಸಾಗು ನೀ ಸಾಗುವೆ ದೂರ
ಉಗುಳುತಾ ಕಹಿ ಸ್ವಾರ್ಥದ ಸಾರ
ಸಾಗುತಿರು ಗುರಿ ಸೇರೋ ತನಕ
ಇಲ್ಲವೇ ಸಾಗು ಗುರುವಿನ ಬಳಿಕ
-ಪೆದ್ದರಿಚ್ಚ

ಅವಿಶ್ವಾಸದ ಮೋಡವ
ಕರಗಿಸೋ ದೇವನೆ
ವಿಶ್ವಾಸದ ಸುರಿಮಳೆ
ಉದುರಿಸು ನೀ
ಮನದ ಹೊಲದಲಿ
ಪ್ರೀತಿಯ ಚಿಗುರಿಸಿ
ಅದ್ಭುತ ಫಲವನು
ಕರುಣಿಸು ನೀ

ಒಣಗಿದೆ ಹೊಲವು
ಕಾಣದೆ ಸಿಂಚನ
ತೆರೆಯೋ ಮನವ
ಬೇಡುವೆ ನಾ
ವಿಶ್ವಾಸದ ಹನಿಯ
ಚುಂಬನ ದೊರೆಯದೆ
ಫಲವನು ಕಾಣದ
ಬಂಜರು ನಾ
-ಪೆದ್ದರಿಚ್ಚ

ಬಲೆಯಲಿ ಮೀನಿದ್ದರೂ ಹಲವು
ಬೆಸ್ತನಿಗೆ ತಿಳಿದಿದೆ ಹೆಕ್ಕಿ ತೆಗೆಯಲು
ಒಳ್ಳೆಯವೋ, ತನ್ನ ತೆಕ್ಕೆಗೆ
ಕೆಟ್ಟವೋ, ಹಾರೋ ಹಕ್ಕಿಗೆ
ಬುದ್ದಿ ಇರೋತನಕ ತಲೆಯಲಿ
ಒಳಿತನಾರಿಸಬಲ್ಲೆ ಬಾಳಲಿ
ಮೈಮರೆತರೆ ಕ್ಷಣದಲಿ
ನೀನೊ ಕೇಡಿಗನ ಬಲೆಯಲಿ…

ಬೆಸ್ತನ ಹರಿಯದ ಬಲೆಯಲಿ
ತಿನ್ನಲಾಗದ ಮೀನಿದ್ದರೂ ರಾಶಿಲಿ
ಬಲೆಯೇನು ಕರಗದು
ತಿನ್ನಲಾಗುವ ಮೀನು ಮರುಗದು
ಬುದ್ದಿ ಇರೋತನಕ ತಲೆಯಲಿ
ಕೇಡು ಮಾಡದು ಕೇಡು ಬಾಳಲಿ
ಕೇಡನ್ನೇ ಎತ್ತಿಕೊಂಡೆಯಾದರೆ ಬಾಳಲಿ
ನೀನೋ ಕೇಡಿಗನ ಅಪ್ಪುಗೆಯಲಿ

ದೇವರ ಜಗವೆಂಬ ಸಾಗರದಿ
ಮೀನುಗಳು ನಾವಾತನ ಬಲೆಯಲಿ
ಒಳ್ಳೆಯರಾದರೆ ಆತನ ತೆಕ್ಕೆಗೆ
ಇಲ್ಲವಾದರೆ ಕೇಡಿಗನ ಪಕ್ಕೆಗೆ
ಬುದ್ದಿ ಇರೋ ತನಕ ತಲೆಯಲಿ
ಒಳಿತು ಮಾಡುತಿರು ಬಾಳಲಿ
ಕೇಡನ್ನು ಮಾಡುತಿರೆ ಜಗದಲಿ
ನೀನೊ ಕೇಡಿಗನ ಸೆರೆಯಲಿ
-ಪೆದ್ದರಿಚ್ಚ

ಬಾಳೇ ಹಾಗೆ…
ಬೆಳವಣಿಗೆಯ ಗೋಪುರ
ಬದಲಾವಣೆಯ ಸಾಗರ
ಅಮೂಲ್ಯವಾದುದನು
ಅತೀ ಶೇಷ್ಠವಾದುದನು
ಗಳಿಸುವ ಸುಂದರ ಕಾತರ

ಬಾಳೇ ಹಾಗೆ…
ಯಾವ ತ್ಯಾಗಕೂ ಸಿದ್ದ
ನೀಡಲು ಸವಾಲಿಗೆ ಗದ್ದ
ಬೆಲೆಕಟ್ಟಲು ಆಗದ್ದನ್ನು
ಮನ ಸೆಳೆಯುವುದನ್ನು
ಮುಡಿಗೇರಿಸಲು ಬದ್ದ

ಬಾಳೇ ಹಾಗೆ…
ಪಡೆಯಲು ದೇವನೆಂಬ ನಿಧಿ
ಸಾಲದು ದೂರಿದರೆ ವಿಧಿ
ಮನಸ್ಸು ತಿಳಿಯಾಗಿರಲು
ಚಿತ್ತ ಬಿಳಿಯಾಗಿರಲು
ಸಾಕು ಮೂರು ದಿನದ ಅವಧಿ
– ಪೆದ್ದರಿಚ್ಚ