ಹತ್ತಿ ಉರಿಯಲಿ ಬೆಂಕಿಯೊಮ್ಮೆ
ಮನದೊಳಗಿನ ಕಿಡಿಯಿಂದ
ಸುಟ್ಟು ಹಾಕಲಿ ಕಸವನ್ನು
ಮನವನು ಶುದ್ಧಗೊಳಿಸುತಾ
ಕೆನ್ನಾಲಗೆಯಂತೆ ಬೆಳಗಲಿ
ಚಳಿಹಿಡಿದ ದೇಹವನು ಖಾಯಿಸುತಾ
ಎಡೆಬಿಡದೆ ಅರಿಯದಂತೆ ಉರಿಯಲಿ
ಕಠಿಣತೆಯನು ನೀರಾಗಿಸುತಾ
ಬೆಸೆದು ಒಂದಾಗಿಸಲಿ
ಬಿರುಕು ಬಿಟ್ಟ ಎಸಳುಗಳನು ಆಯುತಾ
ಮನದ ಬಲವರ್ಧನೆಯಾಗಲಿ
ಓ ಬೆಂಕಿಯೇ ನಿನ್ನ ಅಪ್ಪುಗೆಯಲಿ ಒಂದಾಗುತಾ
-ಪೆದ್ದರಿಚ್ಚ

ತಡೆಯುವೆ ಏಕೆ ಸಾಗುವ ಜನರ
ಬಾಳಿನ ವೇಗದ ಪಯಣದಲಿ
ತಡೆಯಲು ಪರರನು ನೀನೂ ನಿಲ್ಲುವೆ
ಸಾಗು ನೀ ಸತ್ಯವ ಅರಿಯುತಲಿ

ಪಯಣಿಗ ಸಾಗುತಲಿರಬೇಕು
ತಲುಪಲು ಬಾಳಿನ ಗುರಿಯನ್ನು
ತಡೆಯದೆ ನಡೆಯುತಲಿರಬೇಕು
ಉಣ್ಣಲು ಸಾಧನೆ ಸವಿಯನ್ನು
-ಪೆದ್ದರಿಚ್ಚ

ದೇವನೇ ಮನುಜನ ರಚಿಸಿಹನು
ಗಂಡು ಹೆಣ್ಣಿನ ರೂಪದಲಿ
ಸೃಷ್ಟಿಯ ಕೊಡುಗೆಯ ನೀಡಿಹನು
ದಿವ್ಯ ವರಗಳ ಸುರಿಸುತಲಿ
ದೇವನ ರಚನೆಯ ಕಾರ್ಯವನು
ನೀಡಿಹ ಆತನ ಹಸ್ತದಲಿ

ಐಕ್ಯತೆಯ ಸುವಾಸನೆಯ
ಸವಿಯುತಾ ಬಾಳು ಓ ಮನುಜ
ವಿಭಜನೆಯ ಕೆಸರನ್ನು
ಇರಿಸುತಾ ದೂರ ಓ ಮನುಜ

ದೇವನೇ ಎಲ್ಲಾ ಬೆಸೆದಿರಲು
ವಿಭಜಿಸೋ ಯೋಚನೆ ನಿನಗೇಕೆ
ಪೊರೆಯುವ ದೇವನು ಬಳಿಯಿರಲು
ನಾಶದ ಭಯವು ನಿನಗೇಕೆ
-ಪೆದ್ದರಿಚ್ಚ

ಸೆರೆಯಾಗಿಸಲಾರೆ
ಮೊಳೆಯುವ ತೆನೆಯ ಚಿಗುರುವ ಎಲೆಯ
ಅರುಳುವ ಮೊಗ್ಗ ಬುದ್ದಿಯ ಮನುಜ
ಸೆರೆಯಾಗಿಸಲಾರೆ
ಮಿನುಗುವ ಬೆಳಕ, ಸುರಿಯುವ ಮಳೆಯ
ಮಗುವಿನ ನಗುವ, ಬುದ್ದಿಯ ಮನುಜ

ನಿನ್ನನ್ನು ಸೃಷ್ಟಿಸಿದ ಆ ನಿನ್ನ ದೇವ
ನಿನ್ನೊಳಗೆ ಇರಿಸಿಹನು ಬಿಡುಗಡೆಯ ಮಂತ್ರ
ನಿನ್ನೊಪ್ಪಿಗೆ ಇರದೆ ನಿನ್ನನು ಯಾರು
ಸೆರೆಯಾಗಿಸಲಾರರು ಅರಿಯೋ ಮನುಜ

ನಿನ್ನನ್ನು ರಕ್ಷಿಸುವ ಆ ನಿನ್ನ ದೇವ
ಕರ ಹಿಡಿದು ರಕ್ಷಿಸುವನು ಕೇಡಿನ ಕರದಿಂದ
ಬಾಳಲಿ ನಿನಗಾತನ ಆಸರೆ ಇರಲು
ಸೆರೆಯಾಗಿಸಲಾರರು ಅರಿಯೋ ಮನುಜ
-ಪೆದ್ದರಿಚ್ಚ

ಹೃದಯದೊಳಗಿನ ಕಸವನು
ತೆಗೆಯಲಿರುವುದು ಸಾಧನ
ಕ್ಷಮೆಯ ಒಡಲಲಿ ಮಲಗಲು
ಮನಸ್ಸು ಶುದ್ದ ಪಾವನ
ಕ್ಷಮಿಸು ಮನವೇ ಹೇಳುವೆ
ಮಧುರ ನಿನ್ನ ಜೀವನ

ತಪ್ಪು ಬಾಳಲಿ ಸಹಜವು
ಮನುಜ ಪಡೆದ ಬಳುವಳಿ
ಕೆಸರಲೇಕೆ ನರಳುವೆ
ಶುದ್ದ ನೀರಿನ ಚಳುವಳಿ
ಕ್ಷಮಿಸು ಮನವೇ ಹೇಳುವೆ
ತಪ್ಪಲು ಶಾಪದ ಹಾವಳಿ

ಎಡವಿ ಬೀಳುವೆ ಬಾಳಲಿ
ಮನಸ್ಸು ಮಾಡು ಏಳಲು
ತಪ್ಪಿ ನುಡಿಯುವೆ ಮಾತಲಿ
ತಿದ್ದಿ ನಡೆಯೋ ಬಾಳಲು
ಕ್ಷಮಿಸು ಮನವೇ ಹೇಳುವೆ
ದ್ವೇಷ ರೋಗವ ಜಯಿಸಲು
-ಪೆದ್ದರಿಚ್ಚ

ಧ್ವಜ ಎಂದಾಕ್ಷಣ ಅದರಲ್ಲಿ ಏನೋ ಗೂಡಾರ್ಥವಿದೆ.
ಧ್ವಜ ಎಂದಾಕ್ಷಣ ಮೈಯಲ್ಲಿ ಒಂದು ರೋಮಾಂಚನ;
ಎದೆಯ ಗೂಡಲಿ ಒಂದು ಸಿಂಚನ;
ಮನದಾಳದಲ್ಲಿ ಮೂಢಿಬರುವುದು ಸನ್ಮಾನ;
ಉಕ್ಕಿ ಬರುವುದು ಭಾವಗಳು ಪ್ರೇಮ, ಗೌರವ, ಹಾಗು ಅಭಿಮಾನ.
ಧ್ವಜ ಬಟ್ಟೆಯ ತುಂಡಲ್ಲ ಎಂದೇ ಯಾಕೆಂದರೆ ಅದು ಏನನ್ನೋ ಸೂಚಿಸುತ್ತದೆ.
ಅದು ಕೇವಲ ಬಟ್ಟೆಯ ತುಂಡಲ್ಲ ಎಂದೆ ಏಕೆಂದರೆ ಅದು ನಮ್ಮ ದೇಶವನ್ನೇ ಸೂಚಿಸುತ್ತದೆ.
ಅದು ಕೇವಲ ಬಟ್ಟೆಯ ತುಂಡಲ್ಲ ಎಂದೆ ಏಕೆಂದರೆ ಅದು ನಮ್ಮ ವಿಜಯದ ಸಂಕೇತವಾಗಿದೆ.
ಅದು ಕಂಡಾಕ್ಷಣ ಮೈಯಲ್ಲಿ ರೋಮಾಂಚನ ಎಂದೆ ಏಕೆಂದರೆ ಅದು ನಮ್ಮ ದೇಶದ ಸ್ವಾತಂತ್ರ್ಯದ ಸಂಕೇತ;
ಅದ ಕಂಡು ನನ್ನಲ್ಲಿ ರೋಮಾಂಚನ ಎಂದೆ ಏಕೆಂದರೆ ಅದು ನನ್ನ ಹಿರಿಯರ ಶ್ರಮದ ಫಲವನ್ನು ಸೂಚಿಸುತ್ತದೆ.
ಅದ ಕಂಡು ರೋಮಾಂಚನ ಎಂದೆ ಏಕೆಂದರೆ ಅದರ ಹಿಂದೆ ಸಾವಿರಾರು ಹಿರಿಯರ ರಕ್ತಧಾರೆಯಿದೆ.
ಅದ ಕಂಡು ಪ್ರೇಮ, ಗೌರವ, ಅಭಿಮಾನವೆಂದೆ ಏಕೆನೆ ಅದು ಐಕ್ಯತೆಯ ಸಂಕೇತ;
ಅದ ಕಂಡು ಪ್ರೇಮ, ಗೌರವ, ಅಭಿಮಾನವೆಂದೆ ಏಕೆನೆ ಅದು ಸೋದರತ್ವದ ಸಂಕೇತ;
ಅದ ಕಂಡು ಪ್ರೇಮ, ಗೌರವ, ಅಭಿಮಾನವೆಂದೆ ಏಕೆನೆ ಅದು ನಮ್ಮ ಸಮೃದ್ದಿಯ ಸಂಕೇತ;
ಅದ ಕಂಡು ಪ್ರೇಮ, ಗೌರವ, ಅಭಿಮಾನವೆಂದೆ ಏಕೆನೆ ಅದು ನಮ್ಮತನ ಸಂಕೇತ.

ತೆಗಳುವೆ ಏಕೆ ಸುಂದರ ಮನುಜನೆ
ನಿನ್ನಯ ರೂಪದ ಮನುಜನನು
ಜರಿಯುವೆ ಏಕೆ ತಿಳಿಯದೆ ನಿನಗೆ
ದೇವನೆ ಎಲ್ಲರ ಕಾಯುವನು

ಸಿರಿತನ ಬಡತನ ಯಾವುದು ಶಾಶ್ವತ
ನಾಲ್ಕೇ ದಿನದ ಈ ಬಾಳಿನಲಿ
ಹುಟ್ಟಲಿ ಸಾವಲಿ ಎಲ್ಲರೂ ಬೆತ್ತಲೆ
ಕಾಣದು ಏಕೆ ಈ ಕಣ್ಣಿನಲಿ

ದೇವರ ಕಣ್ಣಲಿ ಎಲ್ಲರೂ ಮಕ್ಕಳು
ನಗುತಲೇ ಹರಸು ಸರ್ವರನು
ಪ್ರೀತಿಯ ಹಾಲನು ನೀಡುವ ಆಕಳು
ಆಗುತ ಸಲಹು ನೀ ಎಲ್ಲರನು
-ಪೆದ್ದರಿಚ್ಚ

ಕನಸಲಿ ಕಂಡ ಸ್ವರ್ಗವ ತಲುಪಲು
ಕಣ್ಣೆದುರಲಿ ಇರುವ ಸ್ವರ್ಗವ
ಅರಿಯದೆ ನರಳುವ ಮನುಜ
ಸ್ವರ್ಗವನೇ ನರಕ ಮಾಡಿ

ಊಹಿಸಿದ ಆನಂದವ ಸವಿಯಲು
ಮನದೊಳಗಿನ ಸಂತಸವ
ಅರಿಯದೆ ಅಳುವ ಮನುಜ
ಉಲ್ಲಾಸವನೇ ನೋವ ಮಾಡಿ

ಡಬ್ಬದಲಿ ಕಂಡ ಕಡಲೆಯ ತಿನ್ನಲು
ಮುಷ್ಟಿಯಲ್ಲಿರುವ ಕಡಲೆಯ
ಚೆಲ್ಲಿ ಓಡುವ ಮಂಗನಂತೆ
ನಿನ್ನ ಬಾಳಲ್ಲವೇ ಪೆದ್ದರಿಚ್ಚ!

ಮನೆಗೆಲಸವ ಮಾಡದ
ಮಕ್ಕಳ ಕಂಡು
ಶಾಲೆಲಿ ಶಿಕ್ಷಕಿ ಮುನಿಯುವಳು
ಪ್ರೀತಿಯ ಕಣ್ಮಣಿ
ಬುದ್ದಿಯ ಕಲಿಸಲು
ಶಿಕ್ಷೆಯ ದಾರಿಯ ಹಿಡಿಯುವಳು

ತಪ್ಪನು ಅರಿಯದ
ಮಕ್ಕಳ ಆಟಕೆ
ಕೋಲಿನ ಏಟಲಿ ದಾರಿಯಿದೆ
ದಾರಿಯ ತಿಳಿಸುವ
ಏಟಿನ ನೋವಲೂ
ಜೀವನ ಕಲಿಸುವ ಪ್ರೀತಿಯಿದೆ

ಮನುಜನ ತಲೆಯಲಿ
ಜ್ಞಾನದ ಉದಯಕೆ
ಪ್ರಕೃತಿ ಶಿಕ್ಷಕಿ ನಿಂತಿಹಳು
ಮನುಜನ ತಪ್ಪಿನ
ಕೊಳಕಿನ ಕಲೆಯನು
ಸ್ವಚ್ಚನೆ ನೀರಲಿ ತೊಳೆದಿಹಳು
-ಪೆದ್ದರಿಚ್ಚ

ಗೋಧಿಯ ಕಾಳು ಬೀಳಲು ಭುವಿಗೆ
ಸಾವನು ತಡೆವರು ಯಾರಿಹರು?
ನೋವಿನ ಯಾತ್ರೆಯ ನಂತರ ಇರುವ
ಸಂತಸ ಅಳೆವರು ಯಾರಿಹರು?

ಬೆಳೆವುದೇ ಜೀವನ ಅಲ್ಲ ಎಂಬುದ
ಸುಲಭದಿ ತಿಳಿದವರಾರಿಹರು?
ತ್ಯಾಗವ ಎರೆದ ಬಾಳಲಿ ಹೊಸತನ
ಸವಿಯದ ಮನುಜರು ಯಾರಿಹರು?

ಚಿಗುರುವ ಭರವಸೆ ಮನದಲಿ ಇರಲು
ನರಳುತಾ ಸಾಯ್ವವರಾರಿಹರು?
ಗುರಿಯನು ಅರಿತು ಸಾವನು ಅಪ್ಪಲು
ಜೀವವ ತಡೆವರು ಆರಿಹರು?
-ಪೆದ್ದರಿಚ್ಚ